← Zechariah (12/14) → |
1. | Nanti ilizwi. Yilizwi le Nkosi ngoIsrayeli. I Nkosi eyendlala amazulu, yamisa umhlaba, yenza umoya womuntu phakathi kwakhe, |
2. | ithi: Khangela, ngizakwenza iJerusalema ibe njengenkezo edakisayo kibo bonke abayizingelezeleyo; loJuda laye uzavinjezelwa ekuvinjezelweni kweJerusalema. |
3. | Ngalolosuku ngizakwenza iJerusalema ibe njengelitshe elisindayo kubo bonke abantu; bonke abalithwalayo bazazilimaza kakhulu; lazo zonke izizwe zomhlaba zizayihlanganyela. |
4. | Ngalolosuku ngizatshaya wonke amabhiza ngokusanganiseka, labagadi bawo ngokuhlanya. UJuda ngizamlinda, kodwa ngizaphumputhekisa wonke amabhiza abezizwe. |
5. | Izizwe zakoJuda zizakuthi: Abakhileyo eJerusalema balamandla ngenxa ye Nkosi yamabandla, uNkulunkulu wabo. |
6. | Ngalolosuku ngizakwenza izizwe zakoJuda zibe njengembawula yomlilo phakathi kwezihlahla, lanjengesihlanti* esibhebhayo phakathi kwezithungo. Bazabaqeda bonke abantu ababazingelezeleyo, abangakwesokunene labangakwesokhohlo; kodwa abantu beJerusalema babelokhu besahlala kuhle endaweni yabo. |
7. | I Nkosi izakhulula kuqala imizi yakoJuda ukuze udumo lwendlu kaDavida lodumo lwabakhileyo eJerusalema lungedluli olukaJuda. |
8. | Ngalolosuku i Nkosi izavikela abakhileyo eJerusalema ukuze ngalolosuku obuthakathaka phakathi kwabo abe lamandla njengoDavida, lendlu kaDavida ibe njengonkulunkulu, njengengilosi ye Nkosi eyahamba phambi kwabo. |
9. | Ngalolosuku ngizazama ukuchitha zonke izizwe ezihlasela iJerusalema. |
10. | Ngizathululela phezu kwendlu kaDavida laphezu kwabakhileyo eJerusalema umoya womusa lowokulabhela, njalo bazangikhangela abamgwazileyo, bamlilele, njengokulilelwa kozelwe yedwa, bamkhalele ngokubabayo njengokukhalelwa ngokubabayo kolizibulo. |
11. | Ngalolosuku kuzakuba khona ukulila eJerusalema okunjengokulilelwa kukaHadadi-Rimoni egcekeni leMegido. |
12. | Ilizwe lizalila, yileyo laleyondlu iyodwa; indlu kaDavida layo ilile iyodwa, labesifazana bayo bebodwa; indlu kaNathani iyodwa, labesifazana bayo bebodwa; |
13. | indlu kaLevi iyodwa, labesifazana bayo bebodwa; indlu kaShimeyi iyodwa, labesifazana bayo bebodwa; |
14. | lazo zonke izindlu eziseleyo, indlu leyo laleyo iyodwa, labesifazana bayo bebodwa. |
← Zechariah (12/14) → |