← Jeremiah (25/52) → |
1. | Ilizwi elafika kuJeremiya ngabantu bonke bakoJuda, emnyakeni wesine kaJehoyakhimi indodana kaJosiya, inkosi yakoJuda, ngomnyaka wokuqala kaNebukadinezari, inkosi yeBhabhiloni. |
2. | Ilizwi alikhulumayo uJeremiya umprofethi kubo bonke abantu bakoJuda labo bonke abakhileyo eJerusalema esithi: |
3. | Sekuyiminyaka engamatshumi amabili lantathu, kusukela emnyakeni wetshumi lantathu wokubusa kukaJosiya indodana kaAmoni, inkosi yakoJuda, kuze kube lamuhla, ilizwi le Nkosi lifikile kimi, ngalikhuluma kini ngivuke ngovivi ngikhuluma, kodwa kalilalelanga. |
4. | Kalilalelanga, kalizwanga lanxa i Nkosi iphikelela ukuthuma kini zonke inceku zayo abaprofethi, ivuka ngovivi, ithuma |
5. | lapho kuthiwa: Phendukani, lina lonke, endleleni zenu ezimbi lekwenzeni kwenu okubi, lihlale elizweni i Nkosi elinike lona lina laboyihlo kusukela endulo kuze kube nininini, |
6. | lingalandeli abanye onkulunkulu ukubasebenzela lokubakhonza, ukuze lingivuse ulaka ngezithombe elizenzileyo. Kangiyikulenzela okubi. |
7. | Kodwa kalingilalelanga, kutsho i Nkosi, ukuthi lingivuse ulaka ngezithombe zenu, ukuthi lehlelwe ngokubi. |
8. | Ngakho i Nkosi yamabandla ithi: Ngenxa yokuthi lingawalalelanga amazwi ami, |
9. | khangela, ngizabiza izizwe zenyakatho, kutsho i Nkosi, loNebukadinezari inkosi yeBhabhiloni inceku yami, ngizilethe kulelilizwe lakwabakhileyo kulo, lakuzo zonke izizwe eziseduze lalo, ngibatshabalalise, ngibenze babe yinto eyesabekayo, into yokuncifelwa, lehlazo elilaphakade. |
10. | Ngizaqeda phakathi kwabo umsindo wentokozo lowenjabulo, lelizwi lomyeni lelomakoti, lomsindo wokuchola kwelitshe, lokukhanya kwesibane. |
11. | Ilizwe lonke leli lizakuba ngamanxiwa lenkangala; lezizizwe zizasebenzela i Nkosi yeBhabhiloni iminyaka engamatshumi ayisikhombisa. |
12. | Emva kweminyaka engamatshumi ayisikhombisa ngizatshaya inkosi yeBhabhiloni lesizwe sayo, ngenxa yobubi babo, kutsho i Nkosi, ngilenze ilizwe lamaKhaladiya libe yinkangala kokuphela, |
13. | ngehlisele phezu kwalelolizwe amazwi wonke engawakhuluma ngalo, lakho konke okubhaliweyo kulolugwalo okwaprofethwa nguJeremiya ngazo zonke izizwe. |
14. | Ngoba izizwe ezinengi lamakhosi amakhulu zizabenza babe yizigqili; ngizaphindisela kibo njengokufanele izenzo zabo lemisebenzi yabo. |
15. | I Nkosi, uNkulunkulu kaIsrayeli, yathi kimi: Yemukela esandleni sami linkezo yewayini egcwele ulaka lwami, unathise ngayo zonke izizwe engikuthuma kuzo. |
16. | Zizanatha zidakwe, zihlanye ngenxa yenkemba engiyithuma phakathi kwazo. |
17. | Ngasengiyemukela inkezo esandleni se Nkosi, nganathisa ngayo zonke izizwe i Nkosi engithume kizo, |
18. | ngitsho iJerusalema lemizi yakoJuda, amakhosi ayo leziphathamandla zayo, ukuze kuchitheke, kube yinkangala, lento yokuncifelwa leyokuthukwa, njengoba kunjalo lalamuhla; |
19. | loFaro inkosi yeGibhithe, lenceku zakhe, leziphathamandla zakhe, labantu bakhe bonke, |
20. | kanye labo bonke abezizwe abaphakathi kwabo, lamakhosi wonke elizweni leUzi, lawelizwe leFilisti leAshikeloni leGaza leEkhironi lensali eAshidodi, |
21. | iEdoma loMowabi, lamaAmoni, |
22. | wonke amakhosi eTire laweSidoni, lamakhosi ezihlenge, ezingaphetsheya kolwandle, |
23. | eDedani leTema leBuzi, labo bonke abagela inwele zabo emaceleni, |
24. | lamakhosi wonke eArabhiya, lamakhosi ezizwe ezixubeneyo ezihlala enkangala, |
25. | lamakhosi wonke eZimri, laweElamu laweMede, |
26. | lawo wonke amakhosi enyakatho akhatshana leduze ngokulandelana, lemibuso yonke yomhlaba ekhona emhlabeni. Emva kwabo inkosi yeBhabhiloni izanatha. |
27. | Ubususithi kibo: I Nkosi yamabandla, uNkulunkulu kaIsrayeli, ithi: Nathani lidakwe, lihlanze, liwe, lingaphindi livuke futhi, ngenxa yenkemba engiyithuma phakathi kwenu. |
28. | Kuzakuthi lapho besala ukuyemukela inkezo esandleni sakho, ukuze banathe, uthi kibo: I Nkosi yamabandla ithi: Limele ukunatha isibili. |
29. | Ngoba khangela, sengiqalile ukwenza okubi emzini lapho ibizo lami elidunyiselwa khona; lizayekelwa ukutshaywa yini? Hatshi, kaliyikuyekelwa, ngoba ngibiza inkemba ezabehlela bonke abakhileyo emhlabeni, kutsho i Nkosi. |
30. | Ngakho-ke wena uzaprofetha kibo wonke lamazwi engikutshela wona, uthi: I Nkosi izaduma iphezulu, iliphumise ilizwi layo endlini yayo engcwele; izaduma kakhulu phezu kwesibaya sayo, imemeze njengalabo abakhama izithelo zevini kubo bonke abakhileyo emhlabeni. |
31. | Umsindo uzafinyelela emikhawulweni yomhlaba, ngoba i Nkosi iyamelana lezizwe, iyahlulela yonke inyama, ababi izabanikela ekubulaweni, kutsho i Nkosi. |
32. | I Nkosi yamabandla ithi: Khangelani, ububi buphuma kwesinye isizwe busiya kwesinye, isiphepho esikhulu siyavunguza, sisuka endaweni ezikhatshana zomhlaba. |
33. | Ngalolosuku ababulewe yi Nkosi bazasukela komunye umkhawulo womhlaba baze bafike komunye; kabayikukhalelwa, kabayikubuthwa bangcwatshwe, bazakuba ngamalongwe emhlabathini. |
34. | Lilani, lina belusi, likhale, zibhuqeni emlotheni, lina ziphathamandla zomhlambi, ngoba insuku zokuhlatshwa kwenu lezokuhlakazeka sezifikile, lizakuwa njengenqama ezinhle. |
35. | Abelusi kabayikuba lesiphephelo, leziphathamandla zomhlambi kaziyikuphunyuka. |
36. | Zwanini ukukhala kwabelusi lokulila kweziphathamandla zomhlambi: ngoba i Nkosi izachitha idlelo labo, |
37. | lezibaya ezilokuthula zidilikile, ngenxa yokuvutha kolaka lwe Nkosi. |
38. | Iphumile esikhundleni sayo njengebhongo esilwane, ngoba ilizwe labo seliyinkangala ngenxa yabachithi, langenxa yolaka lwayo oluvuthayo. |
← Jeremiah (25/52) → |