←  Psalms (69/150)  →
1. Pathian aw, honhondam in; tuite lah ka hinna phain a lutta ngala.
2. Buannawi thukpi, siksan himhim om louhna ah, ka tum hulhul hi: Tui thukpi tui lian hontupna ahte, ka na lutta hi.
3. Ka kikouna lamin ka baha; ka dang a keu khinta; ka Pathian ka ngakna ah ka mit a vai khinta hi.
4. Bangmahlou a honhote ka samzang sangin a tam ua: dikloupi a hondou a honhihmangthat tumte tuh mi hat tak ahi uhi: huchiin ka lak het louh tuh ka penawn hi.
5. Pathian aw, nang ka haidan na thei hi; ka siamlouhnate leng na lakah sel ahi kei hi.
6. Toupa aw, sepaihte Pathian, nangmah ngakte keimah jiakin zahlak kei uhen: Israelte Pathian aw, nangmah zongte keimah jiakin hihzumin om kei uhen.
7. Nangmah jiaka gensiat ka thuak jiakin, zumnan ka mai a khuh khinta hi.
8. Ka unaute lakah mikhual ka na hitaa, ka nu naute lakah theih ngeilouh mi ka na hita hi.
9. Na in a ka phatuamngaihnain honne khina; nangmah gensete gensiatnate ka tungah kibungta hi.
10. Ka kaha, anngawl kawma ka hinna ka sawi leh, huai lah gensiata ka omna phet ahia.
11. Ka puansilha saiip ka zat leh, amau dia hoihlou lama gentehna ka na hi jela.
12. Kulh konga tuten ka tungtangthu a gen ua; zukhamhatte lasak ka nahita hi.
13. Himahleh, Toupa aw, ken jaw, hun kipahhuaiah ahi, ka thum; Pathian aw, na chitna thupi jiakin na hotdamna thupi takin hondawng in.
14. Buannawi akipan honhumbit inla, hontum sak mahmah ken; honhote lakah leh tui thukpi akipan humbitin hon omsak in.
15. Tui lianin hontum mang kei henla, tui thuk piin leng honvalh kei hen, kokhuk inleng a kam honchih khum kei hen.
16. Toupa aw, hondawng in; na chitna a hoih ngala; na lainatna thupidan bang jelin kei lam hongnga in.
17. Na sikha lakah na mai leng sel ken; ka mangbang ngala; hondawng meng in.
18. Ka hinna honnaihin, tan inla; hondoute jiakin hon humbit in.
19. Nang mi hon gensiatnate, ka zahlaknate, ka zumnate na thei hi: hondoute na maah a om vek uhi.
20. Mi hon gensiatna in ka kha a sia a; nakpi takin ka lungkham behlap hi: huchiin hon hehpih ding ka zonga, himahleh kuamah a om ngal kei ua; honkhamuan dingte ka zong nawna, himahleh kuamah ka mu sam kei hi.
21. Ka an dingin banghiam kha a honpiak behlap ngal ua; ka dangtakin lah uain thuk dawn dingin honpia uhi.
22. A ma ua a dohkan uh thang honghi hen; khamuang taka a om lai un pial honghi hen.
23. A mitte uh, a muh theihlouhna ding un, hihmialin om hen; a kawngte uh kivuang sak gige in.
24. Na lungkimlouh mahmahna tuh a tunguah sungbua inla, na heh thangpaihnain amau tuh man hen.
25. A omna uh gam henla; a puanin khawng uah kuamah om kei hen.
26. Na satpa tuh a sawi ua, na sukliamte lungkhamna leng a gen ngal nak uhi.
27. A thulimlouhna uh thulimlouhnain behlap inla; amau na diktatna ah lut kei uhen.
28. Amau tuh hinna bu akipan nulmang in om uhenla, mi diktat lakah gelh hi kei uhen.
29. Himahleh kei genthei tak leh lungkham tak ka hia: Pathian aw, na hotdamna in mun sangah honkoih in.
30. Pathian min lain ka phat dinga, kipahthu genin amah ka pahtawi ding hi.
31. Huchibangin bawngtal hiam, ki leh chinnei bawngpa hiam, sangin Toupa a kipaksak zo ding hi.
32. Thunuailutten huai a mu ua, a kipak uhi: nou Pathian zongte aw, na lungtang uh hingin om hen.
33. Toupan tagahte ngaikhiain, a hentate tuh a musit ngal kei hi.
34. Lei leh vanin amah phat hen, tuipite leh a sung ua thil tang thei peuhmahte toh.
35. Pathianin Zion honkhiain, Juda khuate a siam dek ngala: huchiin huaiah a om ding ua, neih toh a thuah ding uh.A sikhate suanten leng a gouluah ding ua; a min itte a sungah a om ding uhi.
36. A sikhate suanten leng a gouluah ding ua; a min itte a sungah a om ding uhi.
←  Psalms (69/150)  →