← Psalms (102/150) → |
1. | TOUPA aw, ka thumna ngaikhia inla, ka kikou husa na kiang tung hen. |
2. | Ka mangbat niin ka lakah na mai sel kenla: kei lamah na bil hondohin; ka honsap hun chiangin hondawng pahin. |
3. | Ka damsung nite meikhu bangin a jam manga, ka guhte tuh taptung bangin a saa. |
4. | Ka lungtang tuh loupa bangin hailumin a oma, a vuai zouta hi; ann nek leng ka mangngilhta ngala. |
5. | Ka thum husa jiakin ka guhte tuh ka sa ah a belh bikbek ahi. |
6. | Gamdai tuivapi bang ka hi a: kho tul simbu bang phet ka na hita hi. |
7. | Ka hak gige a, kawlgit in tunga amah kiaa om bang ka na hita hi. |
8. | Hondouten nitumin hon gensia ua: ka tunga hangsanten keimah banga om dingin hamsia a lou nak uhi. |
9. | Vut tuh an bangin ka ne a, ka dawn dingin khitui toh ka helta ngala. |
10. | Na lunghih louh mahmah leh na heh jiakin: nang non dom kanga, na honpai mangta ngala. |
11. | Ka damsung nite tuh limliap kiam bang ahi a; loupa bangin ka vuaita hi. |
12. | TOUPA aw, nang bel khantawnin na om dinga; nangmah theihgigena leng suan tengteng phain a om lai ding hi. |
13. | Na thou dinga, Zion tang tuh na hehpih dinga: amah lah hehpih a hunta ngala, ahi, hun seh tuh a tungta hi. |
14. | Na sikhaten a suangte a it un, a leivui leng a hehpih ngal uhi. |
15. | Huchiin nam chihin TOUPA mintuh a lau ding ua, leia kumpipate tengtengin na thupina leng a lau ding uhi. |
16. | TOUPAN Zion khua dingsakta ngala, a thupina kithuamin a kimuta hi; |
17. | Tagahte thumna tuh a limsaka, a thumna uh a musit kei hi. |
18. | Huai tuh khangthak hongom ding adingin gelh ahi dinga: nam siama hongom di in TOUPA tuh a phat ding. |
19. | Aman a mun siangthou sangpi akipanin a en suka; TOUPAN van akipanin lei a mu a; |
20. | Suangkulhtang thum ngaikhe ding leh, si dinga sehte sut dingin; |
21. | Huchi-a miten Ziona TOUPA min tuh a genthang ua, Jerusalema a phatna tuh a genthang theihna ding un. |
22. | Mite a kikhawm khawm ua, lalgamte toh, TOUPA nasem ding in. |
23. | Aman lam lakah ka tha a bahsaka; ka damsung tuh a hihtom hi. |
24. | Ka Pathian aw, ka hatlai nite khawngin honla mang ken, ka chia: nang kum tuh suan om sung tengtengin a om ding hi. |
25. | Leitung kingakna tuh nidanga na phum sa ahi a; vante leng na khutsuak ahi. |
26. | Huaite tuh a hongmang dinga, nangjaw na om tawntung ding hi: ahi, huai tengteng tuh puansilh bangin a honglui dinga; puan bangin na khek dinga, a honglamdangta ding hi. |
27. | Nang jaw na ngeingeia, na kumten bei ni himhim a neikei ding.Na sikhate tate tuh a om gige ding ua, a suangte uh na maah hihkipin a om ding uhi. |
28. | Na sikhate tate tuh a om gige ding ua, a suangte uh na maah hihkipin a om ding uhi. |
← Psalms (102/150) → |