← Hosea (10/14) → |
1. | UIsrayeli ulivini elihle kakhulu elithelayo izithelo. Ngokwanda kwezithelo zakhe wandisa amalathi akhe; langokwanda kobuhle belizwe lakhe wenza insika zakhe eziyizithombe zibe zinhle. |
2. | Inhliziyo yabo ikhohlakele, khathesi sebezathwala icala labo. Izabhidliza amalathi abo, idilize lensika zabo eziyizithombe. |
3. | Ngoba khathesi sebezakuthi: Kasilankosi thina, ngoba kasiyesabi i Nkosi; inkosi-ke ingasenzelani? |
4. | Bakhuluma amazwi nje, benze izivumelwano ngezifungo zamanga; isigwebo sesinjengokhula olubulalayo olukhula emifolweni yensimu. |
5. | Abakhileyo eSamariya bayathuthumela ngethole leBeti-Aveni. Abantu balo bazalililela, labapristi bezithombe balikhalele, bekhalela ubuhle balo osebususiwe kulo. |
6. | Yebo, lona lizathwalelwa eAsiriya, libe ngumthelo enkosini enkulu. UEfrayimi uzayangeka, loIsrayeli abe lenhloni ngokungalaleli kwakhe. |
7. | ISamariya lenkosi yayo kuzanyamalala njengebazelo elindendayo emanzini. |
8. | Indawo eziphakemeyo zokukhonzela ezilize eziyisono sikaIsrayeli zizachithwa; ameva lokhula oluhlabayo kuzamila emalathini abo. Bazakuthi ezintabeni: Sisibekeleni; bathi lemaqaqeni: Welani phezu kwethu. |
9. | Kusukela ensukwini zeGibeya wonile, Israyeli, kulokhu kusenjalo lalamuhla. |
10. | Ngizabasukela abantu abahlamukayo, ngibatshaye; izizwe zizababuthanela nxa betshayelwa izono zabo ezinengi. |
11. | UEfrayimi ulithokazi elithambileyo elithanda ukubhula amabele; ngilibophele ejogweni; ngambophela uEfrayimi, ukuze alime, loJakobe wambulalela amagade. |
12. | Zihlanyeleleni ukulunga, livune izithelo zothando; qhathani ingqatho yenu, ngoba kuyisikhathi sokuyidinga i Nkosi, ukuze ifike, ithele ukulunga phezu kwenu. |
13. | Lilime ububi, lavuna ukungalungi, lidlile izithelo zamanga. Ngoba lithembile indlela yenu, lobunengi bamaqhawe enu; |
14. | ngalokho kuzakuba khona ukuxokozela kwempi phakathi kwabantu bakini, kudilizwe lenqaba zenu zonke njengalokhu ushalimani wachitha iBetiAribeli ngosukulwempi, kwachotshozwa onina labantwana babo. |
15. | Kuzakuba njalo kuwe, Israyeli, ngenxa yobubi bakho obukhulu; njengoba ilanga lingaphuthi ukuphuma, kunjalo-ke lenkosi kuIsrayeli izachithwa. |
← Hosea (10/14) → |