← Jeremiah (19/52) → |
1. | I Nkosi yathi: Hamba uyethenga inqayi; uthathe abanye abadala babantu labanye abapristi abadala, |
2. | uye esihotsheni sendodana kaHinomu eSangweni leziNdengezi, utshumayele khona amazwi engikutshela wona. |
3. | Uzakuthi: Zwanini ilizwi le Nkosi, lina makhosi akoJuda labakhileyo eJerusalema. I Nkosi yamabandla, uNkulunkulu kaIsrayeli, ithi: Khangelani, ngizaletha okubi okukhulu kulindawo, kuthi labo bonke abakuzwayo kubabande indlebe. |
4. | Ngoba abantu bangitshiyile, bayingcolisa lindawo ngokutshisela kiyo impepha kwabanye onkulunkulu abangabaziyo bona laboyise kanye lamakhosi akoJuda; futhi bayigcwalisa lindawo ngegazi labangelacala, |
5. | bakha izindawo eziphakemeyo zikaBhali ukutshisa amadodana abo ngomlilo abe ngumnikelo wokutshiswa kuBhali, into engingabalayanga yona ngayitsho, lengafikanga engqondweni yami. |
6. | Ngakho khangela, insuku ziyeza, kutsho i Nkosi, lapho lindawo ingasayikuthiwa yiTofethi, loba isihotsha sendodana kaHinomu, kodwa izathiwa yisiHotsha sokuBulala. |
7. | Ngizachitha kulindawo amacebo akoJuda laweJerusalema, ngenze ukuthi abantu babo bawe ngenkemba phambi kwezitha zabo, langesandla salabo ababazingelayo; nginike izidumbu zabo zibe yikudla kwenyoni zamazulu lenyamazana zeganga. |
8. | Ngenze lumuzi ube yinto eyesabekayo, into yokuncifelwa; bonke abadlula khona bazatshaqeka, bancife ngenxa yazo zonke inhlupheko zawo. |
9. | Ngizabenza badle inyama yamadodana leyamadodakazi abo; bonke bazakudla inyama yabomakhelwane babo ngesikhathi sokuvinjezelwa lesokuhlupheka okuzalethwa yizitha zabo lalabo ababazingelayo. |
10. | Ubusuyibulala inqayi phambi kwamadoda ohamba lawo; |
11. | ubususithi kibo: I Nkosi yamabandla ithi: Ngokunjalo ngizabulala lababantu lalumuzi, njengalokho umuntu ebulala imbiza yombumbi, ingaphindi ilungiswe futhi. Abantu bazangcwatshelwa eTofethi, ngoba kungasekho enye indawo lapho abangangcwatshelwa khona. |
12. | Ngizakwenza njalo kulindawo lakubo abakhileyo kiyo, ngenze lumuzi ufanane leTofethi, kutsho i Nkosi. |
13. | Izindlu zeJerusalema lezamakhosi akoJuda, zonke izindlu okwatshiselwa phezu kwazo impepha kuwo amabutho amazulu, okwachithelwa kuzo leminikelo yokunathwayo kwabanye onkulunkulu, zizangcoliswa njengendawo yeTofethi. |
14. | Wabuya-ke uJeremiya evela eTofethi, lapho i Nkosi eyayimthume ukuprofetha khona, wema egumeni lendlu ye Nkosi, wathi ebantwini bonke: |
15. | I Nkosi yamabandla, uNkulunkulu kaIsrayeli, ithi: Khangelani, ngizakwehlisela kulumuzi lakuyo yonke imizana yawo konke okubi engikutshiloyo, ngoba balenkani, bala ukuzwa amazwi ami. |
← Jeremiah (19/52) → |