| ← Ezekiel (12/48) → |
| 1. | Ilizwi le Nkosi lafika kimi lathi: |
| 2. | Ndodana yomuntu, wena uhlala phakathi kwabantu abahlamukayo abalamehlo okubona, kodwa bengaboni, abalendlebe zokuzwa, kodwa bengezwa; |
| 3. | ngoba bangabantu abahlamukayo. Ngakho-ke, wena ndodana yomuntu, lungisa umthwalo womuntu othunjiweyo, usuke emini uhambe phambi kwabo njengomuntu othunjiweyo, usuke endaweni yakho uye kwenye indawo phakathi kwabo. Mhlawumbe bazaqedisisa lanxa bengabantu abahlamukayo. |
| 4. | Uzakhupha umthwalo wakho emini phambi kwabo, ube njengomthwalo womuntu othunjiweyo, usuke wena ntambama phambi kwabo, uhambe njengomuntu othunjiweyo. |
| 5. | Ubhoboze umduli phambi kwabo, untshungubale kiwo. |
| 6. | Nxa sekuhwalala uthathe umthwalo wakho, uwetshate ehlombe phambi kwabo, uwuthwale ugubuzele ubuso bakho ukuze ungaboni ilizwe. Ngikwenza ube yisixwayiso koIsrayeli. |
| 7. | Ngasengisenza njengokutshelwa kwami. Ngawukhupha umthwalo wami emini, waba njengomthwalo wothunjiweyo. Kwathi kusihlwa ngabhoboza umduli ngezandla zami, ngantshungubala emnyameni, ngetshete umthwalo wami phambi kwabo. |
| 8. | Kusasa ilizwi le Nkosi lafika kimi lathi: |
| 9. | Ndodana yomuntu, kabatshongo kuwe yini indlu kaIsrayeli, abantu abahlamukayo, ukuthi: Wenzani? |
| 10. | Ubokuthi kibo: INkosi uJehova ithi: Lelilizwi lingesikhulu seJerusalema langendlu yonke kaIsrayeli ayephakathi kwabo. |
| 11. | Ubatshele ukuthi uyisixwayiso kibo; lokho okwenzileyo kuzakwenziwa kibo, bazathunjwa. |
| 12. | Isiphathamandla sabo sizakwetshata umthwalo waso emnyameni, sintshungubale embotsheni sigubuzele ubuso baso, ukuze singaboni ilizwe. |
| 13. | Kodwa ngizaphosa imbule lami phezu kwaso, ngisibambe ngalo, ngisise eBhabhiloni elizweni lamaKhaladiya; kanti kasiyikulibona, loba sizafela khona. |
| 14. | Ngizabachithachithela emimoyeni yonke wonke amanxusa aso, labasizi baso lawo wonke amabutho aso, ngibalandele ukubabulala. |
| 15. | Bazakwazi ukuthi ngiyi Nkosi nxa sengibahlakazele ezizweni zonke, ngabachithachithela emazweni. |
| 16. | Kodwa ngizatshiya abalutshwana baphephe enkembeni lendlaleni lakumatshayabhuqe wesifo, ukuze bafakaze ngawo wonke amanyala abo phakathi kwezizwe abazahamba kuzo, ukuze zazi ukuthi ngiyi Nkosi. |
| 17. | Ilizwi le Nkosi lafika kimi futhi lathi: |
| 18. | Ndodana yomuntu, dlana ukudla kwakho ngokuthuthumela, unathe amanzi ngokuqhaqhazela lokwesaba, |
| 19. | uthi ebantwini belizwe: INkosi uJehova ithi ngabakhileyo eJerusalema abasekhona elizweni lakoIsrayeli: Bazakudla ukudla kwabo besesaba, banathe amanzi beqhaqhazela, ngoba ilizwe labo lizaphundlwa konke elilakho ngenxa yesihluku salabo abahlala kilo. |
| 20. | Imizi okuhlalwa kiyo izachithwa, lelizwe libe yinkangala; lizakwazi ukuthi ngiyi Nkosi. |
| 21. | Ilizwi le Nkosi lafika kimi lathi: |
| 22. | Ndodana yomuntu, sithini lesisaga esitshiwoyo ngelizwe lakoIsrayeli esokuthi: Insuku ziyadlula, lemibono yonke ilize? |
| 23. | Batshele uthi: INkosi uJehova ithi: Ngizasiqeda lesisaga, kabasayikusisebenzisa koIsrayeli. Uthi kibo: Insuku zisondele, kanye lokugcwaliseka kwemibono yonke. |
| 24. | Ngoba kakusayikuba khona umbono wamanga, lokuvumisa okukhohlisayo koIsrayeli. |
| 25. | Kodwa mina Nkosi ngizakhuluma engikuthandayo; engikutshoyo yikho okuzakwenzeka, kungaphuzi lokho engikukhulumayo; ngizakwenza ensukwini zenu, lina bantu abahlamukayo, kutsho iNkosi uJehova. |
| 26. | Laselifika ilizwi le Nkosi lisithi |
| 27. | Ndodana yomuntu, khangela, abakoIsrayeli bathi: Umbono awubonayo ungowe nsuku ezikhatshana, lalokho akuprofethayo kungokwesikhathi esikhatshana. |
| 28. | Ngakho wothi kibo: INkosi uJehova ithi: Kakusayikuphuza lelilodwa emazwini ami, kodwa ilizwi engilikhulumayo lizakwenzeka, kutsho iNkosi uJehova. |
| ← Ezekiel (12/48) → |