| ← Zechariah (5/14) → |
| 1. | Ngabuya ngaphakamisa amehlo ami, ngabona, khangela, umqulu wencwadi ondizayo. |
| 2. | Ingilosi yathi kimi: Ubonani? Ngaphendula ngathi: Ngibona umqulu wencwadi ondizayo; ubude bawo buzingalo ezingamatshumi amabili, lobubanzi bawo buzingalo ezilitshumi. |
| 3. | Yasisithi kimi: Lokhu kuyisiqalekiso esiphumela emhlabeni wonke; ngoba ngokutsho kwaso umuntu owebayo uzalahlwa, langokutsho kwaso wonke umuntu ofunga amanga uzalahlwa. |
| 4. | Ngizasithwalela, kutsho i Nkosi yamabandla, singene endlini yesela lendlini yalowo ofunga amanga ngebizo lami, sihlale endlini yakhe, siyidilize, izigodo lamatshe. |
| 5. | Yasisondela ingilosi eyayikhuluma lami, yathi kimi: Phakamisa amehlo akho, ubone ukuthi kuyini lokhu okuvelayo. |
| 6. | Ngasengisithi: Kuyini? Yathi: Yifatshi enkulu le evelayo. Yathi: Lokhu kuyibubi babantu elizweni lonke. |
| 7. | Khangela, isisibekelo somnuso sasuswa; kwakukhona owesifazana ehlezi phakathi kwefatshi. |
| 8. | Ingilosi yasisithi: Lokhu kuyiBubi. Yasimsunduzela phakathi kwefatshi, yayisibekela ifatshi ngesisibekelo somnuso. |
| 9. | Ngasengiphakamisa amehlo ami, ngabona, khangela, abesifazana ababili besiza, belezimpiko ezifanana lezengabuzane. Babephapha emoyeni, bayiphakamisela emazulwini ifatshi. |
| 10. | Ngasengisithi kuyo ingilosi eyayikhuluma lami: Bayisa ngaphi ifatshi? |
| 11. | Yona yathi: Bayisa elizweni leShinari ukuyakhela indlu khona; lapho isiyakhiwe, bazayibeka phezu kwesisekelo sayo. |
| ← Zechariah (5/14) → |