| ← Isaiah (60/66) → |
| 1. | Vuka, Jerusalema, ukhanye, ngoba ukukhanya kwakho sekufikile, lenkazimulo ye Nkosi isikhanya phezu kwakho. |
| 2. | Khangela, umnyama uyasibekela umhlaba, lomnyama onzima usibekele izizwe; kodwa i Nkosi izakhanya phezu kwakho, lenkazimulo yayo ibonakale phezu kwakho. |
| 3. | Izizwe zizakuza ekukhanyeni kwakho, lamakhosi eze ekuveleni kokukhanya kwakho. |
| 4. | Phakamisa amehlo akho inhlangothi zonke, ubone; bayabuthana bonke, beza kuwe; amadodana akho azavela khatshana, lamadodakazi akho azabelethwa njengabantwana. |
| 5. | Khona-ke uzabona, ugcwale intokozo, lenhliziyo yakho izaphuphuma; ngoba okunengi kolwandle kuzalethwa kuwe, lenotho yezizwe izanikwa wena. |
| 6. | Indwendwe zamakamela zizakuza kuwe, lamakamela eMidiyani leEfa, lawo wonke aweShebha azakuza; azaletha igolide lenhlaka, amemezele indumiso ye Nkosi. |
| 7. | Yonke imihlambi yeKedari izabuthelwa wena, lezinqama zeNebayothi zizahlatshelwa wena, zibe ngumnikelo owemukelekayo elathini lami, kwengezelelwe udumo lwendlu yami. |
| 8. | Ngobani laba abagijima njengeyezi, bephapha njengamajuba esiya ezidlekeni zawo? |
| 9. | Yimikhumbi ebuthana ivela ezihlengeni, ikhokhelwa yimikhumbi emikhulu, ukuletha amadodana akho evela khatshana kanye lesiliva legolide lawo, ngenxa yebizo le Nkosi uNkulunkulu wakho, langenxa yoNgcwele kaIsrayeli, ngoba ikunikile udumo. |
| 10. | Abezizwe bazakwakha imiduli yakho, lamakhosi abo akukhonze; ngoba elakeni lwami ngakutshaya, kodwa sengikuhawukele. |
| 11. | Amasango akho azahlala evulekile, kawayikuvalwa emini lebusuku, ukuze abantu bakulethele inotho yezizwe. lamakhosi azo aqhutshwe ebotshiwe. |
| 12. | Ngoba isizwe lombuso okungayikukukhonza kuzachitheka; lezozizwe zizaphela nya. |
| 13. | Inotho yeLebhanoni izalethwa kuwe, ifiri, lomthidari, lomkhoba, ukucecisa indlu yami engcwele; ngizakwenza indawo yenyawo zami ibe ngekhazimulayo. |
| 14. | Amadodana abakucindezelayo azakuza kuwe ukukukhonza, labo bonke abakudelelayo bakhothamele kungaphansi yenyawo zakho, bakubize ngokuthi ungumuzi we Nkosi, iZiyoni yoNgcwele kaIsrayeli. |
| 15. | Esikhundleni sokuthi ubutshiyiwe, uzondwa, kungasekho odabula phakathi kwakho, ngizakwenza ube lodumo kuze kube nininini, uthokozise ezizukulwaneni zonke. |
| 16. | Uzamunya uchago lwezizwe, umunye amabele amakhosi; uzakwazi ukuthi mina Nkosi nginguMsindisi wakho, lomhlengi wakho, lomninimandla kaJakobe. |
| 17. | Endaweni yethusi ngizakulethela igolide, lendaweni yensimbi ngikulethele isiliva, endaweni yesigodo ngikulethele ithusi, lendaweni yamatshe ngikulethele insimbi. Ngizakwenza ukuthula kube ngumbusi wakho, lokulunga kube yinkosi yakho. |
| 18. | Isihluku kasisayikuba khona elizweni lakho, lokuchitheka lokubhubhisa phakathi kwelizwe lakho; uzakutha imiduli yakho uthi yikuKhululwa, lamasango akho uthi yiNdumiso. |
| 19. | Ilanga kalisayikuba yikukhanya kuwe emini, lenyanga kayisayikukukhanyisela ebusuku; kodwa i Nkosi izakuba yikukhanya kwakho okulaphakade, loNkulunkulu wakho abe ludumo lwakho. |
| 20. | Ilanga lakho kalisayikutshona, lenyanga yakho kayisayikuncipha; ngoba i Nkosi izakuba yikukhanya kwakho okulaphakade, lensuku zokulila kwakho zizaphela. |
| 21. | Abantu bakho bonke bazakuba ngabalungileyo, ilizwe libe ngelabo kokuphela, babe lugatsha oluhlanyelwa yimi, umsebenzi wezandla zami, ukuze ngibe lodumo. |
| 22. | Usendo oluncinyane luzakuba ngabantu abanengi, lomncane abe yisizwe esilamandla. Ngizakwenza lokhu ngesikhathi esifaneleyo. Mina ngiyi Nkosi. |
| ← Isaiah (60/66) → |