| ← Ezekiel (31/48) → |
| 1. | Ngomnyaka wetshumi lanye, ngosuku lokuqala enyangeni yesithathu, ilizwi le Nkosi lafika kimi lathi: |
| 2. | Ndodana yomuntu, tshono kuFaro inkosi yeGibhithe lakubo bonke abantu bakhe uthi: Ufanana lobani ebukhulwini bakho? |
| 3. | Khangela, ngizafananisa iAsiriya lomsedari oseLebhanoni, olengatsha ezinhle ezinika umthunzi eguswini, omude kakhulu, olezihloko ezifinyelela emayezini. |
| 4. | Amanzi awuthelela, lamanzi angaphansi awukhulisa, imifula yawo yageleza yazingelezela indawo ohlanyelwe kiyo, yakhuphela imisele yayo kuzo zonke izihlahla zeganga. |
| 5. | Waphakama-ke, wazedlula zonke izihlahla zegusu, ingatsha zawo zaba zinkulu zabande, ngenxa yobunengi bamanzi empandeni zawo. |
| 6. | Zonke inyoni zamazulu zakhela izidleke zazo engatsheni zawo, lenyamazana zonke zeganga zazalela ngaphansi kwengatsha zawo, langaphansi komthunzi kwahlala izizwe zonke ezinkulu. |
| 7. | Wawumuhle ngobukhulu bawo, langobude bengatsha zawo, ngoba impande zawo zatshona zafika emanzini amanengi. |
| 8. | Imisedari yensimini kaNkulunkulu yayingeke ilinganiswe lawo, lamafiri ayingalingani lengatsha zawo; lomangwe wawungeke ulinganiswe lengatsha zawo, kwakungekho isihlahla ensimini kaNkulunkulu esihle njengawo. |
| 9. | Ngawenza wamuhle ngobunengi bengatsha zawo, lazo zonke izihlahla zeEdeni zawuhawukela, izihlahla ezazisensimini kaNkulunkulu. |
| 10. | Ngakho iNkosi uJehova ithi: Ngenxa yokuthi waba mude, izihloko zawo zathinta amayezi, inhliziyo yawo yaziphakamisa ngobude bawo, |
| 11. | ngizawunikela esandleni sesikhulu sezizweni; sizawuphatha ngokufanele ububi bawo. Sengiwulahlile. |
| 12. | Abezizweni abalesihluku kulazo zonke izizwe bazawuquma bawulahle; ingatsha zawo zizawela ezintabeni lezihotsheni; zizakwephukela ezifuleni zelizwe, labantu bonke bomhlaba basuke emthunzini wawo, bawutshiye. |
| 13. | Nxa usuwile, zonke inyoni zamazulu zizahlala phezu kwawo, lenyamazana zonke zeganga zihlale phezu kwengatsha zawo. |
| 14. | Lokhu kwenzelwa ukuze kungabi lasihlahla emanzini esikhula sibe side kakhulu, lezihloko zaso zithinte amayezi, kungabi lasihlahla esinatha amanzi esifinyelela emayezini; ngoba zonke zimiselwe ukufa, ziye elizweni elingaphansi komhlaba, njengabantu abafileyo abehlela phansi egodini. |
| 15. | INkosi uJehova ithi: Lapho umkusu usuwehlele endaweni yabafileyo, ngizakwenza okungaphansi komhlaba kuwulilele, ngimise imifula yawo, ngivimbele amanzi amanengi. Ngizasibekela iLebhanoni ngomnyama ngenxa yawo, lezihlahla zonke zizadana ngenxa yawo. |
| 16. | Ngizakwenza zonke izizwe zithuthumele ngomdumo wokuwa kwawo, lapho ngiwuphosela esihogweni kanye lalabo abehlela egodini. Zonke izihlahla zeEdeni, ezikhethiweyo lezinhle zeLebhanoni, zonke ezinatha amanzi, zizaduduzwa elizweni elingaphansi komhlaba. |
| 17. | Lazo zizakuya esihogweni kanye lawo, kubo ababulewe ngenkemba. Yebo, labo abahlala ngaphansi komthunzi wawo phakathi kwezizwe bazabhubha. |
| 18. | Pho-ke, wena ufanana lobani ngodumo langobukhulu ezihlahleni zeEdeni? Uzakwehliselwa elizweni elingaphansi komhlaba lezihlahla zeEdeni, ulale phakathi kwabangasokanga, kanye labo ababulewe ngenkemba. Lo nguFaro lexuku lakhe lonke, kutsho iNkosi uJehova. |
| ← Ezekiel (31/48) → |