| ← Micah (2/7) → |
| 1. | Maye kulabo abenza amacebo obubi, benze okubi emibhedeni yabo! Lapho sekusile bazakwenza, ngoba balamandla okukwenza. |
| 2. | Bahawukela amasimu, bawathathe ngodlakela, lezindlu bayazithatha; bathathela umuntu umuzi wakhe, bamthathele lelifa lakhe. |
| 3. | Ngakho-ke i Nkosi ithi: Khangela, ngenza amacebo amabi ngalesisizwe, elingayikukhupha intamo zenu kuwo; futhi kalisayikuhamba ngokuzikhukhumeza, ngoba kuzakuba yisikhathi esibi leso. |
| 4. | Ngalolosuku bazahlabela ingoma eyinhlekisa ngani, bakhale isililo esikhulu, bathi: Ilizwe labantu bakithi labiwe; kakho ongalibuyisa kithi; labo abasithumbileyo basithathele amasimu ethu; sichithekile isibili! |
| 5. | Ngenxa yalokhu kakuyikuba khona ozalenzela inkatho yokuphosa ngentambo ebandleni le Nkosi. |
| 6. | Abantu batshumayela bathi: Lingatshumayeli, lingatshumayeli ngalezizinto; ihlazo kaliyikusehlela. |
| 7. | Lithi ndlu kaJakobe baqalekisiwe yini? I Nkosi iyaphangisa ukuthukuthela yini? Lezi ziyizenzo zayo yini? Kawamsizi yini amazwi ayo ohamba ngobuqotho? |
| 8. | Kanti liyizitha zabantu bami, libahlubule izembatho zabo abathanda ukuthula, lalabo abadlulayo bevela empini, besithi bavikelekile. |
| 9. | Lixotshe abesifazana babantu bami ezindlini abazithandayo; ebantwaneni babo lisuse udumo lwami kokuphela. |
| 10. | Sukani lihambe, ngoba lapha kakusiyo indawo yokuphumula, ngenxa yokungcola okuletha ukuchitheka okukhulu. |
| 11. | Uba kuhambahamba umuntu okhuluma umoya lamanga esithi: Ngizaprofetha kini ngewayini lokunathwayo okulamandla; uzakuba ngumtshumayeli abamthandayo lababantu. |
| 12. | Ngizalibutha lonke, lina bakoJakobe, ngibuthe insali yakoIsrayeli, ngibabuthelele ndawonye njengezimvu esibayeni, njengomhlambi osedlelweni lawo, libe lixuku labantu ababanga umsindo. |
| 13. | Umkhokheli wabo uzabavulela indlela, bonke bazafohla, bafike esangweni, baphume ngalo. Inkosi yabo izahamba phambi kwabo, bekhokhelwa yiyo. |
| ← Micah (2/7) → |