← Jeremiah (20/52) → |
1. | Kwathi uPashuri umpristi, indodana kaImeri, owayeyinduna enkulu ethempelini, wamuzwa uJeremiya eprofetha lezizinto. |
2. | UPashuri wamtshaya uJeremiya umprofethi, wamfaka esitokisini esisesangweni lakoBhenjamini elingaphezulu, ekungeneni kwethempeli. |
3. | Kwathi kusasa, lapho uPashuri esemkhuphe esitokisini uJeremiya, uJeremiya wathi kuye: I Nkosi kayisakubizi ngokuthi unguPashuri, kodwa ngokuthi uyiKwesabeka okunhlangothi zonke. |
4. | Ngoba i Nkosi ithi: Khangela, ngizakwenza ukuthi ube yinto eyesabekayo kuwe uqobo lakubo bonke abangane bakho. Bazabulawa ngenkemba yezitha zabo, ukhona wena ukhangele. Ngizanikela bonke abakoJuda esandleni senkosi yeBhabhiloni, ibathumbe, ibase eBhabhiloni, ibatshaye ngenkemba. |
5. | Futhi ngizanikela yonke imfuyo yalumuzi, layo yonke inzuzo yawo, lakho konke okwawo okuligugu, kanye lenotho yonke yamakhosi akoJuda, ezandleni zezitha zabo ezizabaphanga, zibathumbe zibase eBhabhiloni. |
6. | Wena-ke Pashuri, labo bonke abahlala endlini yakho, lizathunjwa, liye eBhabhiloni; lizafela khona, lingcwatshelwe khona, wena labangane bakho bonke, oprofethe kibo amanga. |
7. | Nkosi, wangiyenga, ngayengeka. Ulamandla kulami, ungehlulile, sengiyinhlekisa insuku zonke, bonke bayangihleka. |
8. | Ngoba lapho ngikhuluma, ngiyakhala, ngimemeze ngithi: Okubi lokuchitheka! Ilizwi le Nkosi selingilethele ihlazo lokuhlekwa usuku lonke. |
9. | Uba ngisithi: Kangisayikuyiphatha, kangisayikukhuluma ngebizo layo; kuba khona enhliziyweni yami lokho okungathi ngumlilo ovuthayo, ovalelwe emathanjeni ami; sengikhathele ukubekezela, sengehlulekile. |
10. | Ngiyezwa abanengi benyeyeza besithi: Kukhona ukwesabeka inhlangothi zonke! Bathi: Mmangalele! Asimmangaleleni! kutsho bonke abangane bami engibejwayeleyo, beqaphele ukuwa kwami. Bathi: Mhlawumbe angakhohliseka; khona sizamehlula, siphindisele kuye. |
11. | Kodwa i Nkosi ilami njengeqhawe elesabekayo; ngakho-ke abangizingelayo bazakhubeka, kabayikungehlula; bazayangeka kakhulu, ngoba kabayikuphumelela. Lehlazo labo elilaphakade kaliyikukhohlakala. |
12. | Wena Nkosi yamabandla, ohlolayo olungileyo, obona inhliziyo lengqondo, ake ngibone impindiselo yakho kibo, ngoba kuwe nginikele udaba lwami. |
13. | Hlabelani e Nkosi ni, liyidumise i Nkosi. Ngoba ikhulule oswelayo ezandleni zababi. |
14. | Kaluqalekiswe usuku engazalwa ngalo. Usuku umama angizala ngalo kalungabusiswa. |
15. | Kaqalekiswe lowomuntu owatshela ubaba ukuthi: Uzalelwe umfana; wamenza wathokoza. |
16. | Lowomuntu kabe njengemizi i Nkosi eyayichitha ingelasihawu; kezwe ukukhala ekuseni, lomkhosi emini, |
17. | ngoba engangibulalelanga esiswini, lomama waba lingcwaba lami, wakhulelwa kokuphela. |
18. | Ngaphumelani esiswini ukuthi ngibone uhlupho losizi, ngiqede insuku zami ngisehlazweni? |
← Jeremiah (20/52) → |