← Daniel (10/12) → |
1. | Ngomnyaka wesithathu kaKurosi inkosi yePerisiya ilizwi lembulelwa uDaniyeli, owayethiwa nguBeliteshazari. Lelolizwi laliqinisiIe, kodwa kwakulukhuni ukuliqedisisa. Waliqedisisa ngombono. |
2. | Ngalezonsuku, mina Daniyeli ngangilila okwamaviki amathathu. |
3. | Kangidlanga okumnandi lenyama, kanginathanga lewayini, futhi kangigcobanga okwamaviki amathathu agcweleyo. |
4. | Ngosuku lwamatshumi amabili lane ngenyanga yokuqala, lapho ngangimi ekhunjini lomfula omkhulu othiwa iTigrisi, |
5. | ngaphakamisa amehlo ami, ngabona, khangela, umuntu egqoke ilembu elicolekileyo, ebophe ngebhanti legolide leOfiri ekhalweni lwakhe. |
6. | Umzimba wakhe wawunjengelitshe elithiwa yibherule*, lobuso bakhe bunjengokuphazima kombane, lamehlo akhe enjengezihlanti* ezivuthayo, ingalo lemibala yakhe kunjengokukhazimula kwethusi elikhazimulayo, lokuzwakala kwelizwi lakhe kunjengomsindo wexuku. |
7. | Yimi ngedwa engabona lowombono, ngoba abantu ababelami kabawubonanga, kodwa behlelwa yikuthuthumela okukhulu, babaleka ukuze bacatshe. |
8. | Ngakho-ke ngasengisala ngedwa, ngawubona lumbono omkhulu, ngaphelelwa ngamandla, ubuso bami baguquka kubi. |
9. | Ngasengisizwa ilizwi lakhe; lapho ngilizwa, ngathi mbo ngobuso phansi, ngaqaieka. |
10. | Khangela, ngasengibanjwa yisandla, sangimisa ngezandla zami langamadolo ngilokhu ngithuthumela. |
11. | Wathi kimi: Daniyeli, wena muntu othandekayo kakhulu, zwana lamazwi engiwakhuluma kuwe; sukuma ume, ngoba sengithunywe kuwe. Kwathi ekhuluma lelilizwi kimi, ngasukuma ngithuthumela. |
12. | Wasesithi kimi: Ungesabi, Daniyeli, ngoba kusukela esukwini lokuqala owazama ngalo ukusebenzisa ingqondo yakho ukuze uqedisise, wazithoba phambi kukaNkulunkulu wakho, amazwi akho ezwakele, ngizile ngenxa yamazwi akho. |
13. | Umbusi wesizwe samaPerisiya wamelana lami insuku ezingamatshumi amabili lanye; kodwa khangela, uMikayeli omunye wababusi abakhulu weza ukungisiza; ngoba ngangitshiywe ngedwa embusweni sePerisiya, |
14. | ngizile ukuthi ngikwenze uqedisise okuzakwehlela abantu bakini ensukwini zokucina. Lo ngumbono ngensuku ezizayo. |
15. | Esekhulumile kimi lawomazwi, ngakhangelisa ubuso bami phansi, ngaba yisimungulu. |
16. | Khangela, okunye okufanana lomuntu kwathinta umlomo wami; ngavula umlomo wami, ngakhuluma. Ngathi kulowo omi phambi kwami: Nkosi yami, ngenxa yombono ngifikelwe yibuhlungu, kangiselawo amandla. |
17. | Mina-ke, inceku yeNkosi yami, ngingakhuluma ngithini eNkosini yami? Ngoba kangiselawo amandla, sengisehluleka lokuphefumula. |
18. | Wasengithinta futhi lowo olesimo somuntu, wangiqinisa. |
19. | Wasesithi: Wena muntu othandekayo kakhulu, ungesabi; ukuthula kakube kuwe, qina ume isibindi. Kwathi lapho ekhuluma lami ngaqina, ngasengisithi: Kayikhulume iNkosi yami, ngoba isingiqinisile. |
20. | Wasesithi: Uyazi ukuthi ngizeleni kuwe? Kodwa khathesi ngizabuyela ukulwa lombusi wePerisiya; kuthi lapho sengimehlule, khangela, kufike umbusi wamaGriki. |
21. | Kodwa ngizakutshela okubhaliweyo encwadini yeqiniso; kakho loyedwa oziqinisa lami ukumelana labo ngaphandle kukaMikayeli umbusi wenu. |
← Daniel (10/12) → |