| ← Isaiah (28/66) → |
| 1. | Maye kumqhele wokuzigqaja wezidakwa zakoEfrayimi, obuhle benkazimulo yazo buliluba elibunayo, eliphezu kwekhanda lezihotsha ezivundileyo zalabo abatshaywe liwayini. |
| 2. | Khangela, iNkosi ilaye olamandla loqinileyo, ozaphosela emhlabeni ngesandla, njengezulu lesiphepho elilesiqhotho, isiphepho esichithayo, njengempophoma yamanzi alamandla akhukhulayo. |
| 3. | Umqhele wokuziqgaja wezidakwa zakoEfrayimi uzanyathelwa phansi ngezinyawo, |
| 4. | lobuhle benkazimulo yakhe, obuphezu kwekhanda lesihotsha esivunde kakhulu, buzakuba liluba elibunayo, njengesithelo esivuthwe masinyane kungakafiki ihlobo; okuthi osibonileyo asibone, sisesesandleni sakhe asiginye. |
| 5. | Ngalolosuku i Nkosi yamabandla izakuba ngumqhele wenkazimulo, lesidlodlo sobuhle kunsali yabantu bayo, |
| 6. | lomoya wesahlulelo kulowo ohlalela isahlulelo, lamandla kulabo ababuyisela impi esangweni. |
| 7. | Lalaba baduhile ngenxa yewayini, langenxa yokunathwayo okulamandla baphambukile; umpristi lomprofethi baduhile ngenxa yokunathwayo okulamandla, baginywe liwayini, baphambukile ngenxa yokunathwayo okulamandla; bayaduha emibonweni, bakhubeke kusahlulelo. |
| 8. | Ngoba wonke amatafula agcwele amahlanzo lo kungcola, kakulandawo engangcolanga. |
| 9. | Izafundisa bani ulwazi, njalo izakwenza bani aqedisise umbiko? Abalunyuliweyo echagweni, abakhunyuliweyo emabeleni. |
| 10. | Ngoba umthetho phezu komthetho, umthetho phezu komthetho; umzila phezu komzila, umzila phezu komzila; lapha okuncinyane, laphayana okuncinyane. |
| 11. | Ngoba ngendebe eziklolodayo, langolunye ulimi izakhuluma kulababantu, |
| 12. | ethi kubo: Lokhu yikuphumula, phumuzani abadiniweyo; lalokhu yikuvuselela; kodwa kabathandanga ukuzwa. |
| 13. | Kodwa ilizwi le Nkosi lizakuba kibo umthetho phezu komthetho, umthetho phezu komthetho; umzila phezu komzila, umzila phezu komzila; lapha kancinyane, laphayana kancinyane; ukuze bahambe, bawe nyovane, bephuke, bathiywe, bathunjwe. |
| 14. | Ngakho zwanini ilizwi le Nkosi, bantu abaklolodayo, elibusa lababantu abaseJerusalema. |
| 15. | Ngoba lithe: Senze isivumelwano lokufa, njalo senze isivumelwano lesihogo; lapho isiswepu esiphuphumayo sisedlula, kakuyikufika kithi; ngoba senze amanga aba yisiphephelo sethu, sacatsha ngaphansi kwenkohliso. |
| 16. | Ngakho itsho njalo iNkosi uJehova: Khangela, ngibeka eZiyoni ilitshe lesisekelo, ilitshe elihloliweyo, ilitshe lengonsi eliligugu, isisekelo esisekelweyo; okholwayo kayikuphangisa. |
| 17. | Isahlulelo laso ngizasibeka entanjeni, lokulunga entanjeni yokuqondisa; lesiqhotho sizakhukhula isiphephelo samanga; lamanzi agabhele indawo yokucatsha. |
| 18. | Lesivumelwano senu lokufa sizaphela, lesivumelwano senu lesihogo kasiyikuma; lapho isiswepu esikhukhulayo sisedlula, khona lizanyathelelwa phansi yikho. |
| 19. | Kusukela esikhathini sokwedlula kwaso, sizalithatha; ngoba ukusa ngokusa sizakwedlula, emini lebusuku; njalo kuzakuba ngokwesabisayo kuphela ukuqedisisa umbiko. |
| 20. | Ngoba umbheda mfitshane kakhulu ukuthi umuntu azelule kuwo, lengubo yincinyane kakhulu ukuthi umuntu azigoqele ngayo. |
| 21. | Ngoba i Nkosi izavuka njengentab eni yePerazimi, ithukuthele njengesigodi ni seGibeyoni, ukuze yenze umsebenzi wayo, umsebenzi wayo ongejwayelekanga, yenze isenzo sayo, isenzo sayo esingejwayelekanga. |
| 22. | Ngakho-ke lingahleki usulu, hlezi izibopho zenu ziqiniswe; ngoba ngizwile eNkosini uJehova wamabandla ngo kuqedwa okuqunywe phezu komhlaba wonke. |
| 23. | Bekani indlebe, lizwe ilizwi lami; lalelani lizwe inkulumo yami. |
| 24. | Umlimi ulimela ukuhlanyela lonke usuku yini? Uyavula abhuqe umhlabathi wakhe yini? |
| 25. | Lapho esewuhlelembile ubuso bawo, kaphosi yini amafitshizi*, ahlakaze ikumini*, afake emizileni ingqoloyi lebhali*, lespelite* endaweni ekhethelwe yona? |
| 26. | Ngoba uNkulunkulu wakhe uyamazisa ngendlela, amfundise. |
| 27. | Ngoba amafitshizi kawabhulwa ngobhulo, levili lenqola kaliphendulwa phezu kwekumini; kodwa amafitshizi atshaywa ngoswazi, lekumini ngentonga. |
| 28. | Amabele esinkwa ayachotshozwa; ngoba kayikuhlala ewabhula kokuphela, loba ewachoboza nge vili lenqola yakhe, njalo kawachobozi ngamabhiza akhe. |
| 29. | Lalokhu kuvela e Nkosi ni yamabandla; iyamangalisa ekwelulekeni, yinkulu ekusebenzeni. |
| ← Isaiah (28/66) → |