| ← Zechariah (13/14) → |
| 1. | Ngalolosuku umthombo uzavulelwa indlu kaDavida labakhileyo eJerusalema ukuze bahlanjululwe ezonweni lekungcoleni. |
| 2. | Kuzakuthi ngalolosuku, kutsho i Nkosi yamabandla, ngiqume amabizo ezithombe asuke elizweni, zingabe zisakhunjulwa; futhi ngizadlulisa abaprofethi lomoya ongcolileyo ngibasuse elizweni. |
| 3. | Kuzakuthi-ke, uba umuntu ezaprofetha njalo, ng’khona uyise lonina-ke abamzalayo bazakuthi kuye: Kawuyikuphila, ngoba ukhulume amanga ebizweni le Nkosi. Uyise lonina abamzalayo babesebemgwaza esaprofetha. |
| 4. | Ngalolosuku bonke abaprofethi bazakuba lenhloni ngemibono yabo nxa beprofetha; kabayikugqoka izigqoko zoboya ukuze bakhohlise, |
| 5. | kodwa omunye lomunye wabo uzakuthi: Kangisuye mprofethi mina, ngingumlimi womhlabathi; ngoba ilizwe laba yilifa lami kusukela ebutsheni bami. |
| 6. | Uba sekuthiwa kuye: Ngawani lamanxeba asemzimbeni wakho? uzakuthi: Ngamanxeba okutshaywa kwami endlini yabangane bami, |
| 7. | Vuka, nkemba, uvukele umelusi wami, uvukele umuntu ongumngane wami, kutsho i Nkosi yamabandla. Tshaya umelusi ukuze izimvu zichitheke; ngizaphendulela isandla sami kwezincinyane. |
| 8. | Kuzakuthi elizweni lonke kuqunywe kuphele ebantwini ingxenye ezimbili kwezintathu, kutsho i Nkosi. |
| 9. | Ngizayifaka emlilweni lingxenye yesithathu, ngibancibilikise njengomuntu encibilikisa isiliva, ngibahlole njengokuhlolwa kwegolide. Bazabiza ibizo lami, ngibaphendule; ngithi: Bangabantu bami; labo bathi: I Nkosi inguNkulunkulu wethu. |
| ← Zechariah (13/14) → |