| ← Psalms (115/150) → |
| 1. | Maing KAUN, lingan uhdahn pahn kowohng komwihte, e pahn kowohng komwihte, a kaidehk ong kiht, pwehki sapwellimomwi limpoak poatopoat oh loalopwoat. |
| 2. | Dahme tohn wehi teikan kin idengki reht, “Ia amwail Kohten?” |
| 3. | Atail Koht kin ketiket nanleng; e ketin wiewia mehkoaros me e kin ketin kupwurki. |
| 4. | Arail koht akan me kin wiawihkihda silper oh kohl, re uhdahn wiepen pehn aramaste. |
| 5. | Mie awarail, re ahpw sohte kak lokaia, mie masarail, re ahpw sohte kak kilang wasa, |
| 6. | mie salengarail, re ahpw sohte kak rong wasa, mie tumwarail, re ahpw sohte kak ned mehkot. |
| 7. | Mie pehrail, re ahpw sohte kak doahke mehkot, mie nehrail, re ahpw sohte kak alu; sohte ngihl ehu kak kohda sang nan kapinwararail kan. |
| 8. | Me kin wiahda koht likamw pwukat, oh pil likih irail re en duwehla dikedik en eni kan me pein irail wiadahr. |
| 9. | Kumwail aramas en Israel kan, kumwail likih KAUN-O. Ih me sawasepamwail, oh silepamwail. |
| 10. | Kumwail sapwellimen Koht samworo kan, kumwail likih KAUN-O! Ih me sawasepamwail, oh silepamwail. |
| 11. | Kumwail koaros me kin kaudokiong KAUN-O, kumwail likih. Ih me sewesepamwail, oh silepamwail. |
| 12. | KAUN-O kin ketin tamataman kitail oh e pahn ketin kupwuramwahwih kitail; e pahn ketin kupwuramwahwih aramas en Israel kan oh pil sapwellimen Koht samworo koaros. |
| 13. | E pahn ketin kupwuramwahwih koaros me kin wauneki ih, me lapalap oh pil me tikitik kan. |
| 14. | KAUN-O en ketin kupwurehkin kumwail seri-% kumwail oh pil kadaudokamwail kan! |
| 15. | KAUN-O en ketin kupwuramwahwih kumwail, ih me ketin kapikada nanleng oh sampah. |
| 16. | KAUN-O kelehpw me ketin sapwellimaniki nanleng, a sampah e ketikihong aramas akan. |
| 17. | Me mehlahr akan sohte kin kapinga KAUN-O, pil me kin kohdilahng nan sapwen me mehlahr akan sohte kin kapinga. |
| 18. | A kitail me momour kan, kitail pahn kapingkalahngan ong ih met oh pil kohkohlahte. Kapinga KAUN-O! |
| ← Psalms (115/150) → |