| ← Daniel (12/12) |
| 1. | Ngalesosikhathi kuzavela uMikayeli, umbusi omkhulu olinda abantu bakini. Kuzakuba khona isikhathi sokuhlupheka esingazanga sibe khona kusukela ekuqaleni kwezizwe kuze kube ngalesosikhathi. Kodwa ngalesosikhathi bazakhululwa abantu bakini, bonke ababhaliweyo egwalweni. |
| 2. | Labanengi abaleleyo ethulini lomhlaba bazavuka, abanye bavukele impilo elaphakade, labanye bavukele ihlazo lokuhlekwa okulaphakade. |
| 3. | Abahlakaniphileyo bazakhanya njengokukhanya kwesibhakabhaka, lalabo abaphendulela abanengi ekulungeni bakhanye njengezinkanyezi kuze kube nininini. |
| 4. | Kodwa, wena Daniyeli, vala amazwi, unameke incwadi, kuze kube sesikhathini sokuphela. Abanengi bazazula baye le lale, lobubi buzabalokhu busanda. |
| 5. | Ngasengibona, mina Daniyeli, khangela-ke, ababili bemi, omunye enganeno komfula lomunye engaphetsheya. |
| 6. | Ngathi kulowomuntu ogqoke ilembu elicolekileyo, owayemi ngaphezu komfula: Kuzakuba nini ukuphela kwalezizimangaliso? |
| 7. | Lowomuntu ogqoke ilembu elicolekileyo, owayemi ngaphezu komfula, waphakamisela isandla sokunene lesandla sakhe sokhohlo emazulwini; ngamuzwa efunga ngalowo ophila kuze kube nininini ukuthi kuzakuba yisikhathi esimisiweyo, izikhathi ezimisiweyo, lengxenye eyodwa kwezimbili. Lapho sekuphelile ukufohlozwa kwamandla abantu abangcwele, zonke lezizinto zizaphela. |
| 8. | Ngezwa, kodwa kangiqedisisanga. Ngasengisithi: Nkosi yami, kuzakuba yini ukuphela kwalezizinto? |
| 9. | Wathi: Hamba kuhle, Daniyeli, ngoba amazwi avaliwe, ananyekwa kuze kube yisikhathi sokuphela. |
| 10. | Abanengi bazazihlambulula, bazenze babe mhlophe, balungiswe; kodwa ababi bazakwenza kubi, kungabi khona loyedwa wababi oqedisisayo; kodwa labo abahlakaniphileyo bazaqedisisa. |
| 11. | Kusukela esikhathini sokususwa komnikelo otshiswa insuku zonke, lamanyala aletha ukuchitheka esemisiwe, kuzakuba zinsuku eziyinkulungwane lamakhulu amabili lamatshumi ayisificamunwemunye. |
| 12. | Ubusisiwe olindayo aze afinyelele ensukwini eziyinkulungwane lamakhulu amathathu lamatshumi amathathu lanhlanu. |
| 13. | Hamba-ke kuze kube sekupheleni; usuphumule, uzavuka ukuze uzuze okufaneleyo ekupheleni kwesikhathi. |
| ← Daniel (12/12) |