← Proverbs (4/31) → |
1. | Ka tapate, pa hilhna ja un, theihsiam na thei dingin limsak un: |
2. | Thuginpi hoih lah ka honpe ngala; ka dan taisan kei un. |
3. | Ka pa dingin tapa ka hi ngala, ka nu mitmuha nou leh it keleuleu. |
4. | Huan a honsinsaka, ka kiangah, na lungtangin ka thute lenden hen; ka thupiakte jui inla, huan hing in: |
5. | Pilna neiin, theihsiamna nei in: mangngilh ken, ka kama thute akipan lunglel ken: |
6. | Huai mangngilh kenla, nang a honhawi dinga; amah it inla, aman a hon kem ding hi. |
7. | Pilna thil pipen ahi; huaijiakin pilna la in: ahi, na muhsa tengteng toh theihsiamna la in. |
8. | Amah pahtawi inla, a man nang honkaisangsak ding: zahtakna a hontun dia, amah na kawi laiin. |
9. | Na lua dingin kilawmna kizepna a honpe dia: kilawmna manglukhu nang a honpe ding hi. |
10. | Aw ka tapa, ka gente ja inla, sang in; huchiin na damsung kumte a tam ding hi. |
11. | Pilna lampi ah ka honkisinsaktaa; tanna lampite ah ka honpita hi. |
12. | Na pai chiangin, na kalsuante haksain a om kei dia; na tai leh, na kisui puk kei ding. |
13. | Hilhna kip takin lenin; pai sak ken: amah vom in; amah lah na hinna ahi ngala. |
14. | Migiloute lampi ah lut ken, gilou mite lampi ah pai ken. |
15. | Pel khia inla, a kiangah pai ken; kiheisan inla, pai vengveng in. |
16. | Poi a khoih kei ngal uleh, a ihmu ngal kei ua; kuahiam a puksak kei uleh, a ihmutna uh lakmangin a om hi. |
17. | Gitlouhna tanghou lah a ne ngal ua, hiamgamna uain a dawn uhi. |
18. | Himahleh mi diktatte lampi khovak tung bang ahi, sunlaitak takna tang semsem. |
19. | Migiloute lampi khomial bang ahi: a kisuihna uh a theikei uh. |
20. | Ka tapa, ka thute limsak in; ka gente ah na bil doh in. |
21. | Na mitte akipan amaute lamang ken; na lungtang lakah vom in. |
22. | Amau mute ading in hinna ahi ngal ua, a sa uh adingin damna. |
23. | Thanopna tengteng toh na lungtang kem in; huai akipan lah hinna tuinakte a luang ngala. |
24. | Nang akipan kam hoihlou koih mang inla, nang akipanin muk kilawmloute gamlapiah koih in. |
25. | Na miten tang takin en uhenla, na etna na maah tang hen. |
26. | Na khe lampi pheisak inla, huan na lampi tengteng hihkipin omsak inKhut taklam ah hiam veilam ah hiam pial ken: gilou akipanin na khe suan in. |
27. | Khut taklam ah hiam veilam ah hiam pial ken: gilou akipanin na khe suan in. |
← Proverbs (4/31) → |