← Job (21/42) → |
1. | Wasephendula uJobe wathi: |
2. | Zwanini lilalele ilizwi lami, lalokho kube zinduduzo zenu. |
3. | Ngibekezelelani, ukuthi mina ngikhulume; lemva kokukhuluma kwami lingakloloda. |
4. | Mina-ke ukusola kwami kusemuntwini yini? Kodwa uba kunjalo, kungani umoya wami ungekhathazeke? |
5. | Ngikhangelani, likhakhamale, libeke isandla phezu komlomo. |
6. | Yebo, lapho ngikhumbula, ngitshaywa luvalo, lokuthuthumela kubamba inyama yami. |
7. | Ababi baphilelani, babe badala, yebo, bakhule emandleni? |
8. | Inzalo yabo izinze phambi kwabo kanye labo, lezizukulu emehlweni abo. |
9. | Izindlu zabo zilokuthula kungelakwesaba, loswazi lukaNkulunkulu kaluphezu kwabo. |
10. | Inkunzi yakhe iyakhwela ingaphuthi; inkomokazi yakhe iyazala, ingaphunzi. |
11. | Bakhupha abantwanyana babo njengomhlambi, labantwana babo bayagida. |
12. | Baphakamisa ilizwi ngesigujana lechacho, bathokoze ngelizwi lomhlanga. |
13. | Bachitha insuku zabo ngokuhle, behlele engcwabeni ngokucwayiza kwelihlo. |
14. | Babesebesithi kuNkulunkulu: Suka kithi; ngoba kasifisi ulwazi lwendlela zakho. |
15. | Uyini uSomandla ukuthi simkhonze? Sizazuzani uba sikhuleka kuye? |
16. | Khangela, okuhle kwabo kakukho esandleni sabo; icebo lababi likhatshana lami. |
17. | Kukangaki isibane sababi sicitshwa, kusiza ukuchitheka kwabo phezu kwabo! UNkulunkulu ubabela ubuhlungu elakeni lwakhe. |
18. | Banjengamahlanga phambi komoya, lanjengomule isiphepho esiwebayo. |
19. | UNkulunkulu ubekela abantwana bakhe usizi lwakhe. Uyamvuza, njalo uzakwazi. |
20. | Amehlo akhe azabona ukuchitheka kwakhe, anathe okolaka lukaSomandla. |
21. | Ngoba iyini intokozo yakhe endlini yakhe emva kwakhe, lapho inani lenyanga zakhe liqunywa? |
22. | Kukhona ongafundisa uNkulunkulu ulwazi yini? Ngoba yena wehlulela abaphezulu. |
23. | Lo uyafa esemandleni akhe apheleleyo, yena wonke onwabile, elokuthula. |
24. | Iziphathelo zakhe zigcwele uchago, lomnkantsho wamathambo akhe umanzi. |
25. | Lomunye ufa elomphefumulo obabayo, engadlanga kokuhle. |
26. | Balala ndawonye ethulini, lempethu zibasibekele. |
27. | Khangelani, ngiyayazi imicabango yenu, lamacebo e liwaceba limelene lami. |
28. | Ngoba lithi: Ingaphi indlu yesiphathamandla? Njalo lingaphi ithente lendawo zababi zokuhlala? |
29. | Kalibabuzanga yini abadlula ngendlela, njalo kalinanzeleli iziboniso zabo? |
30. | Ukuthi omubi uyekelelwa usuku lokubhujiswa; bazalethwa osukwini lwezintukuthelo. |
31. | Ngubani ozamtshela indlela yakhe ebusweni? Ngubani ozamphindisela ngakwenzileyo? |
32. | Kanti yena uzasiwa engcwabeni, alinde elibeni. |
33. | Amagade esihotsha amnandi kuye, njalo udonsa wonke umuntu emva kwakhe, njengoba bengelakubalwa abaphambi kwakhe. |
34. | Pho lizangiduduza njani ngeze, ngoba empendulweni zenu kusele inkohliso? |
← Job (21/42) → |