| ← 1Kings (6/22) → |
| 1. | Kwasekusithi ngomnyaka wamakhulu amane lamatshumi ayisificaminwembili emva kokuphuma kwabantwana bakoIsrayeli elizweni leGibhithe, ngomnyaka wesine wokubusa kukaSolomoni koIsrayeli, ngenyanga kaZivi, eyinyanga yesibili, waqala ukwakha indlu ye Nkosi. |
| 2. | Njalo indlu inkosi uSolomoni eyayakhela uJehova, ubude bayo babuzingalo ezingamatshumi ayisithupha, lobubanzi bayo babungamatshumi amabili, lokuphakama kwayo kwakuzingalo ezingamatshumi amathathu. |
| 3. | Lekhulusi phambi kwethempeli lendlu, ubude balo babuzingalo ezingamatshumi amabili, njengobubanzi bendlu, ububanzi balo babuzingalo ezilitshumi phambi kwendlu. |
| 4. | Njalo wayenzela indlu amawindi abanzi ngaphandle kulangaphakathi. |
| 5. | Futhi emdulini wendlu wakha amakamelo inhlangothi zonke, imiduli yendlu inhlangothi zonke, esenzela ithempeli lendawo yelizwi. Wenza lezindlwana eziseceleni inhlangothi zonke. |
| 6. | Ikamelo elingaphansi kwawo wonke, ububanzi balo babuzingalo ezinhlanu, leliphakathi, ububanzi balo buzingalo eziyisithupha, lelesithathu, ububanzi balo buzingalo eziyisikhombisa. Ngoba ngaphandle kwendlu wenza izinciphiso inhlangothi zonke, ukuze imijabo ingagxunyekwa emidulini yendlu. |
| 7. | Njalo indlu, isakhiwa, yakhiwa ngamatshe ayepheleliswe enkwalini, ukuze kungezwakali isando lehloka, loba yisiphi isikhali sensimbi endlini nxa isakhiwa. |
| 8. | Umnyango wendlwana eseceleni ephakathi wawusehlangothini lwesokunene lwendlu; njalo bakhwela ngesikhwelo esibhodayo ukuya kwengaphakathi, lokusuka kwengaphakathi kusiya kweyesithathu. |
| 9. | Wayakha-ke indlu, wayiqeda; wagubuzela indlu ngentungo lamapulanka emisedari. |
| 10. | Wasesakha izindlwana eceleni kwendlu yonke, ubude bazo buzingalo ezinhlanu, wakuxhuma endlini ngezigodo zemisedari. |
| 11. | Ilizwi le Nkosi laselifika kuSolomoni lathi: |
| 12. | Mayelana la le indlu oyakhayo, uba uhamba ngezimiso zami, usenza izahlulelo zami, njalo ugcina yonke imilayo yami ukuhamba ngayo, ngizaqinisa ilizwi lami kuwe engalikhuluma kuDavida uyihlo; |
| 13. | ngizahlala phakathi kwabantwana bakoIsrayeli, ngingabatshiyi abantu bami uIsrayeli. |
| 14. | Wayakha-ke uSolomoni indlu, wayiqeda. |
| 15. | Wasesakha imiduli yendlu ngaphakathi ngamapulanka emisedari, kusukela kuphansi lendlu kuze kufike emidulini yophahla, wayembesa ngaphakathi ngezigodo, wendlala iphansi lendlu ngamapulanka amafiri. |
| 16. | Wasesakha izingalo ezingamatshumi amabili emaceleni endlu, ngamapulanka emisedari, kusukela kuphansi kwaze kwafika emidulini; wayakhela ngaphakathi, esenzela indawo yelizwi, esenzela ingcwele yezingcwele. |
| 17. | Lendlu, elithempeli, ngaphambili, yayizingalo ezingamatshumi amane. |
| 18. | Njalo umsedari wendlu ngaphakathi wawubazwe waba zinduku lamaluba avulekileyo; konke kwakungumsedari, kungabonakali litshe. |
| 19. | Waselungisa indawo yelizwi phakathi endlini ukubeka khona umtshokotsho wesivumelwano se Nkosi. |
| 20. | Lendawo yelizwi ephambili, ubude babuzingalo ezingamatshumi amabili, lobubanzi buzingalo ezingamatshumi amabili, lokuphakama kwayo kuzingalo ezingamatshumi amabili; wayihuqa ngegolide elicwengekileyo; wasesembesa ilathi lo msedari. |
| 21. | USolomoni waseyihuqa indlu ngaphakathi ngegolide elicwengekileyo, wenza isehlukaniso ngamaketane egolide phambi kwendawo yelizwi, wasesihuqa ngegolide. |
| 22. | Lendlu yonke wayihuqa ngegolide yaze yaphelela yonke indlu; lelathi lonke elisendaweni yelizwi walihuqa ngegolide. |
| 23. | Endaweni yelizwi wasesenza amakherubi* amabili ngesihlahla somhlwathi, ukuphakama kwakuzingalo ezilitshumi ngalinye. |
| 24. | Olunye uphiko lwekherubi lwaluzingalo ezinhlanu, lolunye uphiko lwekherubi lwaluzingalo ezinhlanu; kusukela ekucineni ko lunye uphiko kusiya ekucineni ko lunye uphiko kwakuzingalo ezilitshumi. |
| 25. | Lelinye ikherubhi lalizingalo ezilitshumi; womabili amakherubi ayeyisilinganiso sinye lesimo sinye. |
| 26. | Ukuphakama kwelinye ikherubhi kwakuzingalo ezilitshumi, lelinye ikherubhi lalinjalo. |
| 27. | Wasewabeka amakherubi phakathi kwendlu engaphakathi; njalo amakherubi elula impiko, kuze kuthi olunye uphiko lwathinta umduli, lophiko lwelinye ikherubhi lwathinta omunye umduli, lempiko zawo zathintana uphiko lophiko ngaphakathi kwendlu. |
| 28. | Wasewahuqa amakherubi ngegolide. |
| 29. | Wabaza imiduli yonke yendlu inhlangothi zonke ngemifanekiso ebaziweyo yamakherubi lezihlahla zamalala lamaluba avulekileyo ngaphakathi langaphandle. |
| 30. | Iphansi lendlu waselihuqa ngegolide ngaphakathi langaphandle. |
| 31. | Emnyango wendawo yelizwi wenza izivalo zesihlahla somhlwathi, ikhothamo le migubazi kulezinhlangothi ezinhlanu. |
| 32. | Lezivalo zombili zazingezesihlahla somhlwathi, wabaza kuzo imibazo yamakherubi lezihlahla zamalala lamaluba avulekileyo, wazihuqa ngegolide, wendlala igolide phezu kwamakherubi lezihlahla zamalala. |
| 33. | Ngokunjalo wasesenzela umnyango wethempeli imigubazi yesihlahla somhlwathi, ezinhlangothini ezine. |
| 34. | Lezivalo ezimbili zazingezezihlahla zamafiri; impiko zombili zesivalo esisodwa zazigoqeka, lezilenge ezimbili zesivalo sesibili zazigoqeka. |
| 35. | Wasebaza kuzo amakherubi lezihlahla zamalala lamaluba avulekileyo, wakuhuqa ngegolide elendlala kuhle phezu kokubaziweyo. |
| 36. | Wasesakha iguma elingaphakathi ngemizila emithathu yamatshe abaziweyo, lomzila wemijabo yemisedari. |
| 37. | Ngomnyaka wesine isisekelo sendlu ye Nkosi sabekwa, ngenyanga kaZivi. |
| 38. | Kwathi ngomnyaka wetshumi lanye, enyangeni kaBuli, okuyinyanga yesificaminwembili, yaphela indlu ezintweni zayo zonke lanjengakho konke ukumiswa kwayo. Ngakho wayakha iminyaka eyisikhombisa. |
| ← 1Kings (6/22) → |