← Jeremiah (48/52) → |
1. | Mayelana loMowabi. I Nkosi yamabandla, uNkulunkulu kaIsrayeli, ithi: Maye ngeNebo! ngoba ichithekile. IKiriyathayimi iyangekile, inqotshiwe; inqaba iyangekile, yadilika; |
2. | udumo lukaMowabi kalusekho. EHeshiboni baceba okubi ngayo, bathi: Wozani siyiqume, ingabe isaba yisizwe. Lani elihlala eMadimeni lizachitheka, baxotshane lani ngenkemba. |
3. | Zwanini, ilizwi lokukhala livela eHoronayimi lisithi: Ukuchithwa, lokutshabalala okukhulu! |
4. | IMowabi uchithekile; ukukhala kuzwakala kuze kufike eZowari. |
5. | Emadundulwini eLubithi bakhwela bekhala, lekwehleni ukuya eHoronayimi bazwile ukukhala kokuchitheka. |
6. | Balekani, lisindise umphefumulo wenu, libe njengobabhemi weganga enkangala. |
7. | Ngoba ngenxa yokuthi lathemba inqaba zenu lenotho yenu lani lizathunjwa; uKemoshi uzathunjwa kanye labapristi bakhe lezikhulu zakhe. |
8. | Umchithi uzafikela yonke imizi, kawukho lowodwa ozasala; isihotsha sizachitheka, lamagceke aqothulwe, njengokutsho kwe Nkosi. |
9. | Bekelani uMowabi ilitshe lengcwaba, ngoba uMowabi uzachitheka masinyane, imizi yakhe izakuba ngamanxiwa angelamuntu. |
10. | Uqalekisiwe lowo owenza umsebenzi we Nkosi ngokungananzeleli; uqalekisiwe lalowo ogodla inkemba yakhe ekuchitheni igazi. |
11. | UMowabi uchelesile kusukela ebutsheni bakhe, ubehlezi ezinzile; kathululelwanga embizeni ngembiza, kathunjwanga; ngakho ukunambitheka kwakhe kuhlala kunjalo, iphunga lakhe kaliphenduki. |
12. | Ngakho khangela, insuku ziyeza, kutsho i Nkosi, lapho ngizathuma kuye abathambeki abazamthambeka, bathulule imbiza zakhe, babulale inqayi zakhe. |
13. | Khona-ke uMowabi uzakuba lenhloni ngoKemoshi, njengalokho indlu kaIsrayeli yaba lenhloni ngeBhetheli, ithemba layo. |
14. | Lingatsho njani ukuthi: Singamaqhawe lamadoda empi alamandla? |
15. | Umchithi kaMowabi lemizi yakhe usefikile, lamajaha akhe akhethiweyo sehlele ekubulaweni, kutsho iNkosi eyi Nkosi yamabandla. |
16. | Ukuhlupheka kukaMowabi kusondele, lokutshaywa kwakhe kuyaphangisa. |
17. | Likhalelani, lina lonke elimzingelezeleyo, lani lonke elazi ibizo lakhe; lithi: Yeka ukwaphuka kwenduku elamandla, udondolo oluhle! |
18. | Yehla ebukhosini bakho, uhlale emhlabathini owomileyo, wena ohlala eDiboni. Ngoba umchithi kaMowabi usekufikele, wachitha inqaba zakho. |
19. | Mana endleleni, ulinde, wena ohlala eAroweri. Ubuze obalekayo lalowo ophunyukileyo uthi: Kwenze njani? |
20. | UMowabi uyangekile, ngoba uchithekile; lilani likhale; libike eArinoni ukuthi uMowabi uchithekile. |
21. | Isigwebo sehlele phezu kwelizwe elilamagceke, eHoloni leJahazi leMefahathi, |
22. | leDiboni leNebo leBeti-Dibilathayimi, |
23. | leKiriyathayimi, leBeti-Gamuli, leBeti-Meyoni, |
24. | leKeriyothi leBozira, lakuyo yonke imizi yelizwe lakoMowabi, eduze lakhatshana. |
25. | Uphondo lukaMowabi luqunyiwe, lengalo yakhe yephukile, kutsho i Nkosi. |
26. | Mdakiseni, ngoba ezikhukhumezile e Nkosi ni; uMowabi uzazibhixa emahlanzweni akhe, abe yinhlekisa. |
27. | UIsrayeli kabanga yinhlekisa kuwe yini? Watholakala phakathi kwamasela yini ukuthi lapho ukhuluma ngaye, unikine ikhanda lakho? |
28. | Tshiyani imizi, lihlale phakathi kwamadwala, lina elihlala koMowabi. Libe njengejuba elakha isidleke salo emaweni. |
29. | Sizwile ngokuzigqaja kukaMowabi; uyazigqaja kakhulu. Sizwile ngokuziphakamisa kwakhe, lokuziqakisa kwakhe, langokuzikhukhumeza kwakhe. |
30. | Ngiyakwazi ukudelela kwayo, kutsho i Nkosi; ukuzincoma kwayo kuyinkohliso, lezenzo zayo ziyinkohliso. |
31. | Ngalokho-ke ngiyalila ngoMowabi, ngikhale ngabo bonke abakoMowabi, ngililele abantu beKiri-Heresi. |
32. | Ngiyakukhalela inyembezi wena vini leSibima ukudlula iJazeri. Ingatsha zakho zedlula phezu kolwandle, zaze zafinyelela eJazeri. Umchithi wehlele phezu kwezithelo zakho zehlobo lemavinini akho avuniweyo. |
33. | Ukuthaba lentokozo kususiwe elizweni lakoMowabi elilenala enengi; ngiqedile iwayini ezikhamelweni; kakho osakhama izithelo zevini ngentokozo, lomsindo wentokozo kawusekho. |
34. | Ukukhala kweHeshiboni leEleyale kuzwakala kuze kube seJahazi. Ukukhala okukhulu kuzwakala eZowari kuze kufike eJoronayimi leEgilathi-Shelishiya; ngoba amanzi aseMimrimi lawo asesitsha. |
35. | Ngizaqeda koMowabi lowo onikela umhlatshelo endaweni ephakemeyo yokukhonzela, atshisele uNkulunkulu wakhe impepha, kutsho i Nkosi. |
36. | Ngakho-ke inhliziyo yami ikhalela uMowabi njengomhubhe, inhliziyo yami iyakhala njengomhubhe ngabantu beKiri-Heresi; inotho ababeyizuzile ichithekile. |
37. | Ngoba wonke amakhanda aphuciwe, lazo zonke indevu zigeliwe; izandla zonke zilamanxeba, bonke bavunule amalembu amasaka enkalweni. |
38. | Phezu kwazo zonke indlu zamaMowabi kanye lemagumeni akhona yikukhala kuphela; ngoba ngimbulele uMowabi njengembiza engananzwa muntu, kutsho i Nkosi. |
39. | Yeka ukufa kwayo! Yeka ukukhala kwayo! Yeka ukuphendula intamo kukaMowabi elenhloni! Ngakho uMowabi uphenduke waba yinhlekisa, lento eyesabekayo kibo bonke abaseduze laye. |
40. | Ngoba i Nkosi ithi: Khangela, ukhona ozaphapha njengokhozi, elulele impiko zakhe koMowabi. |
41. | Imizi izathunjwa, lezinqaba zithathwe, kuthi inhliziyo zamaqhawe koMowabi ngalolosuku zibe njengenhliziyo yowesifazana ohelelwayo. |
42. | UMowabi uzachithwa, angabe esaba yisizwe, ngoba wazikhukhumeza e Nkosi ni. |
43. | Ukwesaba lomgodi lomjibila kuphambi kwenu, lina elihlala koMowabi, kutsho i Nkosi. |
44. | Obalekela ukwesaba uzawela emgodini, lophuma emgodini uzabanjwa ngumjibila. Ngoba lezizinto ngizazehlisela koMowabi ngomnyaka wempindiselo yabo, kutsho i Nkosi. |
45. | Emthunzini weHeshiboni ababalekayo bayema bephelelwe ngamandla, ngoba umlilo uphumile eHeshiboni, lelangabi liphumile endlini kaSihoni, umlilo utshisile imingcele yakoMowabi, lezingqonga zabantu besiphithiphithi. |
46. | Maye kuwe, wena Mowabi! Abantu bakaKemoshi baphelile, ngoba amadodana akho athunjiwe, lamadodakazi akho asiwe ekuthunjweni. |
47. | Kodwa ngizabuyisa abantu bakoMowabi ensukwini ezizayo, kutsho i Nkosi. Siphela lapha isigwebo sakoMowabi. |
← Jeremiah (48/52) → |