← Psalms (107/150) → |
1. | Aw TOUPA kiangah kipahthu hilh un; amah tuh a hoih ngala: a chitna leng khantawnin a om ding ahi ngala. |
2. | TOUPA mi tatten huchibang gen uhen, doumi khut akipan a tatten. |
3. | Gam teng akipan a pi khawma, suahlam leh tumlam, simlam leh mallam akipan tekhawngin. |
4. | Gamdaia gam keu lampi ah a vakvak ua; mihing omna khua himhim a mu kei uhi. |
5. | Gilkial leh dangtakin a hinna uh a gilsung uah a bahta hi. |
6. | Huaitakin a buaina uah TOUPA a sam ua, aman a lungkhamna ua kipanin a humbitta. |
7. | Mihing omna khuaa a pai theihna ding un, lampi tangtak ah a pikheta hi. |
8. | Aw, mihingten TOUPA a chitna jiak leh, mihing tate tunga a thillamdang hihte jiakin phat himhim le u aw! |
9. | Aman hinna thil lunggulh mahmah tuh a taisakin, hinna gilkial tuh vahsak jel ngala. |
10. | Mial nuaia leh sihna lima tu-a, gimthuakna leh sikkhau a hente mahmah; |
11. | Pathian thu tungahte a hel ua, Tungnungpen lunggel tuh a ngaihneu jiak un: |
12. | Aman a lungtang uh sepgimnain a minsakta a; a puk ua, panpihpa ding himhim lah a om ngal kei a. |
13. | Huai takin a buaina uah TOUPA a sam ua, aman a buaina ua kipan a pi khia a, a hennate uh a suktat sakta hi. |
14. | Mial nuai akipan leh sihna lim akipan a pi khia a, a henna uh a suktat sakta hi. |
15. | Aw, mihingten TOUPA a chitna jiakin leh, mihing tate tunga a thillamdang hihte jiakin phat himhim le u aw! |
16. | Aman dal kongkhakte tuh a chimsaka, a kalhna sik tawnte tuh a hihtanta ngala. |
17. | Mi haite a tatlekna jiak un leh, a gitlouh-satlouhnate u jiakin a kihihgim nak uhi. |
18. | A hinna un nek theih chiteng a kiha; sihna kulh kongkhakte a naih jel uhi. |
19. | Huaitakin a buaina uah TOUPA a sam ua, aman a mangbatna ua kipanin a hondam jel hi. |
20. | A thu tuh a sawl khia a, amau tuh a damsak jel hi, a mahthatna ding ua kipanin a humbit jel hi. |
21. | Aw, mihingten TOUPA a chitna jiakin leh, mihing tate tunga a thillamdang hihte jiakinphat himhim leu aw! |
22. | Amau kipahthugen kithoihnate tuh lan uhenla, a thilhihte uh lasain hilh uhen. |
23. | Tuipi-a long liana vapai suka, tui za tak tung khawnga na sem semten: |
24. | Huaiten TOUPA thilhihte leh, tui thupi-a a thillamdang hihte a mu jel uhi. |
25. | Aman thu a pia a, huihpi a nungsaka, huaiin a tuikihawtte tuh a sangsak hi. |
26. | Vanah a pai tou luamluam ua, thukpi ah a pai suk nawn luamluam jel uhi: mangbatna jiakin a hinna uh a zulbei jel hi. |
27. | Zukham bangin a sawi hoihoi ua, a tuan loklok ua, omdan ding himhim a theikei nak uhi. |
28. | Huaitakin a buaina uah TOUPA a sam ua, aman a mangbatna ua kipanin a pi jel hi. |
29. | Huihpi a daisak duama, huchiin a tuikihawtte a dai duam jel hi. |
30. | Huan, a daihtak jiakin a kipak ua; huchiin aman a omna ding uh longkhawlna ah a pi tung jel hi. |
31. | Aw, mihingten TOUPA a chitna jiakin leh, mihing tate tunga a thillamdang hihte jiakin phat mahmah le u-aw! |
32. | Amau tuh mite kikhopna ah amah phat uhenla, upate tutana ah phat uhen. |
33. | Aman luipite tuh gamdai a suaksak jela, tuinakte leng lei keu a suaksak jel hi. |
34. | Gam hoih tuh gam keu mah leng a suaksak jel, a sunga omte genhak jiakin. |
35. | Gamdai tuh dilin a suaksak jela, gam keu leng tuinak a suaksak jel hi. |
36. | Huaiah gilkialte a omsaka, omna ding khua a bawl ua. |
37. | Loute a neih ua, grep huante a bawl ua, a gah hong pungte a muh theihna ding un. |
38. | Amau tuh vual a jawla, huchiin nakpi taka hihpunin a om ua; a gante uh a kiam a phal kei hi. |
39. | Huan, nuaisiahte, gimthuaknate, lungkhamna te jiakin a kiamta hiaihiai ua, a kun ngiungiauta leuleu uhi. |
40. | Aman miliante tungah muhsitna a sungbuaa, gamdai, lampi himhim omlouhna ah a vak saksaka. |
41. | Himahleh gentheite tuh gimthuakna akipanin mun sangah a khatou hi, gan hon bangin inkuanpihte asiamsak hi. |
42. | Mi diktatten huai a mu ding ua, a kipak ding uh; thulimlouhna tengtengin a kam a hum ding hi.Kuapeuh pilin huaite a kem hoih ding ua, TOUPA chitnate a ngaihtuah ding uhi. |
43. | Kuapeuh pilin huaite a kem hoih ding ua, TOUPA chitnate a ngaihtuah ding uhi. |
← Psalms (107/150) → |