| ← Daniel (8/12) → |
| 1. | Ngomnyaka wesithathu wokubusa kwenkosi uBelishazari kwabonakala umbono kimi mina Daniyeli, emva kwalowo owabonakala kimi kuqala. |
| 2. | Ngabona embonweni kungathi ngiseSusa emzini omkhulu welizwe iElamu; ngabonake embonweni kungathi ngisemfuleni iUlayi. |
| 3. | Nga phakamisa amehlo ami, khangela, inqama imi ekhunjini lomfula. Yayilempondo ezimbili, impondo zombili, zazinde, olwesibili lulude okwedlula olunye. |
| 4. | Ngayibona inqama igqikilela ngentshonalanga langenyakatho langeningizimu; kwakungelanyamazana eyayingema phambi kwayo kwakungekho muntu ongaphephisa lutho emandleni ayo; yayizenzela santando, yazikhukhumeza. |
| 5. | Kwathi ngisacabanga, khangela, kwaqhamuka impongo ivela ngentshonalanga idabula umhlaba wonke, inganyatheii phansi. Yayilophondo oluqaphileyo phakathi kwamehlo ayo. |
| 6. | Yafika enqameni elempondo ezimbili engangiyibone imi ekhunjini lomfula, yayisukela ekuthukutheleni kwayo okukhulu. |
| 7. | Ngayibona isondela enqameni, yayithukuthelela kakhulu, yayitshaya, yephula impondo zayo zombili. Inqama yayingelamandla okuyimela; impongo yayiwisela phansi, yayihlifiza; kwakungekho owayengayephula inqama emandleni ayo. |
| 8. | Impongo yazikhukhumeza kakhulu; kodwa kwathi isilamandla, uphondo lwayo olukhulu lwephuka, endaweni yalo kwaphuma impondo ezine eziqaphileyo zikhangele emagumbini amane amazulu. |
| 9. | Kolunye lwazo kwaphuma uphondo oluncinyane, lwakhula kakhulu, lwatshengisa amandla ayo enginizimu lempumalanga laselizweni elihle. |
| 10. | Lwakhula lwaba lukhulu lwaze lwafinyelela ebuthweni lamazulu; lwazidilizela phansi ezinye inkanyezi, lwazinyathela. |
| 11. | Lwazikhukhumeza lwaze lwalingana lenkosi yezinkanyezi. Lwamisa iminikelo yayo etshiswa insuku zonke, lwadiliza indlu yayo engcwele, |
| 12. | lwanikela lezinkanyezi; lwafaka okubi esikhundleni somnikelo, lwaphosela phansi iqiniso, luphumelela kukho konke. |
| 13. | Ngasengisizwa ongcwele okhuluma, lomunye owathi kulowo okhulumayo: Koze kube nini lumbono usiba khona owomnikelo otshiswa insuku zonke? Koze kube nini isono esichithayo sisenziwa? Koze kube nini kuyekelwa indawo engcwele lezinkanyezi ukuthi zinyathelwe phansi? |
| 14. | Wathi kuye: Kuzaze kube yizikhathi zokuhlwa lezokusa eziyizinkulungwane ezimbili lamakhulu amathathu zokunikelwa kweminikelo; besekulungiswa indawo engcwele. |
| 15. | Kwathi sengiwubonile umbono, mina Daniyeli, ngazama ukuwuqedisisa. Khangela, kwasekusima phambi kwami othile olesimo somuntu. |
| 16. | Ngezwa ilizwi lomuntu phakathi komfula iUlayi, limemeza lisithi: Gabriyeli, yenza lumuntu ukuthi awuqedisise umbono. |
| 17. | UGabriyeli wasesondela lapho engimi khona. Esefikile ngatshaywa luvalo, ngathi mbo ngobuso phansi. Kodwa yena wathi kimi: Ndodana yomuntu, qedisisa ukuthi umbono ungowesikhathi sokucina. |
| 18. | Kwathi esakhuluma lami, ngaqaleka ngawela phansi; kodwa wangithinta, wasengiphakamisa engimisa ngenyawo. |
| 19. | Wathi: Khangela, ngizakutshela okuzakwenzeka ekupheleni kwentukuthelo, ngoba ukucina kuzakuba ngesikhathi esimisiweyo. |
| 20. | Mayelana lenqama oyibonileyo ilempondo ezimbili, zona zingamakhosi aseMede lamaPerisiya. |
| 21. | Impongo iyinkosi yamaGriki, lophondo olukhulu phakathi kwamehlo ayo luyinkosi yokuqala. |
| 22. | Uphondo olwephukayo, okwakhula impondo ezine endaweni yalo, lokhu kuyimibuso emine ezavela esizweni sayo, kodwa ingabi lamandla ayo. |
| 23. | Ensukwini zokucina zaleyomibuso, lapho izono zayo sezizinkulu, kuzavela inkosi elolunya elukhuni lekhohlisayo. |
| 24. | Izakuba lamandla amakhulu, ilethe ukuchitheka okwesabekayo, iphumelele kulokho ekwenzayo, ichithe amaqhawe labantu babangcwele. |
| 25. | Ngobuqili bayo izakwenza inkohliso iphumelele, izikhukhumeze engqondweni yayo, ichithe abanengi ngokubajuma, ize imelane leNkosi yamakhosi, kodwa izaphohlozwa kungeyisikho ngezandla zomuntu. |
| 26. | Umbono wezikhathi zokuhlwa lezokusa osulandisiwe uliqiniso. Kodwa kawube yimfihlo, ngoba ungowensuku ezinengi ezizayo. |
| 27. | Mina Daniyeli, ngasengiphela amandla, ngagula insuku ezithile; ngavuka ngenza umsebenzi wenkosi, kodwa ngamangaliswa yilowombono, kangaze ngawuqedisisa. |
| ← Daniel (8/12) → |