| ← Psalms (97/150) → |
| 1. | KAUN-O me nanmwarki! Sampah, ke en nsenamwahu! Perenda, kumwail deke kan en nan madau! |
| 2. | Depwek oh rotorot mosul kin kapilpene ih; e kin ketin kaunda ni pwuhng oh mehlel. |
| 3. | Kisiniei kin tieng mwowe oh kamwakamwasika sapwellime imwintihti kan me kapilpene. |
| 4. | Sapwellime lioal kin kamarainihada sampah; sampah kin kilang oh kin rerrerki. |
| 5. | Dohl akan kin peipeseng rasehng kirihs mwohn silangin KAUN-O, mwohn silangin Kaunen sampah pokon. |
| 6. | Nanleng kan kin lohkiseli sapwellime pwuhng, oh wehi koaros kin kilang sapwellime lingaling. |
| 7. | Irail koaros me kin pwongih dikedik en eni kan kin namenekla; oh koht akan koaros kin poaridi mwohn KAUN-O. |
| 8. | Maing KAUN, pwehki sapwellimomwi kopwung kan tohn Saion kan kin nsenamwahula, oh kahnimw en Suda kan kin perenda, |
| 9. | Maing KAUN, Wasa Lapalap, komwi me kin kaunda sampah pokon; komwi ketin lapalap sang koht akan koaros. |
| 10. | KAUN-O kin ketin loalloale irail kan me kin kailongki me suwed; e kin ketin sinsile mour en sapwellime aramas akan; e kin ketin kapitirailla sang pahn manaman en aramas suwed kan. |
| 11. | Marain kin dakedaker pohn aramas pwung kan, oh nsenamwahu pohn me mwahu kan. |
| 12. | Kumwail koaros me pwung kan, kumwail nsenamwahula pwehki wiepen nin limen KAUN-O! Kumwail tamataman dahme Koht me sarawio ketin wiadahr, oh kapingkalahngankihong. |
| ← Psalms (97/150) → |