← Hosea (8/14) → |
1. | Khalisa uphondo, ngoba ukhozi Iuzula phezu kwendlu ye Nkosi; abantu bami sebeqe isivumelwano sami, baphambuka emlayweni wami. |
2. | Bamemeza kimi bathi: Siyakwazi, Nkulunkulu kaIsrayeli. |
3. | UIsrayeli ulahlile okuhle, isitha sizaxotshana laye. |
4. | Bazibekela amakhosi ngaphandle kwemvumo yami. Bamisa ababusi ngingazi mina. Ngesiliva sabo langegolide labo bazenzela izithombe ezabalethela ukuchitheka. |
5. | Ngaleyisa ithole eladunyiswa nguwe, wena Samariya. Ukuthukuthela kwami kuyabavuthela. Koze kube nini uIsrayeli engahlanjululwanga? |
6. | Umbazi walenza, kalisuye Nkulunkulu. Ithole leSamariya lizaphahlazwa libe yizihlephu. |
7. | Ngoba behlanyela umoya, bazavuna isivunguzane. Amabele abo kawayikukhahlela, kawayikuba lanhlamvu; uba engaba lazo, zizadliwa ngabezizwe. |
8. | UIsrayeli useginyiwe, wanyamalala phakathi kwezizwe usenjengesitsha esingelamsebenzi. |
9. | Ngoba njengobabhemi oduhileyo bayile eAsiriya ukudinga usizo. UEfrayimi uqatshile izithandwa ukuthi zimsize. |
10. | Lanxa beqatsha abasizi phakathi kwezizwe, sengizabaqoqa; khona bezakhawula ukubeka amakhosi lababusi. |
11. | Ngoba uEfrayimi akhile amalathi amanengi, asephenduke aba ngamalathi okona. |
12. | Loba bengingambhalela imilayo yami ibe zinkulungwane ezilitshumi, bebezayitshaya into engaziwayo. |
13. | Lanxa benikela inyama yemihlatshelo, babuye bayidle, mina Nkosi kangiyikuyemukela. Ngizakhumbula ububi babo, ngibaphindisele ngenxa yezono zabo, babuyele eGibhithe. |
14. | UIsrayeli umkhohliwe uMenzi wakhe, wazakhela indlu zamakhosi; uJuda wandisile imizi ebiyelwe ngemithangala; kodwa ngizathumela umlilo phezu kwemizi yakhe, ozaqothula inqaba zakhe. |
← Hosea (8/14) → |