← Ezekiel (9/48) → |
1. | Ngezwa ilizwi elikhulu limemeza lisithi: Sondelani lina eliphatha umuzi, lonke liphathe izikhali zenu zokuchitha. |
2. | Khangela-ke, kwasekusiza amadoda ayisithupha evela esangweni langaphezulu elikhangele ngenyakatho, wonke ephethe izikhali zokubulala, ayehamba lomuntu ogqoke ilembu elicolekileyo elezinto zokubhala ekhalweni lwakhe; angena, ema elathini lethusi. |
3. | Inkazimulo kaNkulunkulu kaIsrayeli yasuka ngaphezu kwamakherubi* lapho eyayikhona, yayahlala emnyango wendlu. Yasibiza umuntu owayegqoke ilembu elicolekileyo elezinto zokubhala, |
4. | yathi kuye: Dabula phakathi komuzi weJerusalema, ufake uphawu emabunzini abantu ababubulayo bekhala ngawo wonke amanyala enziwa phakathi kwawo. |
5. | Ngezwa isithi kwabanye: Dabulani phakathi komuzi limlandele, litshaye, lingayekeli, lingabi lasihawu, |
6. | libulale liqede amaxhegu, amajaha lezintombi ezigcweleyo, abantwana abancinyane labesifazana; kodwa lingathinti loyedwa olophawu, liqalise endlini yami engcwele. Baqala ngamadoda amadala ayephambi kwethempeli. |
7. | Yasisithi kibo: Ngcolisani ithempeli, ligcwalise amaguma alo ngabatshayiweyo. Phumani-ke. Basebephuma, babulala abantu phakathi komuzi. |
8. | Kwathi besabatshaya, ngasala ngedwa, ngathi mbo ngobuso, ngakhala ngathi: Hawu, Nkosi Jehova! Uzababulala bonke abaseleyo koIsrayeli ekwehliseleni kwakho ukuthukuthela phezu kweJerusalema yini? |
9. | Yathi kimi: Ububi bakoIsrayeli lobakoJuda bukhulu kakhulu, ilizwe ligcwele igazi, lomuzi ugcwele ukungalungi, ngoba bathi: I Nkosi ilitshiyile ilizwe leli, kayiboni. |
10. | Lami-ke kangiyikubayekela, kangiyikuba lesihawu, kodwa ngizakwehlisela izenzo zabo phezu kwabo. |
11. | Khangela-ke, lowomuntu owayegqoke ilembu elicolekileyo elezinto zokubhala ekhalweni lwakhe wabuya wazabika eNkosini wathi: Ngenzile njengokungilaya kwakho. |
← Ezekiel (9/48) → |