← Jeremiah (38/52) → |
1. | UShefathiya indodana kaMathani, loGedaliya indodana kaPashuri, loJukali indodana kaShelemiya, loPashuri indodana kaMalikiya, bawezwa amazwi uJeremiya ayewakhuluma kubo bonke abantu esithi: |
2. | I Nkosi ithi: Osala kulumuzi uzabulawa ngenkemba langendlala langomatshayabhuqe wesifo; kodwa ophuma aye kumaKhaladiya uzasila, aphunyuke. |
3. | I Nkosi ithi: Lumuzi uzanikelwa isibili esandleni sebutho lenkosi yeBhabhiloni, uthunjwe. |
4. | Iziphathamandla zasezisithi enkosini: Kabulawe lumuntu, ngoba wenza amabutho asele kulumuzi abe buthakathaka, kanye labantu bonke, ngokukhuluma kibo amazwi anje. Ngoba lumuntu kaphisekeli okuhle kwalababantu, kodwa uphisekela okubi. |
5. | Inkosi uZedekhiya yathi: Khangela, usezandleni zenu, ngoba inkosi kayilamandla okwenza ulutho oluphambene lani. |
6. | Basebemthatha uJeremiya, bamphosela emgodini kaMalikiya indodana yenkosi, owawusegumeni labalindi, bamehlisela phakathi ngamagoda. Umgodi wawungelamanzi, kodwa wawugcwele udaka. UJeremiya watshona odakeni. |
7. | Kwathi uEbedimeleki umEtiyopiya umthenwa, owayesebenza esigodlweni. esizwa ukuthi bamphosele emgodini uJeremiya, inkosi yayihlezi ithetha amacala eSangweni lakoBhenjamini, |
8. | uEbedimeleki waphuma esigodlweni waya enkosini, |
9. | wathi: Nkosi yami, abantu laba benzile okubi ngakho konke abakwenze kuJeremiya umprofethi, ngoba bamphosele emgodini, uzabulawa yindlala ngoba kakusekho ukudla emzini. |
10. | Ngakho inkosi yasimlaya uEbedimeleki umEtiyopiya, yathi: Thatha lapha abantu abathathu, limkhuphe uJeremiya umprofethi emgodini engakafi. |
11. | Ngakho uEbedimeleki wathatha abantu, waya esigodlweni, endaweni lapho okulondolozwa khona izigqoko, wathatha khona izembatho ezindala lezigqoko ezidabukileyo, wazehlisela emgodini kuJeremiya ngamagoda. |
12. | UEbedimeleki umEtiyopiya wathi kuJeremiya: Faka izembatho lezi lezigqoko emakhwapheni akho ngaphansi kwamagoda. UJeremiya wenza njalo. |
13. | Basebemdonsa uJeremiya ngamagoda, bamkhupha emgodini. UJeremiya wahlala egumeni labalindi. |
14. | Inkosi uZedekhiya wambiza uJeremiya umprofethi, wamemukela esangweni lesithathu lethempeli lenkosi. Yathi kuJeremiya: Ngizakubuza umbuzo, ungangifihleli lutho. |
15. | UJeremiya wathi enkosini: Uba ngikutshela, kawuyikungibulala yini? Loba ngikweluleka, kawuyikungilalela. |
16. | Inkosi uZedekhiya yasifunga ekusithekeni kuJeremiya yathi: Kuphila kukaJehova owenza imimoya yethu, kangiyikukubulala, futhi kangiyikukunikela ezandleni zabantu laba abadinga ukukubulala. |
17. | UJeremiya wasesithi kuZedekhiya: I Nkosi, uNkulunkulu wamabandla, uNkulunkulu kaIsrayeli, ithi: Uba uzinikela kuzo iziphathamandla zenkosi yeBhabhiloni uzasila, lalumuzi kawuyikutshiswa ngomlilo, uzasila wena lendlu yakho. |
18. | Kodwa uba ungazinikeli ezikhulwini zeBhabhiloni, lumuzi uzathunjwa ngamaKhaladiya, awutshise ngomlilo, lawe kawuyikuphunyuka ezandleni zawo. |
19. | Inkosi uZedekhiya yathi kuJeremiya: Ngiyawesaba amaJuda abalekele kumaKhaladiya, hlezi nginikelwe ezandleni zawo, adlale ngami. |
20. | UJeremiya wathi: Kawuyikunikelwa kuwo; lalela ilizwi le Nkosi ngalokho engikutsho kuwe, kuzakulungela, futhi uzasila. |
21. | Kodwa uba usala ukuzinikela, nanti ilizwi i Nkosi engibonise lona lokuthi: |
22. | Khangela-ke, bonke abesifazana abasele endlini yenkosi yakoJuda bazakhitshelwa ezikhulwini zenkosi yeBhabhiloni, bathi: Abangane bakho abathembekileyo bakukhohlisile, bakwehlula; kodwa lapho inyawo zakho sezitshone odakeni, bazakubalekela. |
23. | Abafazi bakho bonke lamadodana akho bazakhitshelwa kumaKhaladiya, lawe kawuyikuphunyuka ezandleni zawo, kodwa uzabanjwa yinkosi yeBhabhiloni, lalumuzi utshiswe ngomlilo. |
24. | UZedekhiya wasesithi kuJeremiya: Kakungabi khona umuntu owaziyo lamazwi hlezi ubulawe. |
25. | Nxa iziphathamandla zisizwa ukuthi ngikhulume lawe, zize kuwe zithi: Ake usitshele ukuthi ubusithini enkosini, lokuthi inkosi itheni kuwe; ungasifihleli lutho, kasiyikukubulala; |
26. | uzakuthi kuzo: Bengincenga inkosi ukuthi ingangibuyiseli endlini kaJonathani ukuze ngifele khona. |
27. | Zasezifika zonke iziphathamandla kuJeremiya, zambuza; yena waziphendula njengokutsho kwenkosi kuye. Zasezithula ukukhuluma laye, zasuka kuye, ngoba udaba lwalungezwakali. |
28. | UJeremiya wahlala egumeni labalindi kwaze kwaba lusuku lokuthunjwa kweJerusalema. |
← Jeremiah (38/52) → |