← Ezekiel (10/48) → |
1. | Ngasengibona, khangela, emkhathini owawungaphezu kwamakherubi* okunjengelitshe elithiwa yisafire* kufanana lesihlalo sobukhosi. |
2. | Yasisithi emuntwini ogqoke ilembu elicolekileyo: Ngena phakathi kwamavili atshibilika ngaphansi kwamakherubi*, ugcwalise izandla zakho ngamalahle avuthayo avela phakathi kwamakherubi*, uwachithele phakathi komuzi. Ngambonake engena. |
3. | Amakherubi* ayemi ngeningizimu kwethempeli ekungeneni kwalowomuntu, lamayezi ayegcwele egumeni elingaphakathi. |
4. | Inkazimulo ye Nkosi yasuka emakherubini*, yaya emnyango wethempeli; ithempeli lagcwala amayezi, leguma lagcwala ukukhanya kwenkazimulo ye Nkosi. |
5. | Umdumo wempiko zamakherubi* wezwakala legumeni elingaphandle, njengelizwi likaNkulunkulu uSomandla nxa ekhuluma. |
6. | Lapho imtshela umuntu ogqoke ilembu elicolekileyo isithi: Thatha umlilo phakathi kwamavili atshibilikayo phakathi kwamakherubi*; wangena wema phansi kwevili. |
7. | Elinye lamakherubi lelulela isandla salo emlilweni owawuphakathi kwamakherubi*, lawuthatha, lawufaka ezandleni zalowomuntu owayembethe ilembu elicolekileyo; yena wawuthatha, waphuma. |
8. | Kwabonakala kiwo amakherubi* okufanana lesandla somuntu kungaphansi kwempiko zawo. |
9. | Ngabona, khangela, amavili amane eceleni kwamakherubi*, ivili elilodwa liphansi kwekherubi* ngalinye. Amavili ayecwazimula njengelitshe elithiwa yitopazi*. |
10. | Amavili womane ayefanana kungathi alivili phakathi kwevili. |
11. | Ekuhambeni kwawo amakherubi aqonda loba kuluphi lwezinhlangothi zozine, engatshibiliki, kodwa aqonda lapho akhangele khona. |
12. | Yonke imizimba yawo lemihlana yawo lezandla zawo lempiko zawo lamavili kwakugcwele amehlo indawo zonke. |
13. | Amavili wona ngezwa kuthiwa ngamavili atshibilikayo. |
14. | Wonke ayelobuso obune; ubuso bokuqala bungobekherubi*, ubuso besibili bungobomuntu, ubuso besithathu bungobesilwane, lobuso besine bungobelinqe. |
15. | Amakherubi* aphakama-ke, ayeyizo izidalwa eziphilayo engazibona emfuleni iKebari. |
16. | Lapho amakherubi* ehamba, lamavili ahamba eceleni kwawo; lalapho amakherubi* ephakamisa impiko zawo ukuze aphaphe, amavili kawasukanga kiwo. |
17. | Lapho esima, lawo ema; lalapho ephakama, lawo aphakama; ngoba umoya wezidalwa eziphilayo wawukiwo. |
18. | Yasisuka inkazimulo ye Nkosi emnyango wethempeli, yema ngaphezu kwamakherubi.* |
19. | Amakherubi* aphakamisa impiko zawo, asuka phansi ngiwabona, lamavili ehamba lawo, aze ema esangweni elingempumalanga kwethempeli; inkazimulo kaNkulunkulu kaIsrayeli yayingaphezu kwawo. |
20. | Yizo lezi izidalwa eziphilayo engazibona ngaphansi kukaNkulunkulu kaIsrayeli emfuleni iKebari; ngazi ukuthi ngamakherubi*. |
21. | Zonke zazilobuso obune, zilempiko ezine, langaphansi kwempiko zazo kwakukhona okufanana lezandla zomuntu. |
22. | Ubuso bazo babunjengalobo engabubona embonweni emfuleni iKebari. Zazihamba zonke ziqonda phambili. |
← Ezekiel (10/48) → |