| ← Ezekiel (33/48) → |
| 1. | Ilizwi le Nkosi lafika kimi lathi: |
| 2. | Ndodana yomuntu, tshono kibo abantu bakini uthi: Uba ngiletha inkemba elizweni, labantu belizwe bathathe omunye phakathi kwabo, bambeke abe ngumlindi wabo, |
| 3. | nxa ebona inkemba isiza elizweni, avuthele uphondo, axwayise abantu, |
| 4. | uba omunye esizwa ukukhala kophondo angananzi, inkemba ifike imsuse, kuzakuba ngumlandu wakhe. |
| 5. | Uzwile ukukhala kophondo, kazananza, ngoba umlandu uzakuba ngowakhe. Kodwa uba ebexwayisekile, ubezaphepha. |
| 6. | Kodwa nxa umlindi ebona inkemba isiza, angaluvutheli uphondo, abantu bengaxwayiswa, inkemba ifike isuse omunye wabo, lowomuntu afele esonweni sakhe, umlandu uzakuba ngowomlindi. |
| 7. | Wena-ke, ndodana yomuntu, ngikubeke ube ngumlindi koIsrayeli; nxa usizwa ilizwi elivela kimi, ubaxwayise. |
| 8. | Uba ngisithi komubi: Wena muntu omubi, uzakufa isibili; uba ungakhulumi wena ukumxwayisa omubi ukuze atshiye indlela yakhe, lowomuntu omubi uzafela esonweni sakhe, kodwa umlandu uzakuba ngowakho. |
| 9. | Kodwa uba umxwayisa omubi ukuze aphenduke endleleni yakhe, angatshiyi indlela yakhe, uzafela esonweni sakhe, kodwa wena uzaphepha. |
| 10. | Wena-ke, ndodana yomuntu, tshono kuIsrayeli uthi: Lina lithi: Iziphambeko zethu lezono zethu zisehlele, siyaphela ngenxa yazo; sizaphila njani? |
| 11. | Tshono kibo uthi: INkosi uJehova ithi: Ngiyazifunga mina, kangithokozi ngokufa komubi, kodwa ngokuthi omubi atshiye indlela yakhe aphile; tshiyani-ke, tshiyani indlela zenu ezimbi, ngoba lizafelani, lina ndlu kaIsrayeli? |
| 12. | Wena-ke, ndodana yomuntu, tshono ebantwini bakini uthi: Ukulunga kolungileyo kakuyikumkhulula uba esona; lobubi bomubi kabuyikumbulala uba etshiya ububi bakhe; lolungileyo kayikuphila ngokulunga kwakhe uba esona. |
| 13. | Lapho ngisitsho kolungileyo ukuthi uzaphila isibili, kanti uba ethemba ukulunga kwakhe, enze isono, kakuyikukhunjulwa lesisodwa isenzo sakhe esilungileyo, kodwa uzafela esonweni asenzileyo. |
| 14. | Futhi uba ngisitsho komubi ukuthi uzakufa isibili, kanti uba ephenduka ezonweni zakhe, enze okufaneleyo lokulungileyo, |
| 15. | uba ebuyisela isibambiso, abuyisele lokho akuphangileyo, ahambe ngezimiso zempilo, angenzi okubi, uzaphila isibili, angafi. |
| 16. | Kakusayikukhunjulwa lesisodwa sezono azenzileyo; ngoba wenzile okufaneleyo lokulungileyo, uzaphila isibili. |
| 17. | Kodwa abantu bakini bathi: Indlela yeNkosi kayilunganga, kanti ngezabo indlela ezingalunganga. |
| 18. | Nxa olungileyo etshiya ukulunga kwakhe, enze okubi, uzakufa ngenxa yakho. |
| 19. | Nxa omubi etshiya ububi bakhe, enze okufaneleyo lokulungileyo, uzaphila ngenxa yakho. |
| 20. | Kanti lina lithi: Indlela yeNkosi kayilunganga. Lina ndlu kaIsrayeli, ngizalahlulela lonke ngokufanele izindlela zenu. |
| 21. | Ngomnyaka wetshumi lambili wokuthunjwa kwethu, ngosuku lwesihlanu lwenyanga yetshumi, umuntu owayephunyukile eJerusalema wafika kimi wathi: Umuzi usutshayiwe. |
| 22. | Isandla se Nkosi sasiphezu kwami kusihlwa kungakafiki ophunyukileyo; yavula umlomo wami ngesikhathi lowomuntu engakafiki kimi ekuseni. Umlomo wami wavuleka, angabe ngisaba yisimungulu. |
| 23. | Ilizwi le Nkosi lafika kimi lathi: |
| 24. | Ndodana yomuntu, abakhileyo endaweni ezichithekileyo elizweni lakoIsrayeli, balokhu besithi: UAbrahama wayemunye lapho enikwa ilizwe, kodwa thina sibanengi; ilizwe silinikiwe isibili ukuhlala kilo. |
| 25. | Ngalokho-ke tshono kibo uthi: INkosi uJehova ithi: Lidla inyama elegazi, liphakamisele amehlo enu ezithombeni zenu, lichithe igazi; lizahlala kilo ilizwe yini? |
| 26. | Lithemba inkemba, lenze amanyala, lowo lalowo angcolise umfazi womakhelwane wakhe; kambe lizahlala kilo ilizwe yini? |
| 27. | Tshono lokhu kibo uthi: INkosi uJehova ithi: Ngiyazifunga mina, isibili labo abasendaweni ezichithekileyo bazabulawa; labo abasendle ngizabanikela ezilweni zibabulale, lalabo abasezinqabeni labasembalwini bazabulawa ngomatshayabhuqe wesifo. |
| 28. | Ngizalichitha ilizwe libe yinkangala, lamandla alo aziphakamisayo azaphela, lentaba zakoIsrayeli zibe yinkangala ukuze kungadluli muntu kuzo. |
| 29. | Khona bazakwazi ukuthi ngiyi Nkosi lapho sengilichithile ilizwe laba yinkangala ngenxa yamanyala abo wonke abawenzileyo. |
| 30. | Wena-ke, ndodana yomuntu, abantu bakini bakhuluma ngawe emidulini leminyango yezindlu, lowo lalowo uthi kumfowabo: Woza, sizwe ukuthi ilizwi lithini elivela e Nkosi ni. |
| 31. | Ngakho abantu bami bayeza kuwe, bahlale phambi kwakho, bezwe okutshoyo, kodwa kabayikukwenza. Ngoba bathanda ngomlomo wabo, kodwa inhliziyo zabo zisenzuzweni yabo. |
| 32. | Khangela, kibo unjengomuntu ohlabela ingoma ezinhle, olelizwi elihle, owazi ukutshaya kuhle ichacho, ngoba bayezwa okutshoyo kodwa kabayikukwenza. |
| 33. | Nxa lokhu kufika, khangela, kuzafika isibili, khona bazakwazi ukuthi bekukhona umprofethi phakathi kwabo. |
| ← Ezekiel (33/48) → |