← Jeremiah (13/52) → |
1. | I Nkosi yathi kimi: Hamba uyezithengela ibhanti lelembu elicolekileyo, uzibophe ngalo ekhalweni, ungalifaki emanzini. |
2. | Ngasengithenga ibhanti njengokutsho kwelizwi le Nkosi, ngazibopha ngalo ekhalweni. |
3. | Ilizwi le Nkosi labuya lafika kimi ngokwesibili lathi: |
4. | Thatha ibhanti olithengileyo, ozibophe ngalo ekhalweni, usuke uye emfuleni iYufrathi, ulithukuze khona engoxweni yedwala. |
5. | Ngasengihamba, ngalithukuza emfuleni iYufrathi njengokutsho kwe Nkosi kimi. |
6. | Kwathi emva kwensuku ezinengi, i Nkosi yathi kimi: Suka uye emfuleni iYufrathi, uyethatha khona ibhanti engakutshela ukuthi ulifihle khona. |
7. | Ngasengisuka ngaya emfuleni iYufrathi, ngagebha, ngalikhupha ibhanti endaweni lapho engangilifihle khona. Khangela-ke, ibhanti laselonakele, lalingasasizi lutho. |
8. | Laselifika kimi ilizwi le Nkosi lisithi: |
9. | I Nkosi ithi: Ngalindlela ngizachitha ukuziqhenya kukaJuda lokuziqhenya okukhulu kweJerusalema. |
10. | Lababantu ababi, abala ukuzwa amazwi ami, belandela inhliziyo zabo ezilenkani, belandela onkulunkulu abanye ukuze babasebenzele babakhonze, bazakuba njengalelibhanti elingasizi lutho. |
11. | Ngoba njengoba ibhanti linamathela ekhalweni lomuntu, ngokunjalo-ke ngenzile ukuthi indlu yonke yakoIsrayeli lendlu yakoJuda zinamathele kimi, kutsho i Nkosi, ukuze babe ngabantu bami, lebizo, lodumo, lokudunyiswa; kodwa kabalalelanga. |
12. | Uzakutsho lamazwi kibo uthi: I Nkosi, uNkulunkulu kaIsrayeli, ithi: Zonke imbiza zizagcwaliswa ngewayini. Kodwa bazakuthi kuwe: Uthi kasikwazi yini ukuthi zonke imbiza zizagcwaliswa ngewayini? |
13. | Ubususithi kibo: I Nkosi ithi: Khangelani, ngizabadakisa bonke abakhileyo kulelilizwe, ngitsho amakhosi ahlala esihlalweni sobukhosi sikaDavida, labapristi, labaprofethi, kanye labo bonke abakhileyo eJerusalema. |
14. | Ngizabatshayanisa, oyise lamadodana ndawonye, kutsho i Nkosi. Kangiyikubahawukela, kangiyikubaxolela, ngibe lesihawu sokuthi ngingababulali. |
15. | Zwanini libeke indlebe, lingaziqhenyi, ngoba i Nkosi isikhulumile. |
16. | Inikeni i Nkosi udumo, uNkulunkulu wenu, ingakalethi umnyama, lenyawo zenu zingakakhubeki ezintabeni ngoba sekuhlwile, kuthi lisadinga ukukhanya, ikuphendule kube ngumnyama, ikwenze kube ngumnyama onzima. |
17. | Kodwa lapho lingalaleli, umphefumulo wami uzakhala inyembezi ensitha ngenxa yokuziqhenya kwenu, uzakhala lokukhala, lamehlo ami ehlise inyembezi, ngoba umhlambi we Nkosi uthunjiwe. |
18. | Tshono enkosini lendlovukazini uthi: Hlalani phansi ngokuzithoba, ngoba umqhele wenu omuhle uwele phansi. |
19. | Imizi yeningizimu ivaliwe, kakho ongayivula, uJuda wonke uthunjiwe ngokupheleleyo. |
20. | Phakamisani amehlo enu libone labo abavela enyakatho. Ungaphi umhlambi elaliwunikiwe, umhlambi wenu omuhle? |
21. | Lizakuthini uba belibekela labo elabenza abangane benu ukuthi babe ngabaphathi benu? Kaliyikwehlelwa yibuhlungu obunjengowesifazana ohelelwayo yini? |
22. | Uba lisithi enhliziyweni zenu: Lezizinto zehleleleni phezu kwethu? Ngenxa yobukhulu bokona kwenu izidwaba zenu zembuliwe, lehlelwa yikuhlupheka. |
23. | UmEtiyopiya angasiphendula yini isigogo sakhe, kumbe ingwe ingaphendula amabala ayo? Khona-ke lani lingenza okuhle lina elejwayele ukwenza okubi. |
24. | Ngizalichithachitha njengamakhoba aphetshulwe ngumoya ovela enkangala. |
25. | Lokhu yikho ukuphela kwakho, lesabelo engikukhethele sona, kutsho i Nkosi; ngoba ungikhohliwe, wathemba onkulunkulu bamanga. |
26. | Mina uqobo ngizakwembula izidwaba zakho, kubonakale ubuze bakho. |
27. | Ngibonile amanyala akho, lobufebe bakho, lentokozo yakho ngakho, lendlela zokuphinga kwakho phezu kwamaqaqa egangeni. Maye kuwe, wena Jerusalema! Koze kube nini ungakahlambuluki? |
← Jeremiah (13/52) → |