| ← Psalms (92/150) → |
| 1. | Kuhle ukubonga i Nkosi, lokuhlabela indumiso ebizweni lakho, wena oPhezukonke; |
| 2. | ukutshumayela uthandolomusa lwakho ekuseni, lothembeko lwakho ebusuku bonke, |
| 3. | ngechacho elilentambo ezilitshumi, langogubhu lwezintambo, ngechacho elikhala kamnandi. |
| 4. | Ngoba ungithokozisile, Nkosi, ngomsebenzi wakho; ngizamemeza ngenjabulo ngemisebenzi yezandla zakho. |
| 5. | Mikhulu kangakanani imisebenzi yakho, Nkosi ! Izikile kakhulu imicabango yakho. |
| 6. | Isiphukuphuku kasazi, lesithutha kasikuqedisisi lokhu. |
| 7. | Lapho ababi behluma njengotshani, labo bonke abenzi bobubi bekhahlela, kuyi kuze babhujiswe kuze kube phakade. |
| 8. | Kodwa wena, Nkosi, uphakeme kuze kube nininini. |
| 9. | Ngoba khangela, izitha zakho, Nkosi, ngoba khangela, izitha zakho zizabhubha; bonke abenzi bobubi bazachitheka. |
| 10. | Kodwa uzaphakamisa uphondo lwami njengolwenyathi; ngizagcotshwa ngamafutha amatsha. |
| 11. | Lelihlo lami lizabukela izitha zami, indlebe zami zizakuzwa mayelana lababi abangivukelayo. |
| 12. | Olungileyo uzahluma njengesihlahla selala, akhule njengomsedari eLebhanoni. |
| 13. | Abahlanyelwe endlini ye Nkosi, bazahluma emagumeni kaNkulunkulu wethu. |
| 14. | Bazabe belokhu bethela izithelo ebudaleni babo, bakhuluphale babeluhlaza, |
| 15. | ukutshumayela ukuthi i Nkosi i qondile; ilidwala lami, njalo ka ku kho ukungalungi kiyo. |
| ← Psalms (92/150) → |