| ← Ezekiel (19/48) → |
| 1. | Khala isililo ngezikhulu zakoIsrayeli, |
| 2. | uthi: Yeka isilwanekazi esasingunyoko! Salala phakathi kwezilwane, sondla imidlwane yaso phakathi kwamabhongo ezilwane. |
| 3. | Sakhulisa omunye wemidlwane yaso, waba libhongo lesilwane, wafunda ukubamba impango, wadla abantu. |
| 4. | Izizwe zahlabelana umkhosi ngawo, wawela emgodini wazo, zawukhupha ngezingwegwe, zawusa elizweni leGibhithe. |
| 5. | Nxa sibona ukuthi sehlulekile, lokuthi ithemba laso liphelile, sathatha omunye wemidlwane yaso, sawenza waba libhongo lesilwane. |
| 6. | Wahambahamba phakathi kwezilwane, waba libhongo lesilwane, wafunda ukubamba impango, wadla abantu. |
| 7. | Wabhidliza inqaba zabo, wachitha imizi yabo. Ilizwe lamangala labo bonke ababekilo ngenxa yokubhonga kwawo. |
| 8. | Izizwe zaseziwuhlasela zivela emazweni awuzingelezeleyo; zaphosela amambule azo phezu kwawo, wawela emgodini wazo. |
| 9. | Zawufaka endlwaneni ngezingwegwe, zawusa enkosini yeBhabhiloni, zawuvalela enqabeni ukuze ilizwi lawo lingabe lisazwakala futhi phezu kwentaba zakoIsrayeli. |
| 10. | Unyoko wayenjengesihlahla sevini esivinini esigxunyekwe emanzini, esilezithelo lamahlamvu amanengi ngenxa yamanzi amanengi. |
| 11. | Isigodo saso esiqinileyo saba yintonga yombusi; isihlahla sasiside siphakeme phakathi kwengatsha eziqatha, sibonakala ngobude baso langobunengi bengatsha zaso. |
| 12. | Kodwa isihlahla sevini sasitshunwa ngokuthukuthela saphoselwa phansi, lomoya wempumalanga wasomisa, lezithelo zaso zaphephuka, isigodo saso esiqinileyo soma, umlilo wasitshisa. |
| 13. | Khathesi sesigxunyekwe enkangala, elizweni elitshisayo lelomileyo. |
| 14. | Umlilo ulumethe esigodweni saso, watshisa ingatsha zaso lezithelo zaso, ukuze kungasali isigodo esiqinileyo sokwenza intonga yombusi. Lesi yisililo esesisetshenziswa. |
| ← Ezekiel (19/48) → |