| ← Ezekiel (30/48) → |
| 1. | Ilizwi le Nkosi lafika kimi lathi: |
| 2. | Ndodana yomuntu, profetha uthi: INkosi uJehova ithi: Maye ngalolosuku! |
| 3. | Usuku selusondele, usuku lwe Nkosi selusondele, luzakuba lusuku olulamayezi, isikhathi sokuchitheka kwezizwe. |
| 4. | Inkemba izakwehlela eGibhithe, losizi lube khona eEtiyopiya, lapho abanengi bebulawa eGibhithe, lenotho yalo ithunjwa, lezisekelo zalo zidilizelwa phansi. |
| 5. | IEtiyopiya lePuti leLudi leArabhiya lonke leLibiya labantu belizwe abahlangene labo bazabulawa kanye labo. |
| 6. | I Nkosi ithi: Labo abasekela iGibhithe bazakufa, lamandla ayo aziphakamisileyo ehliselwe phansi; kusukela eMigidoli ngenyakatho kuze kube seSiyene ngeningizimu bazakuwa ngenkemba, kutsho iNkosi uJehova. |
| 7. | Ilizwe lizachitheka okwedlula amazwe wonke achithekileyo, lemizi yalo ibe phakathi kwemizi echithekileyo. |
| 8. | Khona bazakwazi ukuthi ngiyi Nkosi, lapho sengithungele iGibhithe ngomlilo labo bonke abasizi bayo sebechithiwe. |
| 9. | Ngalolosuku izithunywa ezilesiqubu zizasuka kimi ukwesabisa amaEtiyopiya angethuswanga lutho, ehlelwe lusizi ngalolosuku lokuchitheka kwamaGibhithe, ngoba khangela, usuku luyeza. |
| 10. | INkosi uJehova ithi: Ngizaqeda inotho yeGibhithe ngesandla sikaNebukadinezari inkosi yeBhabhiloni. |
| 11. | Yena labantu bakhe, abesabeka okwedlula izizwe zonke, bazakuza ukulichitha ilizwe; bazayihlasela iGibhithe ngenkemba zabo, bagcwalise ilizwe ngezidumbu. |
| 12. | Ngizakwenza umfula iNile utshe, ngithengise ilizwe ebantwini ababi, ngilichithe ilizwe lakho konke okukilo ngezandla zabezizwe; mina Nkosi ngikhulumile. |
| 13. | INkosi uJehova ithi: Ngizachitha izithombe, ngiqede onkulunkulu bamanga eMemfisi; kungabe kusaba khona isiphathamandla elizweni leGibhithe, ngilethe ukwesaba elizweni leGibhithe. |
| 14. | Ngizachitha iPatrosi, ngithungele iZowani ngomlilo, ngizenze izigwebo phakathi kweNo. |
| 15. | Ngizakwehlisela ulaka lwami phezu kweSini, eyinqaba yeGibhithe, ngiqede ixuku leNo. |
| 16. | Ngizathungela iGibhithe ngomlilo, leSini ibe lobuhlungu obukhulu. Imiduli yeNo izafohlelwa, lezimpophoma zamanzi zitheleke phakathi kwayo. |
| 17. | Amajaha eOni lawePibesethi azakuwa ngenkemba, labesifazana bathunjwe. |
| 18. | ETahafanesi ukukhanya kuzakuba mnyama, lapho engiqeda khona ukubusa kweGibhithe, lamandla aziphakamisileyo azaphela, lamayezi afike phezu kwayo, kuthunjwe lamadodakazi ayo. |
| 19. | Ngokunjalo ngizakwenza izigwebo eGibhithe. Khona-ke bazakwazi ukuthi ngiyi Nkosi. |
| 20. | Ngomnyaka wetshumi lanye, ngosuku lwesikhombisa enyangeni yokuqala, ilizwi le Nkosi lafika kimi lathi: |
| 21. | Ndodana yomuntu, ngiyephule ingalo kaFaro inkosi yeGibhithe, khangela, kayibotshwanga, ukuthi ipholiswe yikufakwa uhlaka, ukuze iqinele ukuphatha inkemba. |
| 22. | Ngakho-ke iNkosi uJehova ithi: Khangela, ngimelene loFaro inkosi yeGibhithe, ngizakwephula ingalo zakhe, ingalo eqinileyo lengalo eyephukileyo, ngenze inkemba iphunyuke esandleni sakhe. |
| 23. | Ngizachithachitha amaGibhithe phakathi kwezizwe, ngiwahlakazele emazweni wonke. |
| 24. | Ngizaqinisa ingalo zenkosi yeBhabhiloni, ngibeke inkemba yami esandleni sayo; kodwa ngizakwephula ingalo zikaFaro, abubule phambi kwayo njengomuntu olimele kubi. |
| 25. | Ngizaqinisa ingalo zenkosi yeBhabhiloni, kodwa ingalo zikaFaro zizakuwa; bazakwazi ukuthi ngiyi Nkosi. Nxa sengifakile inkemba yami esandleni senkosi yeBhabhiloni, izayiphakamisela elizweni leGibhithe; |
| 26. | ngizachithachitha amaGibhithe phakathi kwezizwe, ngiwahlakazele emazweni wonke. Khona bazakwazi ukuthi ngiyi Nkosi. |
| ← Ezekiel (30/48) → |