| ← Amos (6/9) → |
| 1. | Maye kubo abachelesileyo eZiyoni labalondolozekileyo entabeni yeSamariya, amadoda adumileyo esizwe sokuqala abaya kuyo indlu kaIsrayeli! |
| 2. | Dlulelani eKaline libone, lisuke lapho liye eHamathi elikhulu, beselisehlela eGathi lamaFilisti. Bona bangcono kulalimibuso yini? Ilizwe labo likhulu kulelizwe lenu yini? |
| 3. | Lina elibeka khatshana usuku olubi lisondeze eduze isikhathi sobubi. |
| 4. | Maye kulabo abalala phezu kwemibheda eyenziwe ngophondo lwendlovu, bacambalale phezu kwemibheda yabo, badle inyama yamawundlu avela emhlanjini, leyamankonyana avela esibayeni, |
| 5. | betshotsha izingoma ngechacho beziqambela izinto zokukhaliswa njengoDavida, |
| 6. | benatha iwayini ngemiganu yokufafaza, bazigcobe ngamagcobo amahle, kodwa kabadabukeli ukuchitheka kukaJosefa. |
| 7. | Ngakho-ke bazathunjwa kuqala, kuphele ukuxokozela kwabacambalalayo. |
| 8. | INkosi uJehova ifungile ngayo uqobo, yathi: Ngiyanengwa yikuzigqaja kukaJakobe, ngizonda inqaba zakhe; ngizawunikela umuzi lakho konke okukuwo. |
| 9. | Kuzakuthi uba kusele amadoda alitshumi endlini yinye azakufa. |
| 10. | Lapho isihlobo somunye wawo esitshisa amathambo akhe sithatha amathambo ukuze siwakhuphe endlini, sithi kophakathi endlini isibili: Kusekhona omunye umuntu olawe yini? Yena uzakuthi: Hatshi. Thula, ungaliphathi ibizo le Nkosi. |
| 11. | Ngoba khangela, ngokulaya kwe Nkosi, izatshaya indlu enkulu ibe yizihlephu, lencinyane ibe yizicucu. |
| 12. | Kambe amabhiza angagijima emadwaleni yini? Kuyalinywa khona ngezinkabi yini? Liphendulele okufaneleyo kwaba ngumuthi obulalayo, lezithelo zokulunga zaba yinto ebabayo. |
| 13. | Lina elithokoza ngeLodebari lithi: Kasizithumbelanga iKarnayimi yini ngamandla ethu? |
| 14. | Ngoba khangelani, ng izalivusela isizwe, lina ndlu kaIsrayeli, kutsho i Nkosi uNkulunkulu wamabandla; sizalicindezela kusukela ekuyeni eHamathi kuze kube semfuleni wenkangala. |
| ← Amos (6/9) → |