←  Psalms (25/150)  →
1. TOUPA aw, ka lungsim na kiangah ka koih den jela.
2. Ka Pathian aw, nang ka honmuang hi, zahlakin honomsak kenla; hondoute honzoh phal ken.
3. A hi, nang honngak himhim kuamah zahlakin a om kei ding uh. A jiak om lou-a lepchiah taka gamtate jaw zahlakin a om ding uh.
4. TOUPA aw, na lampite hontheisak inla; na lamtate tanchin honhilhin.
5. Na thutak ah hopi inla, hon hilhin. Nang hon hondampa Pathian na hi ngala: nitumin kon ngak nilouh hi.
6. TOUPA aw, na lainatna leh na chitnate theigige in; tuma a na om tawntung sa ahi ngala.
7. Ka valnou lai khelhnate leh ka tatleknate theigige kenla; TOUPA aw: na hoihna jiakin, na chitna bang jelin hontheigige in.
8. TOUPA jaw a hoih in a dik ahi: huai jiakin mi khialte lampi a musak ding hi.
9. Thunuailutte tuh vaihawmna dikah a pi dinga: thunuailutte tuh amah lampi tanchin leng a hilh ding hi.
10. A thukhun leh a thutheihsakte juite adingin TOUPA lampi tengteng tuh chitna leh thutak ahi.
11. TOUPA aw, na min jiakin ka thu limlouhna ngaidamin, thupi tak ahi ngala.
12. TOUPA laudan siam mi kua ahia? Huai mi tuh a lampi tel ding a musak ding hi.
13. A hinna tuh nuamsatakin a om ding; a suanten gam tuh a luah ding uhi.
14. TOUPA thuguk amah laudansiamte kiangah a om, a thukhun tuh amaute a theisak ding hi.
15. Ka mitin TOUPA lam a en gige a: aman ka khete len akipanin a lakhe ding ahi ngala.
16. Kei lam hongnga inla, honhehpihin; chim leh haksatakin ka om ngala.
17. Ka lungtang buainate a hongthupita a; ka mangbatna akipan honpi khiain aw.
18. Ka haksatna leh ka thuakdan ngaihtuah inla, ka khelhna tengteng ngaidamin.
19. Hondoute ngaihtuah dih, tampi ahi ua: nakpi petmahin a honhua behlap uhi.
20. Ka hinna vom hoih inla, hon humbit in aw: zahlakin honomsak kenla, nang ah ka ginna ka koih ngala.
21. Ka lungsim hoihna leh ka diknain honhumbitin. Ka honngak nilouh ngala.Pathian aw, Israelte a mangbatna tengteng ua kipan tankhia in.
22. Pathian aw, Israelte a mangbatna tengteng ua kipan tankhia in.
←  Psalms (25/150)  →