← Ezekiel (39/48) → |
1. | Wena-ke, ndodana yomuntu, profetha ngoGogi uthi: INkosi uJehova ithi: Khangela, ngimelene lawe, Gogi, sikhulu esikhulu seRoshi leMesheki leTubali. |
2. | Ngizakuphendula, ngikuqhube, ngikukhuphe endaweni ezikhatshana zenyakatho, ngikuse entabeni zakoIsrayeli. |
3. | Besengitshayela phansi idandili elisesandleni sakho sokhohlo, ngiwisele phansi imitshoko esandleni sakho sokunene. |
4. | Uzawela phezu kwezintaba zakoIsrayeli, wena lamaxuku akho wonke labantu abalawe. Ngizakunikela emanqeni lezilweni zeganga ukuze kukudle. |
5. | Uzawela endle, ngoba ngikhulumile, kutsho iNkosi uJehova. |
6. | Ngizathumela umlilo kuMagogi lakulabo abahlala ngokulondolozeka ezihlengeni. Bazakwazi ukuthi ngiyi Nkosi. |
7. | Ngizakwenza ukuthi ibizo lami laziwe phakathi kwabantu bami uIsrayeli, kangisayikuyekela ibizo lami elingcwele lingcoliswe futhi; lezizwe zizakwazi ukuthi ngiyi Nkosi, oNgcwele kaIsrayeli. |
8. | Khangelani, kuyeza kuzakwenzeka, kutsho iNkosi uJehova; yilo lolosuku engakhuluma ngalo. |
9. | Kuzakuthi labo abahlala emizini yakoIsrayeli baphume, babuthe izikhali, babase umlilo ngazo, izihlangu ezikhulu lamahawu lamadandili lemitshoko lezinduku lemikhonto, bakubase iminyaka eyisikhombisa, |
10. | ukuze bangathezi inkuni egangeni, loba bazigamule eguswini, ngoba bazabasa imililo yabo ngezikhali; bazakwemuka labo ababemukayo, baphange labo ababaphangayo, kutsho iNkosi uJehova. |
11. | Ngalolosuku ngizanika uGogi indawo yokungcwabela koIsrayeli isihotsha saseAbarimi, esingempumalanga kolwandle. Bazangcwatshelwa lapho uGogi lawo wonke amaxuku akhe, ligcwale lonke iAbarimi, balibize ngokuthi yisiHotsha samaxuku kaGogi. |
12. | UIsrayeli uzabangcwaba inyanga eziyisikhombisa ukuze ilizwe lihlambuluke. |
13. | Bonke abantu belizwe bazasiza ukubangcwaba, kubalethele udumo mhla ngibonakalisa inkazimulo yami, kutsho iNkosi uJehova. |
14. | Bazamisa abantu abazahambahamba phakathi kwelizwe, bangcwabe labo abaseleyo elizweni ukuze lihlambuluke. Ekupheleni kwenyanga eziyisikhombisa bazaqalisa ukuhlola. |
15. | Nxa behambahamba phakathi kwelizwe, omunye abone ithambo lomuntu, uzamisa isibonakaliso phansi kwalo, baze balingcwabe abangcwabayo esiHotsheni samaxuku kaGogi. |
16. | Kukhona umuzi lapho othiwa iHamona. Bazahlambulula ilizwe ngokunjalo. |
17. | Wena-ke, ndodana yomuntu, kutsho iNkosi uJehova, khuluma lenyoni zenhlobo zonke lenyamazana zonke zeganga, uthi: Hlanganani lize, buthanani livela indawo zonke lize edilini lomhlatshelo engililungiselele lona, idili elikhulu lomhlatshelo eliphezu kwentaba zakoIsrayeli, lizakudla inyama linathe igazi. |
18. | Lizakudla inyama yamaqhawe, linathe igazi leziphathamandla zomhlaba; banjengezinqama, lamawundlu, lezimbuzi, lamajongosi, lezinonileyo zeBashani. |
19. | Lizakudla amahwahwa lize lisuthe, linathe igazi lize lidakwe, edilini lomhlatshelo engililungisela lona. |
20. | Lizasutha etafuleni lami amabhiza labagadi lamaqhawe lamadoda wonke empi, kutsho iNkosi uJehova. |
21. | Ngizamisa inkazimulo yami phakathi kwezizwe; izizwe zonke zizabona isigwebo engisenzileyo, lesandla sami engisehlisele phezu kwabo. |
22. | Indlu kaIsrayeli izakwazi ukuthi ngiyi Nkosi uNkulunkulu wabo kusukela kulolosuku. |
23. | Lezizwe zizakwazi ukuthi indlu kaIsrayeli yathunjwa ngenxa yesono sayo, ngoba bangikhohlisa kakhulu ngaze ngafihla ubuso bami kibo, ngabanikela ezandleni zezitha zabo, bawa ngenkemba. |
24. | Ngabaphatha ngokufanele ukungcola kwabo leziphambeko zabo, ngabafihlela ubuso bami. |
25. | Ngalokho-ke iNkosi uJehova ithi: Sengizabuyisa abantu bakaJakobe, ngibe lesihawu kuIsrayeli wonke, ngibe lobukhwele langebizo lami elingcwele. |
26. | Bazakhohlwa ihlazo labo lokungikhohlisa kwabo konke, nxa sebehlale elizweni labo kungasekho lobethusayo, |
27. | lapho sengibakhuphile ebantwini, ngabaqoqa emazweni ezitha zabo, ngabonakalisa ubungcwele bami ngabo phambi kwezizwe. |
28. | Bazakwazi ukuthi ngiyiNkosi uJehova wabo ngoba ngabaxotshela phakathi kwezizwe, ngabuye ngabaqoqela elizweni labo. Kangisayikutshiya loyedwa wabo phakathi kwezizwe. |
29. | Kangisayikubafihlela ubuso bami nxa sengithela umoya wami phezu kukaIsrayeli, kutsho iNkosi uJehova. |
← Ezekiel (39/48) → |