← 2Chronicles (36/36) |
1. | Abantu belizwe basebethatha uJehowahazi indodana kaJosiya, bambeka waba yinkosi esikhundleni sikayise eJerusalema. |
2. | UJehowahazi wayeleminyaka engamatshumi amabili lantathu esiba yinkosi; wasebusa inyanga ezintathu eJerusalema. |
3. | Inkosi yeGibhithe yasimsusa eseJerusalema, yahlawulisa ilizwe amathalenta* esiliva alikhulu lethalenta legolide. |
4. | Inkosi yeGibhithe yasibeka uEliyakhimi umfowabo abe yinkosi phezu kukaJuda leJerusalema, yaguqula ibizo lakhe yathi nguJehoyakhimi. UNeko wasethatha uJehowahazi umfowabo wamletha eGibhithe. |
5. | UJehoyakhimi wayeleminyaka engamatshumi amabili lanhlanu esiba yinkosi; wasebusa iminyaka elitshumi lanye eJerusalema. Wenza okubi emehlweni e Nkosi uNkulunkulu wakhe. |
6. | Kwenyukela kuye uNebukadinezari inkosi yeBhabhiloni, wambopha ngamaketane ethusi, ukumusa eBhabhiloni. |
7. | UNebukadinezari waseletha okwezitsha zendlu ye Nkosi eBhabhiloni, wakufaka ethempelini lakhe eBhabhiloni. |
8. | Ezinye-ke zezindaba zikaJehoyakhimi, lamanyala akhe awenzayo, lokwatholakala kuye, khangela, kubhaliwe egwalweni lwamakhosi akoIsrayeli loJuda. UJehoyakhini indodana yakhe wasesiba yinkosi esikhundleni sakhe. |
9. | UJehoyakhini wayeleminyaka eyisificaminwembili esiba yinkosi; wasebusa inyanga ezintathu lensuku ezilitshumi eJerusalema. Wenza okubi emehlweni e Nkosi. |
10. | Lekuthwaseni komnyaka inkosi uNebukadinezari yathuma yamletha eBhabhiloni, kanye lezitsha eziloyisekayo zendlu ye Nkosi; yasibeka uZedekhiya umfowabo abe yinkosi phezu kukaJuda leJerusalema. |
11. | UZedekhiya wayeleminyaka engamatshumi amabili lanye esiba yinkosi; wasebusa iminyaka elitshumi lanye eJerusalema. |
12. | Wasesenza okubi emehlweni e Nkosi uNkulunkulu wakhe; kazithobanga phambi kukaJeremiya umprofethi, ekhuluma okomlomo we Nkosi. |
13. | Laye wasevukela inkosi uNebukadinezari eyayimfungise ngoNkulunkulu, wenza yaba lukhuni intamo yakhe, waqinisa inhliziyo yakhe, okokuthi kaphendukelanga e Nkosi ni, uNkulunkulu kaIsrayeli. |
14. | Futhi zonke induna zabapristi labantu banda ekuphambukeni ngeziphambeko njengawo wonke amanyala ezizwe, bayingcolisa indlu ye Nkosi eyayiyingcwelisile eJerusalema. |
15. | I Nkosi, uNkulunkulu waboyise, yasithuma kubo ngesandla sezithunywa zayo, ivuka ngovivi ithuma, ngoba yayilesihawu ebantwini bayo lendaweni yayo yokuhlala. |
16. | Kodwa babezihleka usulu izithunywa zikaNkulunkulu, bedelela amazwi akhe, beklolodela abaprofethi bakhe, lwaze lwavuka ulaka lwe Nkosi lwamelana labantu bayo kakwaze kwaba leselapho. |
17. | Ngakho yabenyusela inkosi yamaKhaladiya eyabulala amajaha abo ngenkemba endlini yendlu yabo engcwele, ingahawukeli ijaha lentombi, omdala lexhegu; yabanikela bonke esandleni sayo. |
18. | Lazo zonke izitsha zendlu kaNkulunkulu, ezinkulu lezincinyane, lezinto eziligugu zendlu kaJehova, lezinto eziligugu zenkosi lezeziphathamandla zayo, konke lokhu yakuletha eBhabhiloni. |
19. | Basebetshisa indlu kaNkulunkulu, badiliza umduli weJerusalema, batshisa zonke izigodlo zayo ngomlilo, batshabalalisa zonke izitsha zayo eziloyisekayo. |
20. | Yasithumbela eBhabhiloni abasele enkembeni; basebesiba zinceku zayo lezabantwana bayo kwaze kwaba yikubusa kombuso wePerisiya; |
21. | ukugcwalisa ilizwi le Nkosi ngomlomo kaJeremiya, ilizwe lize likholise amasabatha alo; lagcina isabatha zonke izinsuku zentshabalalo, kwaze kwagcwaliseka iminyaka engamatshumi ayisikhombisa. |
22. | Kwathi ngomnyaka wokuqala kaKurosi inkosi yePerisiya, ekugcwalisekeni kwelizwi le Nkosi ngomlomo kaJeremiya, i Nkosi yavusa umoya kaKurosi inkosi yePerisiya ukuthi edlulise isimemezelo embusweni wakhe wonke, njalo langombhalo, esithi: |
23. | Utsho njalo uKurosi inkosi yePerisiya: I Nkosi, uNkulunkulu wamazulu, inginikile yonke imibuso yomhlaba; layo ingilayile ukuyakhela indlu eJerusalema ekoJuda. Ngubani ophakathi kwenu kubo bonke abantu bayo? I Nkosi uNkulunkulu wakhe kayibe laye, enyuke. |
← 2Chronicles (36/36) |