| ← Jeremiah (44/52) → |
| 1. | Ilizwi elafika kuJeremiya ngawo wonke amaJuda ayehlala elizweni leGibhithe eMigidoli leTahafanesi, leMemfisi, laselizweni lePatrosi, |
| 2. | lathi: I Nkosi yamabandla, uNkulunkulu kaIsrayeli, ithi: Likubonile konke okubi engakwehlisela phezu kweJerusalema laphezu kwayo yonke imizi yakoJuda. Khangela, lamuhla iyinkangala, kakulamuntu ohlala khona, |
| 3. | ngenxa yobubi babo ababenzayo, bangivusa ulaka ngoba batshisa impepha, bakhonza abanye onkulunkulu abangabaziyo bona kanye lani laboyihlo. |
| 4. | Kanti ngathuma inceku zami zonke abaprofethi, ngivuke ngovivi ngathuma, ngisithi: Lingayenzi linto enengisayo lengiyizondayo. |
| 5. | Kodwa kabalalelanga kabezwanga, ukuthi baphenduke ebubini babo, bangatshiseli abanye onkulunkulu impepha. |
| 6. | Ngakho ulaka lwami lokuthukuthela kwami kwavutha emizini yonke yakoJuda lendleleni zeJerusalema; zaphenduka zaba yinkangala, zachitheka njengalamuhla nje. |
| 7. | Ngakho-ke i Nkosi, uNkulunkulu wamabandla. uNkulunkulu kaIsrayeli, ithi: Likwenzelani phezu kwenu lokhu okubi kangaka, ukuthi liqume basuke kini indoda lomfazi, usane lomntwana, baphele koJuda, kungasali muntu? |
| 8. | Kungani lingithukuthelisa ngezithombe zenu, litshisela abanye onkulunkulu impepha elizweni leGibhithe lapho eselihlala khona, ukuze libhujiswe, liphenduke into yokuthukwa leyokuhlekwa phakathi kwazo zonke izizwe zasemhlabeni? |
| 9. | Selakhohlwa yini ububi baboyihlo, lobubi bamakhosi akoJuda, lobubi babomkabo, lobenu ububi, lobubi babomkenu, elabenza elizweni lakoJuda lendleleni zeJerusalema? |
| 10. | Kalizithobanga kuze kube lamuhla, futhi kalesabanga, kalihambanga ngomlayo wami langezimiso zami engazibeka phambi kwenu laphambi kwaboyihlo. |
| 11. | Ngakho-ke i Nkosi yamabandla, uNkulunkulu kaIsrayeli, ithi: Khangela, ngizalenzela okubi ukuze ngiliqede elizweni lonke lakoJuda. |
| 12. | Ngizathatha abaseleyo koJuda abafise ukuzahlala elizweni leGibhithe, bazabhubha bonke, babulawe ngenkemba layindlala elizweni iGibhithe, baphele bonke abancinyane labakhulu, babe yinto eyenyanyekayo, into eyesabekayo, leyokuthukwa, leyokuhlekwa. |
| 13. | Ngizatshaya labo abahlezi elizweni leGibhithe, njengoba ngatshaya iJerusalema, ngenkemba langendlala langomatshayabhuqe wesifo, |
| 14. | ukuze kungabi khona loyedwa kwabaseleyo koJuda, abafikileyo ukuhlala elizweni leGibhithe, ozaphunyuka asile, abuyele elizweni lakoJuda abafisa ukubuyela kulo, bahlale khona; ngoba kabayikubuyela kuphela abaphunyukileyo. |
| 15. | Wonke amadoda ayesazi ukuthi omkabo batshisela abanye onkulunkulu impepha, labo bonke abesifazana ababekhona belibandla elikhulu, labo bonke abantu ababehlala ePatrosi elizweni leGibhithe, bamphendula uJeremiya bathi: |
| 16. | Ilizwi olikhulume kithi ebizweni le Nkosi kasiyikulilalela. |
| 17. | Kodwa sizakwenza konke esizimisele ukukwenza; sizatshisela indlovukazi yamazulu impepha, siyithululele iminikelo yokunathwayo, njengoba besisenza thina, labobaba, lamakhosi ethu, leziphathamandla zethu, emizini yakoJuda lendleleni zeJerusalema; ngoba sasilokudla okunengi, sihlezi kuhle singaboni okubi. |
| 18. | Kodwa lokhu sayekela ukutshisela indlovukazi yamazulu impepha lokuyithululela iminikelo yokunathwayo, siswele konke, siqedwe ngenkemba layindlala. |
| 19. | Abesifazana bona bathi: Lapho sasitshisela indlovukazi yamazulu impepha, siyithululela iminikelo yokunathwayo, kumbe siyenzela izinkwa ezilomfanekiso wayo, siyithululela iminikelo yokuthululwa, sakwenza lokho ngaphandle kwemvumo yabomkethu yini? |
| 20. | UJeremiya wasesithi kubo bonke abantu, amadoda labesifazana, bonke ababemphendule ngalawomazwi: |
| 21. | Impepha elayitshisa emizini yakoJuda lendleleni zeJerusalema, lina laboyihlo, lamakhosi enu, leziphathamandla zenu, labantu belizwe, i Nkosi kayikukhumbulanga yini? Kakungenanga engqondweni yayo yini? |
| 22. | I Nkosi yayingaselakuthwala okubi kwemisebenzi yenu lezinengiso elazenzayo; ngakho-ke ilizwe lenu lachitheka, laba yinkangala, laba yisiqalekiso, kakusekho okuhlala khona njengoba kunjalo lamuhla. |
| 23. | Kungenxa yokuthi litshisile impepha, lona e Nkosi ni, lingalilalelanga ilizwi layo, lingahambanga ngomlayo wayo langezimiso zayo langemithetho yayo, ngalokho okubi lokhu kwehlele phezu kwenu njengalamuhla nje. |
| 24. | UJeremiya wathi kubo bonke abantu lakwabesifazana bonke: Zwanini ilizwi le Nkosi, lina lonke bakoJuda eliselizweni leGibhithe. |
| 25. | Itsho njalo i Nkosi yamabandla, uNkulunkulu kaIsrayeli, ithi: Lina labomkenu likukhulumile ngemilomo yenu, lakugcwalisa ngezandla zenu, lisithi: Sizakwenza lokwenza izithembiso zethu esizithembisayo zokutshisela indlovukazi yamazulu impepha, lokuyithululela iminikelo yokunathwayo. Lizaqinisa lokuqinisa izithembiso zenu, lenze sibili izithembiso zenu! |
| 26. | Ngakho zwanini ilizwi le Nkosi, lonke Juda elihlala elizweni leGibhithe: Khangelani, mina ngifungile ngebizo lami elikhulu, kutsho i Nkosi, ukuthi isibili ibizo lami kalisayikubizwa ngumlomo waloba ngubani wakoJuda, elizweni lonke leGibhithe, esithi: Kuphila kweNkosi uJehova. |
| 27. | Khangela, ngilindele ukubenza okubi, kungeyisikho okuhle; bonke abakoJuda elizweni leGibhithe bazaqedwa ngenkemba layindlala, baze baphele bonke. |
| 28. | Labo abaphepha enkembeni bazabuyela elizweni lakoJuda bevela elizweni leGibhithe, bebalutshwana nje; labo bonke abaseleyo koJuda abeze elizweni leGibhithe ukuhlala khona, bazakwazi ukuthi ilizwi elizakuma ngelikabani, elami kumbe elabo. |
| 29. | Lokhu kuzakuba yisibonakaliso kini, kutsho i Nkosi, ukuthi ngizalitshaya kulindawo, ukuze lazi ukuthi amazwi ami engiwakhuluma ngani azakuma isibili. |
| 30. | I Nkosi ithi: Khangelani, ngizanikela uFaro Hofra inkosi yeGibhithe ezandleni zezitha zakhe, lezandleni zalabo abamzingelayo, njengoba nganikela uZedekhiya inkosi yakoJuda esandleni sikaNebukadinezari inkosi yeBhabhiloni, owayeyisitha sakhe emzingela. |
| ← Jeremiah (44/52) → |