← Psalms (66/150) → |
1. | Leilung luah tengteng aw, Pathian pahtawiin nuamin kikou unla. |
2. | A min thupidan tuh la in sa khia unla: a phatna hihthupi un. |
3. | Pathian kiangah, Na thilhihte mulkimhuai na e! Na thilhihtheihna thupidan thu-ah nangmah melmate na kiangah a kipelut ding uhi. |
4. | Lei tung luah tengtengin chibai honbuk ding ua. Nangmah phatin la a sa ding uh, chi un. Selah. |
5. | Kisa un, Pathian thilhihte en un; mihing tate tunga a thilhih ah a kihtakhuai ahi. |
6. | Aman tuipi leigaw a suaksaka; luipi khein a pai kai ua: huaiah amah ah i kipak uhi. |
7. | A thilhihtheihna in khantawnin vai a hawma; a mitin nam chih a en hi: helhatte kipahtawi kei uhen. Selah. |
8. | Mi chihte aw, I Pathian uh phat unla, amah phatna husa tuh theisak un. |
9. | Aman tuh i hinna uh a hihhing gige a, i khete hihsuan a phal kei hi. |
10. | Pathian aw, nang non enchian a; dangka sik etchet bangin non enchian ahi. |
11. | Nang len ah non piluta; ka kawng uah puakgik tak non koiha. |
12. | Mihingte, kangtalai tunga tuangin, ka lu tunguah na pai saka; mei leh tui ah ka pai suak ua; himahleh mun hausa takah lut dingin non pi khia ahi. |
13. | Halmanga thillatte toh na in ah ka lut dinga, ka thuchiamte na lakah ka tangtungsak ding hi. |
14. | Ka mukin a gena, mangbang a ka om laia kamin a gente mah. |
15. | Sa thau tak halmanga thillatte na kiangah ka lan dinga, belampate hal namtui toh; bawngpate, kelte toh ka lan ding hi. Selah. |
16. | Kisa un, Pathian laudansiam tengteng aw, ngaikhia un. Huchiin, ka hinna adinga a thilhih tuh ka hontheisak ding hi. |
17. | Amah tuh ka kamin ka sama, ka leia pahtawiin a om hi. |
18. | Ka lungtanga thulimlou ka limsak leh Toupan honngaikhe kei dinga |
19. | Himahleh, Pathianin honngaikhe taktaka; ka thumna husa a limsak ahi.Pathian, ka thumna vuaksuak sak lou-a, ka laka a chitna tawp sam lou tuh phatin om hen. |
20. | Pathian, ka thumna vuaksuak sak lou-a, ka laka a chitna tawp sam lou tuh phatin om hen. |
← Psalms (66/150) → |