← Psalms (135/150) → |
1. | Dumisani i Nkosi ! Dumisani ibizo le Nkosi, dumisani lina zinceku ze Nkosi, |
2. | elimi endlini ye Nkosi, emagumeni endlu kaNkulunkulu wethu. |
3. | Dumisani i Nkosi, ngoba i Nkosi ilungile; hlabelelani indumiso ebizweni layo, ngoba kumnandi. |
4. | Ngoba i Nkosi izikhethele uJakobe, uIsrayeli abe ngokuligugu kwakhe okukhethekileyo. |
5. | Ngoba mina ngiyazi ukuthi i Nkosi yinkulu, ukuthi iNkosi yethu iphezu kwabo bonke onkulunkulu. |
6. | Konke i Nkosi ekuthandayo iyakwenza, emazulwini lemhlabeni, ezinlwandle lenzikini zonke. |
7. | Yenza izinkungu zenyuke emikhawulweni yomhlaba, yenzela izulu imibane, ikhupha umoya eziphaleni zayo. |
8. | Eyatshaya izibulo leGibhithe, kusukela emuntwini kuze kube senyamazaneni. |
9. | Yathumela izibonakaliso lezimangaliso phakathi kwakho, Gibhithe, phezu kukaFaro laphezu kwenceku zakhe zonke. |
10. | Eyatshaya izizwe ezinengi, yabulala amakhosi alamandla, |
11. | uSihoni inkosi yamaAmori, loOgi inkosi yeBashani, layo yonke imibuso yeKhanani, |
12. | yanikela ilizwe labo laba yilifa, ilifa likaIsrayeli, isizwe sayo. |
13. | Nkosi, ibizo lakho limi kuze kube phakade, ukukhunjulwa kwakho, Nkosi, kusizukulwana ngesizukulwana. |
14. | Ngoba i Nkosi izakwehlulela abantu bayo, izazisola mayelana lezinceku zayo. |
15. | Izithombe zezizwe ziyisiliva legolide, umsebenzi wezandla zomuntu. |
16. | Zilemilomo, kodwa kazikhulumi; zilamehlo, kodwa kaziboni; |
17. | zilendlebe, kodwa kazizwa; lomoya kawukho emlonyeni wazo. |
18. | Abazenzayo bafanana lazo, lawo wonke othembela kuzo. |
19. | Wena ndlu kaIsrayeli, busisani i Nkosi; wena ndlu kaAroni, busisani i Nkosi; |
20. | wena ndlu kaLevi, busisani i Nkosi. Lina eliyesabayo i Nkosi, busisani i Nkosi. |
21. | Kayibusiswe i Nkosi iseZiyoni, ehlala eJerusalema. Dumisani i Nkosi ! |
← Psalms (135/150) → |