| Daniel (1/12) → |
| 1. | Ngomnyaka wesithathu wokubusa kukaJehoyakhimi inkosi yakoJuda, uNebukadinezari inkosi yeBhabhiloni wafika eJerusalema, wayivimbezela. |
| 2. | INkosi yanikela uJehoyakhimi inkosi yakoJuda esandleni sakhe, lengxenye yezitsha zendlu kaNkulunkulu. UNebukadinezari wazisa elizweni leShinari, endlini kaNkulunkulu wakhe, wazibeka endlini yenotho. |
| 3. | Waselaya uAshipenazi induna yabathenwa bayo ukuthi ilethe ingxenye yabantwana bakoIsrayeli, abozalo lwesikhosini kanye leziphathamandla, |
| 4. | abangamajaha angelasici, abukekayo, ahlakaniphileyo, alolwazi, akwaziyo ukufunda, lalamandla okusebenza esigodlweni senkosi, bafundiswe izincwadi lolimi lwamaKhaladiya. |
| 5. | Inkosi yabamisela isabelo sokudla kwabo kwensuku zonke, okumnandi okudliwa yinkosi, lewayini elinathayo. Babezafundiswa iminyaka emithathu, kuthi ekupheleni kwayo balethwe enkosini ukuyisebenzela. |
| 6. | Phakathi kwabo kwakukhona oDaniyeli loHananiya loMishayeli loAzariya, abesizwe sakoJuda. |
| 7. | Induna yabathenwa yabatha amanye amabizo; uDaniyeli yathi nguBeliteshazari, loHananiya yathi nguShadraki, loMishayeli yathi nguMeshaki, loAzariya yathi nguAbedinego. |
| 8. | Kodwa uDaniyeli wazimisela ukuthi angazingcolisi ngokudla kwenkosi okumnandi, langewayini eyayilinatha. Ngakho-ke wasecela induna yabathenwa ukuthi imvumele angazingcolisi. |
| 9. | UNkulunkulu wamnika uDaniyeli umusa lesihawu enduneni yabathenwa; |
| 10. | induna yabathenwa yathi kuDaniyeli: Ngiyesaba ukuthi inkosi yami elimisele ukudla lokunathwayo izabona ukuthi wena ucakile kulamanye amajaha ayintanga yakho; ubusungifaka engozini yokubulawa yinkosi. |
| 11. | UDaniyeli wasesithi encekwini eyayimiswe induna yabathenwa ukuphatha uDaniyeli loHananiya loMishayeli loAzariya: |
| 12. | Ake ulinge inceku zakho okwensuku ezilitshumi, usinike imibhida kuphela ukuze sidle yona sinathe lamanzi. |
| 13. | Ubusukhangela isimo sethu, lesimo samajaha adla ukudla kwenkosi okumnandi, wenzeke njengalokho okubonayo ezincekwini zakho. |
| 14. | Inceku yasilalela lokhu, yabalinga okwensuku ezilitshumi. |
| 15. | Ekupheleni kwensuku ezilitshumi babonakala bengcono bezimukile enyameni kulawo wonke amajaha ayesidla ukudla kwenkosi okumnandi. |
| 16. | Ngakho-ke inceku yasisusa ukudla kwabo okumnandi kanye lewayini ababezalinatha, yabanika imibhida kuphela. |
| 17. | Lamajaha amane uNkulunkulu wawanika ukwazi lamandla okufunda izincwadi, kanye lokuhlakanipha. Njalo uDaniyeli wayelokuqedisisa ngayo yonke imibono lamaphupho. |
| 18. | Ekupheleni kwesikhathi, lapho inkosi isitshilo ukuthi lamajaha angeniswe esigodlweni, induna yabathenwa yawaletha phambi kukaNebukadinezari. |
| 19. | Inkosi yakhuluma labo; phakathi kwawo wonke kwakungekho owayefanana loDaniyeli loHananiya loMishayeli loAzariya; basebeqalisa ukuyisebenzela inkosi. |
| 20. | Ezintweni zonke zokuhlakanipha lezokuqedisisa inkosi eyayibabuza ngazo, yabathola besedlula ngokuphindwe katshumi zonke izanuse lezangoma ezazisembusweni wayo. |
| 21. | UDaniyeli waqhubeka kwaze kwaba ngumnyaka wokuqala wokubusa kwenkosi uKurosi. |
| Daniel (1/12) → |