| ← Proverbs (14/31) → |
| 1. | Numei pil tengin a in a lama: himahleh mi haiin amah khutin a phel sia. |
| 2. | Amah tanaa omin Toupa a kihtaa: himahleh a lampitea hoihlouin amah a musit hi. |
| 3. | Mi hai kam sungah kisaktheihna chiang a om: himahleh mi pil mukten huaite a hawi ding hi. |
| 4. | Bawngtalte omlouhna ah, anpiakkuang a sianga: himahleh bawngtal hatna jiakin nakpia punna a om. |
| 5. | Theihpih ginomin juau a gen kei ding: himahleh theihpih juautheiin juau a gen hi. |
| 6. | Musittuin pilna a zonga, a mu kei hi: himahleh theihsiamna neia ding in theihna a baih hi. |
| 7. | Mihai a omna ah lutin, amah ah theihna mukte na mu kei ding. |
| 8. | Mi pilvang pilna a lampi theihsiam ahia: himahleh mi haite haina khemna ahi. |
| 9. | Mi haiin mohna a nuihsana: himahleh mi tangte lakah hoih deihna a om hi. |
| 10. | Lungtangin amah khatna a theia; huan mikhualin a nuamsakna a tokbuai kei hi. |
| 11. | Mi giloute in suksiatin a om ding: himahleh mi tang a pha ding hi. |
| 12. | Mihing adia lampi dika kilawm a oma, himahleh huai tawpna sihna lampite ahi. |
| 13. | Lungtang nuihna nangawn lungkhamna ahia; huan vualnopna tawpna gikna ahi. |
| 14. | Lungtanga nungtolhmi amah lampitea damsakin a om ding: huan mi hoih amah maha kipana hihlungkimin a om ding hi. |
| 15. | Mi mawlin thu chih a uma: himahleh mi pilvangin a paina hoihtakin a en hi. |
| 16. | Mi pilin a kihtaa, gilou akipan a pai mang: himahleh mi haiin musittakin a kipuaa, a kimuang. |
| 17. | Kuapeuh heh baih haitakin a ta ding: huan ngaihtuah gilou mi huatin a om hi. |
| 18. | Mi mawlin haina a luah ding: himahleh mipilvang theihna khuksakin a om ding. |
| 19. | Hoih maah hoihlou a kuna; huan diktat kongpite ah gilou. |
| 20. | Genthei amah inveng mahmah muhdahin a om: himahleh hausain lawm tampi a nei hi. |
| 21. | A inveng musitin thil a hihkhiala: himahleh mi genthei hehpih, aman nuam a sa hi. |
| 22. | Hoihlou ngaihtuahte a paikhial kei umaw? himahleh chitna leh thutak hoih ngaihtuah kiangah a om ding. |
| 23. | Sepgimna tengtengah phatuamna a om: himahleh mukte houlimna taksapna lam kia ah a pai. |
| 24. | Mi pil manglukhu a hausakna uh ahia: himahleh mi haite haina a haina kia uh ahi. |
| 25. | Theihpih dikin khate a suakta saka: himahleh juaute genin khemna a omsak. |
| 26. | Toupa kiktakna ah muanna hat a oma: huan a nauten bukna mun a nei ding uh. |
| 27. | Toupa kihtak hinna tuikhuk ahi, sihna thangte akipan paimangna dingin. |
| 28. | Mipi tamna ah kupipa thupina a om: himahleh mipite omlouhna lal siatna ahi. |
| 29. | Kuapeuh a heh hak theihsiamna thupi akipan ahi: himahleh kuapeuh lungtomin haina a tawisang hi. |
| 30. | Lungtang hoih sa hinna ahi: himahleh hajatna guhte muatna ahi. |
| 31. | Kuapeuh genthei nuaisiahin a Bawlpa a simmoh hi: himahleh kuapeuh tasam tunga chitna neiin amah a zah. |
| 32. | Mi gilou a gilou hihnaa paih lutin a oma: himahleh mi diktatin a sihna ah lametna a nei hi. |
| 33. | Theihsiamna nei lungtang ah pilna a khawla: himahleh mihaite sunglam panga om kitheihsakin a om. |
| 34. | Diktatnain nam a tawisanga: himahleh khelhna mi kuapeuh adingin zahlakna ahi.Sikha pil taka gamta lamah kumpipa deihsakna a oma: himahleh zumna omsak tungah a thangpaihna a om hi. |
| 35. | Sikha pil taka gamta lamah kumpipa deihsakna a oma: himahleh zumna omsak tungah a thangpaihna a om hi. |
| ← Proverbs (14/31) → |