← Jeremiah (21/52) → |
1. | Yileli ilizwi le Nkosi elafika kuJeremiya mhla inkosi uZedekhiya ethuma kuye uPashuri indodana kaMalikiya, loZefaniya umpristi, indodana kaMahaseya isithi: |
2. | Ake usibuzele e Nkosi ni, ngoba uNebukadinezari inkosi yeBhabhiloni uyasihlasela; mhlawumbe i Nkosi ingasenzela njengazo zonke izimangaliso zayo, imenze asuke kithi. |
3. | UJeremiya wathi kubo: |
4. | Lizakuthi kuZedekhiya: I Nkosi, uNkulunkulu kaIsrayeli, ithi: Khangela, ngizabuyisa izikhali zempi oziphetheyo, olwa ngazo umelene lenkosi yeBhabhiloni lamaKhaladiya abakuvimbezeleyo ngaphandle kwemiduli, ngizilethe phakathi kwalumuzi. |
5. | Mina uqobo ngizakulwa ngimelene lawe ngesandla esilamandla langengalo elamandla, ngilokuthukuthela lokufutheka lolaka oluvuthayo. |
6. | Ngizatshaya abakhileyo balumuzi, abantu lezifuyo; bazabulawa ngomatshayabhuqe wesifo onzima. |
7. | Kuthi emva kwalokho, kutsho i Nkosi, nginikele uZedekhiya inkosi yakoJuda, lenceku zakhe, labantu balumuzi abasilileyo kumatshayabhuqe wesifo, lenkembeni, lendlaleni, esandleni sikaNebukadinezari inkosi yeBhabhiloni, lezandleni zezitha zabo, ezandleni zalabo ababazingelayo. Uzabatshaya ngobukhali benkemba; kayikuba lasihawu, kayikubahawukela, kayikuba lamusa kibo. |
8. | Kulababantu lizakuthi: I Nkosi ithi: Khangelani, ngibeka phambi kwenu indlela yokuphila lendlela yokufa. |
9. | Osala kulumuzi uzabulawa ngenkemba langendlala langomatshayabhuqe wesifo; kodwa ophumayo azinikele kumaKhaladiya alivimbezeleyo uzaphila, aphunyuke lempilo yakhe. |
10. | Ngoba ngiwukhangele lumuzi ukuze ngiwenzele okubi, ngingawenzeli okuhle, kutsho i Nkosi; uzanikelwa esandleni senkosi yeBhabhiloni ezawutshisa ngomlilo. |
11. | Kuyo indlu yenkosi yakoJuda lithi: Zwana ilizwi le Nkosi, |
12. | ndlu kaDavida. I Nkosi ithi: Yenzani okulungileyo ekuseni, likhulule esandleni socindezelayo lowo ophangiweyo, hlezi ulaka lwami luvuthe njengomlilo, lutshise, kungabi khona olucitshayo, ngenxa yezenzo zenu ezimbi. |
13. | Khangelani, ngilwa lani, lina abakhileyo esigodini abanjengedwala emagcekeni, kutsho i Nkosi, lina elithi: Ngubani ozasehlela, angene emizini yethu? |
14. | Ngizalitshaya ngokufanele izenzo zenu, kutsho i Nkosi; ngizaphemba umlilo ehlathini ozatshisa konke okuseduze lalo. |
← Jeremiah (21/52) → |