| ← Zechariah (11/14) → |
| 1. | Vula iminyango yakho, Lebhanoni, ukuze umlilo utshise imisedari yakho. |
| 2. | Khala wena firi, ngoba umsedari usuwile, ngoba izihlahla ezinhle ziphundlekile. Khalani lina zihlahla zamaokhi* zeBashani, ngoba igusu elingangenekiyo seliwile. |
| 3. | Ilizwi lokukhala kwabelusi liyezwakala, ngoba udumo lwabo luchithekile. Ukubhonga kwamabhongo ezilwane kuyezwakala ngoba ihlathi leJordani liqothulwe. |
| 4. | I Nkosi uNkulunkulu wami yathi: Yelusa izimvu zokuhlatshwa. |
| 5. | Abazithengayo bayazihlaba, bengabilacala; labazithengisayo bathi: Kayibusiswe i Nkosi, senginothile; abelusi bazo kabazihawukeli. |
| 6. | Ngoba kangisayikubahawukela abakhileyo kulelilizwe, kutsho i Nkosi. Kodwa khangela, ngizabanikela abantu ezandleni zabomakhelwane babo, lezamakhosi abo; bazachitha ilizwe, kangiyikophula loyedwa ezandleni zabo. |
| 7. | Ngasengizelusa izimvu zokuhlatshwa yilabo abathenga izimvu. Ngathatha intonga ezimbili, enye ngayibiza ngokuthi nguMusa, lenye ngayibiza ngokuthi nguNhlanganiso. Ngazelusa-ke izimvu. |
| 8. | Ngaxotsha abelusi abathathu ngenyanganye, ngoba basebengidinile, lami sengiyisinengiso kibo. |
| 9. | Ngakho-ke ngasengisithi: Kangisayikulelusa; efayo kayife, lelahlekayo kayilahleke; lalezo eziseleyo zidlane inyama. |
| 10. | Ngasengithatha intonga yami ethiwa nguMusa, ngayephula ukuze ngephule isivumelwano sami engangisenze labantu bonke. |
| 11. | Sephulwa-ke ngalolosuku, labathengi bezimvu ababengikhangele bazi ukuthi kwakuyilizwi le Nkosi. |
| 12. | Ngasengisithi kibo: Uba kulungile kini, ngiphani iholo lami; kodwa uba kungalunganga, yekelani. Basebengilinganisela iholo lami amashekeli* esiliva angamatshumi amathathu. |
| 13. | I Nkosi yasisithi kimi: Aphosele endaweni yokugcinela imali; yeka inani elinje ababengihlawule ngalo! Ngakho-ke ngasengiwathatha amashekeli esiliva angamatshumi amathathu, ngawaphosela endaweni yokugcinela imali ethempelini. |
| 14. | Ngasengisephula intonga yami yesibili ethiwa nguNhlanganiso ukuze kwaphuke ukuzalana kukaJuda loIsrayeli. |
| 15. | I Nkosi yasisithi kimi: Thatha futhi izikhali zomelusi oyisithutha. |
| 16. | Ngoba khangela, ngizabeka elizweni umelusi ongahambeli labo abaqunyiweyo, ongazidingiyo ezilahlekileyo, longazelaphiyo ezilimeleyo, longaziboneliyo eziphilayo, kodwa adle inyama yezinonileyo, adabule amasondo azo. |
| 17. | Maye kumelusi oyisithutha otshiya izimvu! Kungathi inkemba ingagwaza ingalo yakhe lelihlo lakhe lokunene. Ingalo yakhe kayitshwabhane, lelihlo lokunene lifiphale. |
| ← Zechariah (11/14) → |