←  Psalms (119/150)  →
1. Lampia mi hoihkimten nuam a sa uhi, TOUPA dan juiten.
2. A thutheihsakte juiten nuam a sa uhi, lungtang tengtenga amah zongten.
3. A hi, amau diktatlouhna himhim a hih kei ua: a lampite ah a pai jel uhi.
4. Nang na thuzohna thute tuh thupiakin non pia a, phatuamngaihtaka ka zuih theihna ding un.
5. Aw, na thusehte tuh jui dingin ka omdante hihkipin om leh aw;
6. Huai hun chiangin ka zahlak kei dinga, na thupiakte tengteng khawk ka sak hun chiangin.
7. Lungtang diktak puin kipahthu ka honhilh ding hi. Na vaihawmna dikte tuh kazil hun chiangin.
8. Na thuseh tuh ka jui dinga: aw, honpaisan den ken.
9. Valnouin, bangchin ahia a omdan a hihsiangthou ding? Na thu bang jela a omdan venghoihin.
10. Ka lungtang tengtengin kon zonga; aw, na thupiakte ka paisan jaw phal mahmah ken.
11. Na tunga thil ka hihkhelh louhna dingin na thu tuh ka lungtangah ka kem khawm hi.
12. TOUPA aw, nang nuam nasa hi; na thusehte honzil sakin.
13. Na kama na vaihawm pawt tengteng ka mukin ka theisakta hi.
14. Na thutheihsak lamah nuam ka saa, hauhsakna tengtenga nuam ka sak bang hialin.
15. Na thuzohna thute ka ngaihtuah ding a, na lampite ka limsak behlap ding hi.
16. Na thuseh tungte khawngah ka kipak dinga: na thu tuh ka mangngilh kei ding hi.
17. Ka hin theihna dinginna sikha tungah hoih takinhihin; huchiin na thu ka jui ding hi.
18. Na dan thu akipan thillamdang ka muh theihna dingin, ka mitte honhihvaksakin.
19. Leiah mikhual ka hi a; na thupiakte ka lakah imken.
20. Ka hinna tuh kitam gawpin aoma, chiklai peuha na vaihawmnate a ngaih jiakin.
21. Mi kisathei, hamsiat thuakte tuh na taihilha, na thupiakte vakmangsan nakte mahmah.
22. Gensiatna leh muhsitna ka kiang akipan la mangin; na thutheihsakte lah ka jui ngala.
23. Mi liante leng a tu ua, honkalh ua; himahleh na sikhain na thusehte a ngaihtuah jaw ahi.
24. Na thutheihsakte ka kipahna ahi a, thupha honhilh te ahi uh.
25. Ka hinna tuh leivuiah a belh bikbeka; na thu bang jelin honhihhalhin.
26. Ka omdante ka hontheisaka, nang non dawnga: na thusehte tuh honzil sakin.
27. Na thuzohna lam tuh hontheisiam sakin: huchiin na thillamdang hih thute ka ngaihtuah ding hi.
28. Ka hinna lungkham jiakin a tuimang naka: na thu bang jelin honhihhatin.
29. Omdan diklou ka kiang akipan lasuan inla; na dan hehpihtakinhonpia in.
30. Omdan muanhuai ka tela; na vaihawmnate ka maah ka omsak hi.
31. Na thutheihsakte ah ka belh chinten a; TOUPA aw, honzahlak sak ken.
32. Na thupiak lamah ka tai dinga, ka lungtang na hihlet hun chiangin.
33. TOUPA aw, na thuseh lampi tuh honensakin; huchiin a tawpphain ka tawn ding hi.
34. Theihsiamna honpia in, huchiin, na dan tuh ka kem hoih ding hi, ahi, ka lungtang tengtengin ka jui ding hi.
35. Na thupiak lampi-ah honpai sakin, huaiah ka kipak ngala.
36. Na thutheihsak lamah ka lungtang kihei sakin, huaihamna lamah hi louin.
37. Thil bangmahlou phet enlou dingin ka mit kaihei inla, na lampite ah honhihhalhin.
38. Na thu tuh na sikha kiangah hihkipin, huai tuh nangmah launa ahi.
39. Keia dia gensiatna ka kihtak tuh la mangin; na vaihawmte lah a hoih ngala.
40. Ngaiin, na thuzohna thute tuh theih ka ut gigea: na diktatna jiakin honhihhalhin.
41. TOUPA aw, na chitnate tuh ka kiangah hongpai hen, na hotdamna ngei, na thu bang jelin.
42. Huchiin, hon gensete dawnna ding ka nei dinga, na thu lah ka muang ngala.
43. Huan, thutak thu tuh ka kam akipan lakhe vek kenla; na vaihawmnate lah ka lamen gige ngala.
44. Huchiin na dan ka jui gige dinga, khantawn khantawnin.
45. Huan, noplenna ah ka vak dinga; na thuzohna thute lah ka zong ngala.
46. Na thutheihsak thute kumpipate maah ka gen dinga, ka zum kei ding hi.
47. Huan, na thupiak, ka it tungte ah ka kipak ding hi.
48. Na thupiak, ka it lamte ah, ka khutte ka jak dinga; na thusehte tuh ka ngaihtuah ding hi.
49. Na sikha kianga thuchiam tuh theigigein. Nang non lamet sak jiakin.
50. Huai tuh ka gimthuakna ah leng ka khamuanna ahi: na thuin lah a honhihhalhta ngala.
51. Kisatheiten nakpitakin honnuihsan ua: himahleh na dan tuh ka pai hoisan kei hi.
52. TOUPA aw, nidanglaia na vaihawmte ka theigige a, ka kikhamuan jel hi.
53. Lunghihlouhnain nakpi takin hon buak khumta a, mi gilousalou-na dan paisante jiakin.
54. Ka khualzinna in ah na thusehte ka la ahi ngitnget hi.
55. TOUPA aw, janchiangin na min ka theigige hi, na dan leng ka jui gige hi.
56. Huai tuh ka neia, na thuzohna thute ka vom hoih jiakin.
57. TOUPA tuh ka tantuan ahi a: na thu ka jui ding chih ka gen khinta hi.
58. Ka lungtang tengtengin na hehpihna ka ngena: na thu bang jelin honhehpihin.
59. Ka omdante ka ngaihtuaha, na thutheihsak lamah ka kalsuan hi.
60. Ka kintata, na thupiakte jui dingin ka zekai kei hi;
61. Mi gilou-salou khauhualten hongak lom gigea; himahleh na dan tuh ka mangngilh kei hi.
62. Jan laiin kipahthu honhilh dingin ka thou dinga, na vaihawm diktatte jiakin.
63. Nangmah laute tengteng leh na thuzohna thute juite lawm ka hi.
64. TOUPA aw, leilung na chitnain a dim ahi: na thusehte honhilhin.
65. TOUPA aw, na thu bangin na sikha tuh na hihhoih jel hi.
66. Ngaihtuah siamna leh theihna honhilhin; na thupiakte lah ka gingta ngala.
67. Hihhaksate ka om main ka vakmang naka: tunjaw na thu ka juita hi.
68. Nang na hoiha, thil hoih leng na hiha: na thusehte honhilhin.
69. Kisatheiten ka tungah juau a phuaktawm ua: ka lungtang tengtengin na thuzohna thute tuh ka vom hoih ding hi.
70. A lungtang uh sungthau bangin a thaua; Keia bel na dan tungah ka kipak naknak.
71. Na thusehte ka zil theihna dinga hihhaksata ka na om a hoih hi.
72. Dangkaeng leh dangka sang tampi sangin na kama dan pawt keia ding a hoihjaw hi.
73. Na khutin honsiamin, honsek ahi: na thupiakte ka zil theihna dingin theihsiamna honpiain.
74. Nangmah lauten honmu ding ua, a kipak ding uh; na thu ka lamet gige jiakin.
75. TOUPA aw, na vaihawmte a dik chih leh, nang ginom takin ahi, non hihgim chih ka thei hi.
76. Na sikha kianga na thuchiam bang jelin hehpihtakin na chitna ka khamuanna ding hihen.
77. Ka hin theihna dingin na chitnate ka kiangah hongpai hen: na dan tuh ka kipahna ahi ngala.
78. Kisathei zahlakin om uhen; dikloupiin honhihniamta ngal ua: himahleh na thuzohna thute ka ngaihtuah ding hi.
79. Nang honlaute keilam hongnga uhen, na thutheihsakte a thei ding uhi.
80. Ka zahlak louhna dingin ka lungtang na thusehte ah hoihkimin om hen.
81. Ka hinna na hotdamna ngaiin a baha: himahleh na thu ka lamen gige hi.
82. Na thu etnain ka mit a vai khintaa, nang chikchianga hon khamuan ding na hia? Ka chi, ka chi –a
83. Meikhu uk savun thawl bang ka nahita ngala; himahleh na thusehte ka mangngilh kei hi.
84. Na sikha kum chiang ding bangtan hi ding ahia, honsimmohte tungah chikchiangin ahia vai na hawm ding?
85. Mi kisathei, na dan banga om louten ka kiakna dingin kokhukte bang a tou ua.
86. Na thupiak tengteng a ginom ahi: amau diklou piin honsimmoh nak uh; honpanpihin.
87. Amau tuh leiah na honhihmang dekdek ua; himahleh na thuzohna thute lah ka kiheisan ngal kei hi.
88. Na chitna bang jelin honhihhalhin: huan, na kama thutheihsak ka jui ding hi.
89. TOUPA aw, khantawn adingin na thu tuh van ah kiptakin a om hi.
90. Na ginomna suan tengteng phain a om ding hi: leilung na hihkipa, a om gige hi.
91. Huaite tuh tuiin na vaihawmte bangin a om gige a thil tengteng lah na sikhate ahi ngal ua.
92. Na dan ka kipahna hi kei lejaw, ka gimthuakna a mangthangta ding hi inga.
93. Na thuzohna thute tuh chikpeuhin leng ka mangngilh kei ding: nang lah huaitein nonhilhhalhta ngala.
94. Nanga ka hi, honhondamin; na thuzohna thute lah ka zong ngala.
95. Mi gilou-salouten honhihmang tumin honngak nak ua; himahleh na thutheihsakte ka ngaihtuah ding hi.
96. Hoihkimna tengteng tawpna ka muta; na thupiak tuh a za ngei e.
97. Aw, na dan deih hi natel ing e! nituma ka ngaihtuah nak tuh ahi.
98. Na thupiakten hondoute sanga piljaw in honbawla; khantawna ka kianga a om gige nak jiakin.
99. Honhilhte tengteng sangin pilna ka nei jaw ahi; na thutheihsakte ka ngaihtuah a hih nak jiakin.
100. Tekte sangin ka theisiam jaw ahi, na thuzohna thute ka vom hoih jiakin.
101. Na thu ka zuih theihna dingin lampi gilou himhim ah ka khete a kalsuan ka phal kei hi.
102. Na vaihawmna lak apat ka pial kei; nang non hilh jiakin.
103. Na thute ka kama dingin khum hina tele! ahi, ka kama dingin khuaiju sangin a khumjaw hi.
104. Na thuzohna thute jiakin theihsiamna ka nei jel: huaijiakin omdan diklou peuhmah ka hua hi.
105. Na thu tuh ka khe adingin khawnvak ahi a, ka lampi adingin vakna ahi.
106. Na vaihawmna diktatte jui dingin ka kichiama, ka hihkip lai hi.
107. Nakpi taka hihhaksatin ka oma; TOUPA aw, na thubang jelin honhihhalhin.
108. TOUPA aw, hehpih takin ka kam deihthu-a thilpiakte na sang inla, na vaihawmnate honhilhin.
109. Ka hinna ka khut ah a om naknaka; himahleh, na dan ka mangngilh ngeikei hi.
110. Migilou-salouten ka awkna dingin thang a kam ua; himahleh na thuzohna thute ka vakmang san kei hi.
111. Na thutheihsakte khantawna gouluah din ka la a; ka lungtang hihnuampen ahi ngala:
112. Khantawnin, a tawp phain, na thusehte banga hih dingin ka lungtang ka hoihsak hi.
113. Lungsim kiplou neite ka hua a: Na dan tuh ka deih ahi.
114. Nang ka bukna mun leh ka phaw na hi a; na thu ka lamet ahi.
115. Nou thil hoihlou hihte aw, hongpaisan un; ka Pathian thilpiakte ka vom hoih theihna dingin.
116. Ka hin theihna dingin na thu bang jelin honlen nilouh inla, ka lamet tungah zahlakin honomsak ken.
117. Honkaiin, huchiin ka bit dinga, na thusehte ka khawksa gige ding ahi.
118. Na thusehte vakmang sante tengteng na musita; a khemna ulah juau ahi ngala.
119. Leia mi gilou-salou tengteng banghiam ek sia bangin a hihmang jela: huaijiakin na thutheihsakte ka deih ahi.
120. Ka sa nangmah lauin a linga: na vaihawmnate leng ka lau hi.
121. Vai ka hawma, diktakin ka hih jel ahi: honnuaisiahte lakah honngeingaih lou ken.
122. Na sikha tungtang thu ah, a hoihna a bultum in: kisatheiten honnuaisiah kei uhen.
123. Na hotdamna etnain ka mit a vaikhinta a, na thu diktat tak etna tohin.
124. Na chitna bang jelin na sikha tungah hih inla, na thusehte honhilh in.
125. Na sikha ka hi a, theihsiamna honpia in; na thutheihsakte ka theihna dingin.
126. TOUPA, sep a hunta; na dan bangmahlouin a bawlta ngal ua.
127. Huaijiakin na thupiakte dangkaeng sangin ka deih ahi; ahi, dangkaeng siangthou sangin leng.
128. Huaijiakin thil peuhmah thu-a na thuzohna thu tengteng tuh dikin ka theia; omdan dikou peuhmah ka hua ahi.
129. Na thutheihsakte a lamdang ahi: huaijiakin ka hinnain a vom hoih gige a.
130. Na thu hilhchetin mite a hihvaka: mi mawlte a theisiam sak jel hi.
131. Ka kam zapiin ka kaa, ka ha hawphawpa: na thupiakte ka lunggulh jiakin.
132. Kei lam honga inla, honhehpih in, na min deihte na hehpih bangin.
133. Ka khe kalsuante na thu-ah hihkip inla; gitlouhna himhim ka tungah thu neisak ken.
134. Mihing nuaisiahna lakah honhumbit in; huchiin na thuzohna thute ka jui ding hi.
135. Na melin na sikha sunvak inla; na thusehte honhilhin.
136. Ka khitui lui tui bangin a luang khia a, na dan a zuih louh jiakun.
137. TOUPA aw, nang na dika, na vaihawmte leng a dik ahi.
138. Na thutheihsakte tuh diktat tak leh ginom mahmahin thu na piaa.
139. Ka phattuamngaih nain honhih mangthangta, hondouten na thu a mangngilhtak jiakun.
140. Na thu sianthou mahmah ahi; huaijiakin na sikhain a deih hi.
141. Mi neu leh mi muhsit ka hi a: himahleh na thuzohna thute ka mangngilh ngeikei hi.
142. Na diktatna khantawn diktatna ding ahi a, na dan leng thutak ahi.
143. Mangbatna leh lunglaunain hon buak khumta a; himahleh na thupiakte tuh ka kipahna ahi.
144. Na thutheihsakte khantawn adingin a dik ahi: theihsiamna honpia in, huchiin, ka hing gige ding hi.
145. Ka lungtang tengtengin kon sama; TOUPA aw, hondawng in: na thusehte ka kem hoih ding hi.
146. Kon sam jela; hondawng in, huchiin na thutheihsakte ka jui ding hi.
147. Phalvak main ka thou-a, huhna deihin ka kikou-a; na thute ka lamen hi.
148. Na thu ka ngaihtuah theihna dingin jan vente main, ka mitte a hak uhi.
149. Na chitna bang jelin ka aw ngaikhia inla; TOUPA aw, na vaihawmnate bang jelin honhihhalh in.
150. Ngaihtuah gilou delhten a honnaih ua: amau jaw na dan gamlata om ahi uhi.
151. TOUPA aw, nang jaw na naia; na thupiak tengteng thutak ahi.
152. Nidanglaiin, na thutheihsakte akipanin, huaite khantawn adinginna hihkip chih ka na theita hi.
153. Ka haksatna ngaihtuah inla, honhumbit in; na dan lah ka mangngilh ngei ngal keia;
154. Ka thu hon genpih inla, hontan in na thu bang jelin honhihhalh in.
155. Hotdamna tuh mi gilou-saloute lakah a gamla ahi: na thusehte a zuih louh jiakun.
156. TOUPA aw, na chitnate tuh a thupi ahi; na vaihawmnate bang jelin honhihhalh in.
157. Honsimmohte leh hondoute tampi ahi ua, himahleh na thutheihsakte ka pai kawi san kei hi.
158. Lepchiah taka hihte ka ena, ka lungkim kei hi; na thu a zuih louh jiakun.
159. Na thuzohna thute ka deihdan ngaihtuah inla, TOUPA aw, na chitna bangbangin honhihhalh in.
160. Na thu kigawmkhawm tuh thutak ahi a; na vaihawmna diktat chiteng leng khantawnin a om nilouh ding hi.
161. Mi lianten a jiak omlou in hon simmoh ua: himahleh ka lungtang in na thute ahi, a kihtak.
162. Na thu ah nuam kasa a, thil thupipi gallaka mu bangin.
163. Juau thu ka huain ka kih a; na dan bel ka deih ahi.
164. Ni khatin sagih vei kon phat jel ahi, na vaihawm diktatte jiakin.
165. Na dan deihten khamuanna thupitak a nei ua; pukna himhim a neikei uhi.
166. Toupa aw, na hotdamna ka lamen a, na thupiakte bangin ka hih jel hi.
167. Ka hinnain na thutheihsakte a jui gige a: ka deih mahmah hi.
168. Na thuzohna thute leh na thutheihsakte thu ka jui jela; ka omdan tengteng na maa om ahi ngala.
169. Toupa aw, kon sap husa na maah hongnai hen: na thu bangbangin theihsiamna honpia in.
170. Hehpih ka ngetna na maah tung hen: na thu bangbangin honhumbitin.
171. Ka mukin phatna thu gen hen: nang na thusehte non zilsak jel jiakin.
172. Ka leiin na thu phatin lasa hen; na thupiak tengteng diktatna a hih jiakin.
173. Na khut thu honpanpih dingin mansain om hen: na thuzohna thute lah ka telta ngala.
174. Toupa aw, na hotdamna ka lunggulh naka; na dan ka kipahna ahi.
175. Ka hinna thu hing hen, huchiin a honphat ding hi; na vaihawmnaten leng honpanpih hen.Belam mang bangin ka vak manga; na sikha zong in; na thupiakte lah ka mangngilh nei ngal keia.
176. Belam mang bangin ka vak manga; na sikha zong in; na thupiakte lah ka mangngilh nei ngal keia.
←  Psalms (119/150)  →