← Ezekiel (4/48) → |
1. | Wena, ndodana yomuntu, zithathela isitina, usibeke phambi kwakho, ubhale kiso ngokugubha umfanekiso womuzi, umuzi weJerusalema; |
2. | udwebe indawo zokuwuvimbezela, lomduli wokuwuvimbezela, ledundulu; udwebe lenkamba futhi, lezigodo zokudiliza inhlangothi zonke. |
3. | Uthathe umganu oyincence wensimbi, uwumise phakathi kwakho lomuzi, ube ngumduli wensimbi; wena ukhangele ngakuwo umuzi, umuzi ube ngovinjezelweyo, wena ube ngumvimbezeli. Lokhu kuzakuba yisibonakaliso kundlu kaIsrayeli. |
4. | Ubusulala ngomhlubulo wakho wangasekhohlo, ngizabeka phezu kwakho isono sikaIsrayeli; uzathwala isono sabo insuku zonke zokulala kwakho ngalowomhlubulo. |
5. | Usuku olulodwa luzamela umnyaka wokona kwabo; ngimisile ukuthi ukuthwale insuku ezilikhulu lamatshumi ayisificamunwemunye. Ngokunjalo-ke uzathwala ukona kwakoIsrayeli. |
6. | Lapho usuziphelelisile lezonsuku, uzalala phansi ngokwesibili, kodwa ngomhlubulo wangakwesokunene, uthwale ukona kwakoJuda insuku ezingamatshumi amane; usuku olulodwa ngilumisele umnyaka. |
7. | Uzakhangela ekuvinjezelweni kweJerusalema, ingalo yakho yembuliwe, uprofethe ngawo umuzi. |
8. | Khangela, ngizakubopha ngamagoda ukuze ungatshibilikeli emhlubulweni omunye lomunye kuze kuphelele insuku zokuvinjezelwa kwakho. |
9. | Uthathe ingqoloyi lebhali* lendumba lendlubu lenyawuthi lophoko, ukuhlanganise esitsheni sinye, wenze ngakho ukudla. Insuku olala ngazo ngomhlubulo wakho ezingamakhulu amathathu lezificamunwemunye uzakudla khona. |
10. | Uzalinganisa ukudla kwakho, udle amashekeli* angamatshumi amabili ngelanga, ukudle ngesikhathi ngesikhathi. |
11. | Amanzi akho okunatha lawo uwalinganise, unathe ingxenye yesithupha yehini*, uwanathe ngesikhathi ngesikhathi. |
12. | Ukudla kwakho uzakudla kwenziwe njengezinkwa zebhali*, ukupheke ngamalongwe abantu, ukuphekele lapho abantu abangakubona khona. |
13. | I Nkosi yathi: Ngokunjalo-ke abantwana bakoIsrayeli bazakudla ukudla okungcolileyo ezizweni engizabaxotshela kizo. |
14. | Ngasengisithi: O Nkosi Jehova! Khangela, kangizanga ngingcoliswe. Kusukela ebutsheni bami kuze kube lamuhla kangizanga ngidle ingcuba lokubulewe zinyamazana, lenyama engcolileyo kayizanga ingene emlonyeni wami. |
15. | Yasisithi kimi: Khangela, ngikunika amalongwe enkomo endaweni yamalongwe abantu ukuze upheke ngawo ukudla kwakho. |
16. | Yathi futhi kimi: Ndodana yomuntu, khangela, ngizanciphisa ukudla kwabo kwensuku zonke eJerusalema; abantu bazakudla ukudla ngesisindo benqineka, balinganise lamanzi abawanathayo benqineka. |
17. | Ukudla kwabo lamanzi abo kuzancipha, baze baphelelwe ngamandla lapho bebonana, baphele nya ngenxa yezono zabo. |
← Ezekiel (4/48) → |