← Jeremiah (27/52) → |
1. | Ekuqaleni kokubusa kukaZedekhiya indodana kaJosiya, inkosi yakoJuda, lelilizwi lafika kuJeremiya livela e Nkosi ni lathi: |
2. | I Nkosi ithi kimi: Zenzele imichilo lamajogwe, ukugaxe entanyeni yakho. |
3. | Thumela ilizwi enkosini yeEdoma leyakoMowabi leyeAmoni leyeTire leyeSidoni, ngezithunywa ezifika eJerusalema zisiza kuZedekhiya, inkosi yakoJuda, |
4. | uzilaye ukuthi zithi emakhosini azo: I Nkosi yamabandla, uNkulunkulu kaIsrayeli, ithi: Lizawatshela lokhu amakhosi enu, |
5. | lithi: Kuyimi ngamandla ami amakhulu langengalo yami elamandla engenze umhlaba, labantu, lenyamazana ezikhona emhlabeni, ngiwunika lowo engimbona ukuthi ufanele. |
6. | Sengiwanikele wonke lamazwe kuNebukadinezari inkosi yeBhabhiloni, inceku yami, ngimnikile futhi inyamazana zeganga ukuze zimsebenzele. |
7. | Zonke izizwe zizamsebenzela yena lendodana yakhe, lomzukulu wakhe, kuze kufike isikhathi sokuchithwa kwelizwe lakhe; kuzakuthi izizwe ezinengi lamakhosi amakhulu bamenze isigqili. |
8. | Kodwa uba isizwe kumbe umbuso ungamsebenzeli uNebukadinezari inkosi yeBhabhiloni, uthobele ijogwe lenkosi yeBhabhiloni, ngizatshaya lesosizwe ngenkemba langendlala langomatshayabhuqe wesifo, ngize ngisinikele esandleni sakhe ngokupheleleyo, kutsho i Nkosi. |
9. | Ngakho-ke lingabalaleli abaprofethi benu, labavumisi benu, labaphuphi benu, labachasisa ngemibono benu, labathakathi benu abathi kini: Kaliyikuyisebenzela inkosi yeBhabhiloni. |
10. | Ngoba baprofetha amanga kini, ukuze lisuswe elizweni lakini, ngilixotshe kilo, libhubhe. |
11. | Kodwa isizwe esizathobela inkosi yeBhabhiloni, siyisebenzele, ngizasiyekela elizweni laso, ukuze sililime, sakhe kulo, kutsho i Nkosi. |
12. | Ngakhuluma kuZedekhiya inkosi yakoJuda ngalawomazwi ngathi: Thobelani ijogwe lenkosi yeBhabhiloni, liyisebenzele labantu bayo, ukuze lisile. |
13. | Lizafelani, wena labantu bakho ngenkemba langendlala langomatshayabhuqe wesifo, njengokutsho kwe Nkosi mayelana lesizwe esingayikuyisebenzela inkosi yeBhabhiloni? |
14. | Ungawalaleli amazwi abaprofethi abathi kuwe: Kaliyikuyisebenzela inkosi yeBhabhiloni; ngoba baliprofetha amanga. |
15. | Kangibathumanga mina, kutsho i Nkosi, kodwa baprofetha amanga ngebizo lami, ukuze ngilixotshe, libhubhe wena kanye lalabo abaprofethi abaliprofethayo. |
16. | Ngasengikhuluma kubapristi lakubo bonke abantu ngisithi: I Nkosi ithi: Lingawalaleli amazwi abaprofethi benu abaliprofetha besithi: Khangelani, izitsha zethempeli zizabuyiswa masinyane zivela eBhabhiloni; ngoba lokhu kungamanga abaliprofethayo. |
17. | Lingabalaleli; sebenzelani inkosi yeBhabhiloni ukuze lisile. Uzachithelwani lumuzi? |
18. | Uba bengabaprofethi, belalo ilizwi le Nkosi, kabayincenge i Nkosi yamabandla, ukuthi izitsha eziseleyo ethempelini, lesigodlweni senkosi yakoJuda, leJerusalema, zingasiwa eBhabhiloni. |
19. | Ngoba i Nkosi yamabandla ithi ngezinsika, langolwandle, langezinyawo, langezinye izitsha zethempeli eziseleyo kulumuzi, |
20. | angazithathanga uNebukadinezari inkosi yeBhabhiloni ekuthumbeni kwakhe eJerusalema uJekoniya indodana kaJehoyakhimi, inkosi yakoJuda, lazo zonke iziphathamandla zakoJuda lezeJerusalema, ebasa eBhabhiloni. |
21. | I Nkosi yamabandla, uNkulunkulu kaIsrayeli, ithi mayelana lezitsha eziseleyo ethempelini, lesigodlweni senkosi yakoJuda, leJerusalema: |
22. | Zizasiwa eBhabhiloni, zihlale khona kuze kufike usuku lokuzihambela kwami, kutsho i Nkosi. Khona ngizazibuyisa kulindawo. |
← Jeremiah (27/52) → |