← Jeremiah (34/52) → |
1. | Ilizwi le Nkosi elafika kuJeremiya, lapho uNebukadinezari inkosi yeBhabhiloni lebutho lakhe lonke, lemibuso yonke yomhlaba eyayibuswa nguye, labo bonke abantu bakhe, babesilwa bemelene leJerusalema layo yonke imizi yayo, |
2. | lathi: I Nkosi, uNkulunkulu kaIsrayeli, ithi: Hamba uyekuthi kuZedekhiya inkosi yakoJuda: I Nkosi ithi: Khangela, ngizanikela lumuzi esandleni senkosi yaseBhabhiloni, izawutshisa ngomlilo. |
3. | Kawuyikuphunyuka esandleni sayo, kodwa uzabanjwa isibili, unikelwe ezandleni zayo; uzabonana lenkosi yeBhabhiloni, likhulumisane; futhi uzakuya eBhabhiloni. |
4. | Zwana ilizwi le Nkosi, wena Zedekhiya, nkosi yakoJuda. I Nkosi ithi ngawe: Kawuyikufa ngenkemba. |
5. | Kodwa uzakufa ngokuthula. Njengoba impepha yatshiselwa oyihlo, amakhosi ayephambi kwakho, ngokunjalo abantu bazakutshisela lawe impepha, bakulilele lawe, bathi: Maye ngenkosi! Ngoba ngilitshilo lelolizwi, kutsho i Nkosi. |
6. | UJeremiya umprofethi wasewakhuluma wonke lamazwi kuZedekhiya inkosi yakoJuda eJerusalema, |
7. | lapho ibutho lenkosi yeBhabhiloni lisilwa limelene leJerusalema layo yonke imizi yakoJuda eyayisisele, iLakishi leAzeka: ngoba yiyo imizi ebiyelweyo eyakoJuda eyayisisele. |
8. | Ilizwi elafika kuJeremiya livela e Nkosi ni, emva kokuthi uZedekhiya inkosi esenzile isivumelwano labo bonke abantu eJerusalema ukubamemezela ukukhululeka, |
9. | ukuthi wonke umuntu akhulule isigqili sakhe, laye wonke umuntu isigqilikazi sakhe, umHebheru kumbe umHebherukazi, ukuze kungabi khona umuntu owenza umfowabo umHebheru abe yisigqili. |
10. | Bonke balalela, iziphathamandla zonke labantu bonke abenze lesosivumelwano sokuthi wonke umuntu akhulule isigqili sakhe lesigqilikazi sakhe ukuze zihambe, zingaphindi zenziwe zibe yizigqili futhi; balalela, bazikhulula. |
11. | Kodwa emva kwalokho baphenduka, bazibuyisa izigqili lezigqilikazi zabo ababezikhulule, babuya bazehlisela phansi zaba yizigqili lezigqilikazi. |
12. | Ilizwi le Nkosi lafika kuJeremiya lisithi: |
13. | I Nkosi, uNkulunkulu kaIsrayeli, ithi: Mina ngenze isivumelwano laboyihlo mhla ngibakhupha elizweni leGibhithe, endaweni yobugqili, ngathi: |
14. | Ekupheleni kweminyaka eyisikhombisa lonke lizakhulula izihlobo zenu amaHebheru ezithengiswe kini, zalisebenzela iminyaka eyisithupha, lizikhulule ekulisebenzeleni kwazo. Kodwa oyihlo kabangilalelanga, kabangizwanga. |
15. | Lina-ke seliphendukile lamuhla, lenza okulungileyo emehlweni ami, lamemezela ukukhululeka kubomakhelwane benu, lenza isivumelwano phambi kwami endlini lapho ibizo lami elidunyiselwa khona; |
16. | kodwa-ke seliphendukile futhi, lalingcolisa ibizo lami lapho ngulowo lalowo wenu ebuyisa isigqili sakhe lesigqilikazi sakhe ebelizikhululile njengokufisa kwazo, lazehlisela phansi, zaba yizigqili lezigqilikazi zenu. |
17. | Ngakho-ke kutsho i Nkosi: Kalingilalelanga, kalimemezelanga inkululeko, kube ngulowo lalowo kumhlobo wakhe lakumakhelwane wakhe; khangelani, sengizavumela inkemba lomatshayabhuqe wesifo lendlala ukuze kulehlele. Ngizalenza libe yinto eyesabekayo kuyo yonke imibuso yomhlaba. |
18. | Abantu abaseqileyo isivumelwano sami, abangagcinanga amazwi esivumelwano ababesenze phambi kwami, ngizabenza babe njengethole lesivumelwano abalidabula kabili, badlula phakathi kwalo, |
19. | ngitsho iziphathamandla zakoJuda leziphathamandla zeJerusalema, abathenwa labapristi, labo bonke abantu belizwe abadabula phakathi kwenhlangothi zethole. |
20. | Ngizabanikela ezandleni zezitha zabo lezandleni zalabo abadinga ukubabulala. Izidumbu zabo zizakuba yikudla kwenyoni zamazulu lenyamazana zeganga. |
21. | LoZedekhiya inkosi yakoJuda leziphathamandla zakhe ngizabanikela ezandleni zezitha zabo, lezandleni zalabo abadinga ukubabulala, lesandleni sebutho lenkosi yeBhabhiloni esisukile kini. |
22. | Khangelani, ngizalaya, kutsho i Nkosi, ngibabuyise kulumuzi; bazakulwa bemelene lawo, bawuthumbe, bawutshise ngomlilo, ngichithe imizi yakoJuda ibe yinkangala engelamuntu. |
← Jeremiah (34/52) → |