| ← Ezekiel (34/48) → |
| 1. | Ilizwi le Nkosi lafika kimi lathi: |
| 2. | Ndodana yomuntu, profetha ngabelusi bakoIsrayeli, uprofethe uthi kibo: INkosi uJehova ithi: Maye kini, belusi bakoIsrayeli elizondlayo lina! Abelusi kabafanele ukwelusa izimvu yini? |
| 3. | Liyadla amahwahwa, lizigqokise ngoboya, lihlabe ezinonileyo, kodwa lingazelusi izimvu. |
| 4. | Kaliziqinisanga ezibuthakathaka, kalizelaphanga ezigulayo, lezephukileyo kalizibophanga, kalizibuyisanga eziduhileyo, lezilahlekileyo kalizidinganga, lizibusile ngamandla langolunya. |
| 5. | Ngakho zichithekile ngoba bekungelamelusi, zaba yikudla kwazo zonke izilo zeganga. |
| 6. | Izimvu zami zachitheka, zazulazula kuzo zonke intaba, lakiwo wonke amaqaqa aphakemeyo; izimvu zami zachitheka endaweni zonke zomhlaba, kungekho loyedwa ozilandelayo azidinge. |
| 7. | Ngalokho-ke, lina belusi, zwanini ilizwi le Nkosi. |
| 8. | INkosi uJehova ithi: Ngiyazifunga mina, ngoba izimvu zami seziyimpango, seziyikudla kwazo zonke izilo zeganga, ngoba kungelamelusi, langoba abelusi bami bengazidinganga izimvu zami, kodwa bezondlile bona, bengazelusanga izimvu zami. |
| 9. | Ngakho, lina belusi, zwanini ilizwi le Nkosi. |
| 10. | INkosi uJehova ithi: Khangela, ngimelene labelusi, ngizafuna izimvu zami kibo, ngibayekelise ukwelusa izimvu zami, bangaphindi ukuzondla bona. Ngizakhupha izimvu zami emilonyeni yabo ukuze zingabi yikudla kwabo. |
| 11. | INkosi uJehova ithi: Khangela, mina uqobo lwami ngizazilandela izimvu zami, ngizidinge. |
| 12. | Njengomelusi edinga umhlambi wakhe lapho ezinye izimvu zakhe sezichithekile, ngokunjalo-ke ngizadinga izimvu zami, ngizikhuphe kuzo zonke indawo lapho ezihlakazekele khona ngosuku lwamayezi lomnyama onzima. |
| 13. | Ngizazikhupha phakathi kwabantu, ngizibuthe emazweni, ngizibuyisele elizweni lazo, ngizidlise entabeni zakoIsrayeli, lemithonjeni, lakuzo zonke indawo zelizwe okwakhiwe kizo. |
| 14. | Ngizazidlisa edlelweni elihle, ledlelo lazo lizakuba sezingqongeni zentaba zakoIsrayeli. Zizalala phansi elizweni eliledlelo elihle, zidle emadlelweni amahle entabeni zakoIsrayeli. |
| 15. | Mina uqobo ngizakuba ngumelusi wezimvu zami, ngizilalise phansi, kutsho iNkosi uJehova. |
| 16. | Ngizadinga ezilahlekileyo, ngibuyise eziduhileyo, ngibophe ezephukileyo, ngiqinise ezibuthakathaka; lezinonileyo leziqinileyo ngizazilondoloza, ngizidlise ngokulunga. |
| 17. | Lina-ke, mhlambi wami, kutsho iNkosi uJehova, khangelani, ngizakwahlulela phakathi kwemvu lemvu, laphakathi kwenqama lentondolo. |
| 18. | Kakwenelanga yini ukuthi lidle edlelweni elihle, lize linyathele ngenyawo ledlelo lenu eliseleyo, lokuthi linathe amanzi ahlambulukileyo lize lingcolise lamanye ngenyawo zenu? |
| 19. | Izimvu zami zimele zidle lokhu okunyathelwe ngenyawo zenu, zinathe okungcoliswe ngenyawo zenu yini? |
| 20. | Ngakho iNkosi uJehova ithi kuzo: Khangelani, mina uqobo lwami ngizakwahlulela phakathi kwezimvu ezinonileyo lezicakileyo. |
| 21. | Ngoba liyasunduza ngemihlubulo langamalunda, lihlabe ezibuthakathaka ngempondo zenu, zize zihlakazekele khatshana, |
| 22. | ngizazisa izimvu zami, kazisayikuba yimpango; ngizakwahlulela phakathi kwemvu lemvu. |
| 23. | Ngizazimisela umelusi abe munye, inceku yami uDavida, yena uzazelusa. Uzazidlisa abe ngumelusi wazo. |
| 24. | Mina Nkosi ngizakuba nguNkulunkulu wazo, lenceku yami uDavida ibe yisiphathamandla phakathi kwazo. Mina Nkosi ngikhulumile. |
| 25. | Ngizakwenza lazo isivumelwano sokuthula, ngixotshe izilo zeganga elizweni, ukuze zilondolozeke enkangala, zilale ehlathini. |
| 26. | Ngizazenza zibe yisibusiso zona lezindawo ezihanqe uqaqa lwami, ngithumele, izulu ngesikhathi salo, izulu elihle. |
| 27. | Izihlahla zeganga zizathela izithelo zazo, lomhlaba uveze inala, zilondolozeke elizweni lazo. Zizakwazi ukuthi ngiyi Nkosi nxa sengephule ijogwe lazo, ngazikhulula kulabo abazithumbileyo. |
| 28. | Kazisayikuba yimpango yezizwe, kazisayikudliwa yizilo zelizwe; zizalondolozeka, zingesatshiswa muntu. |
| 29. | Ngizazinika amasimu avundileyo ukuze zingabe zisaqedwa yindlala elizweni, zingabe zisaba lihlazo lezizwe. |
| 30. | Zizakwazi ukuthi mina Nkosi, uNkulunkulu wazo, ngilazo, lokuthi bona abantu bangabantu bami, indlu kaIsrayeli, kutsho iNkosi uJehova. |
| 31. | Lina, bantu bami, liyizimvu zami, izimvu engizelusayo, mina nginguNkulunkulu wenu, kutsho iNkosi uJehova. |
| ← Ezekiel (34/48) → |