← 1Kings (14/22) → |
1. | Ngalesosikhathi uAbhiya indodana kaJerobowamu wagula. |
2. | UJerobowamu wasesithi kumkakhe: Akusuke uzifihle isimo ukuze bangakwazi ukuthi ungumkaJerobowamu, uye eShilo; khangela, kukhona lapho uAhiya umprofethi owangitshela ukuthi ngizakuba yinkosi phezu kwalababantu. |
3. | Uthathe izinkwa ezilitshumi esandleni sakho lamaqebelengwana alukhuni lodiwo loluju, uye kuye, yena uzakutshela okuzakwenzeka kulumntwana. |
4. | UmkaJerobowamu wasesenza njalo, wasuka waya eShilo, wafika emzini kaAhiya. Kodwa uAhiya wayengelakubona ngoba amehlo akhe ayesenqundekile ngenxa yobudala bakhe. |
5. | I Nkosi yasisithi kuAhiya: Khangela, umkaJerobowamu uyeza ukubuza ulutho kuwe ngendodana yakhe, ngoba iyagula. Uzamtshela ukuthi lokuthi. Ngoba kuzakuthi ekungeneni kwakhe, uzazitshaya omunye. |
6. | Kwasekusithi uAhiya esizwa izisinde zenyawo zakhe lapho engena emnyango wathi: Ngena mkaJerobowamu; uzitshayelani omunye? Ngoba ngithunywe kuwe ngento enzima. |
7. | Hamba uthi kuJerobowamu: Itsho njalo i Nkosi, uNkulunkulu kaIsrayeli, ithi: Njengoba ngakuphakamisa uphakathi kwabantu, ngakwenza umbusi phezu kwabantu bami uIsrayeli, |
8. | ngadabula umbuso ngawususa endlini kaDavida, ngawunika wena; kodwa kawubanga njengenceku yami uDavida, owagcina imilayo yami, lowangilandela ngenhliziyo yakhe yonke, ukwenza okuhle kuphela emehlweni ami; |
9. | kodwa wenzile ububi okwedlula bonke ababekhona phambi kwakho, kodwa uhambe wazenzela abanye onkulunkulu lezithombe ezibunjwe ngokuncibilikisa, ukuze ungithukuthelise, wangilahla emva komhlana wakho. |
10. | Ngakho, khangela, ngizakwehlisela ububi endlini kaJerobowamu, ngiqume asuke kuJerobowamu ochamela emdulini, ovalelweyo lokhululekileyo koIsrayeli, ngihugule okulandelayo kwendlu kaJerobowamu, njengomuntu ehugula umquba uze uphele. |
11. | OkaJerobowamu ofela phakathi komuzi zizamudla izinja, lofela egangeni zizamudla inyoni zamazulu; ngoba i Nkosi ikhulumile. |
12. | Ngakho wena suka, uye endlini yakho; ekungeneni kwenyawo zakho emzini umntwana uzakufa. |
13. | Njalo uIsrayeli wonke uzamlilela amngcwabe; ngoba nguye kuphela koJerobowamu ozakuza engcwabeni, ngoba kutholakala kuye into elungileyo ngase Nkosi ni uNkulunkulu kaIsrayeli endlini kaJerobowamu. |
14. | Futhi uJehova uzazivusela inkosi phezu kukaIsrayeli, ezaquma indlu kaJerobowamu ngalolosuku. Kodwa kuyini? Lakhathesi. |
15. | Njalo i Nkosi izamtshaya uIsrayeli njengomhlanga uzunguzeka emanzini, iquphule uIsrayeli elizweni leli elihle, eyalinika oyise, ibachithachithe ngaphetsheya komfula, ngenxa yokuthi bazenzela izixuku, bayithukuthelisa i Nkosi. |
16. | Njalo izanikela uIsrayeli ngenxa yezono zikaJerobowamu, owonayo, wenza uIsrayeli one. |
17. | UmkaJerobowamu wasesuka wahamba, wafika eTiriza. Lapho efika embundwini wendlu, umfana wafa. |
18. | Basebemngcwaba; loIsrayeli wonke wamlilela, njengokwelizwi le Nkosi eyalikhuluma ngesandla senceku yayo uAhiya umprofethi. |
19. | Ezinye-ke zezindaba zikaJerobowamu, ukuthi walwa njani, lokuthi wabusa njani, khangela, zibhaliwe egwalweni lwemilando yamakhosi akoIsrayeli. |
20. | Lensuku uJerobowamu abusa ngazo zaziyiminyaka engamatshumi amabili lambili, walala laboyise, njalo uNadabi indodana yakhe waba yinkosi esikhundleni sakhe. |
21. | URehobowamu indodana kaSolomoni wabusa-ke koJuda. URehobowamu wayeleminyaka engamatshumi amane lanye lapho esiba yinkosi, wabusa iminyaka elitshumi lesikhombisa eJerusalema, umuzi i Nkosi eyayiwukhethile kuzo zonke izizwe zakoIsrayeli, ukubeka khona ibizo layo. Lebizo likanina lalinguNahama umAmonikazi. |
22. | UJuda wasesenza okubi emehlweni e Nkosi, bayivusa umona, okwedlula konke oyise ababekwenzile, ngezono zabo abazonayo. |
23. | Ngoba labo bazakhela izindawo eziphakemeyo, lezinsika eziyizithombe, lezixuku, phezu kwalo lonke uqaqa oluphakemeyo, langaphansi kwaso sonke isihlahla esiluhlaza. |
24. | Kwakukhona-ke elizweni lezinkotshana. Benza njengokwezinengiso zezizwe i Nkosi eyayizixotshile elifeni phambi kwabantwana bakoIsrayeli. |
25. | Kwasekusithi ngomnyaka wesihlanu wenkosi uRehobowamu uShishaki inkosi yeGibhithe wenyuka wamelana leJerusalema. |
26. | Wathatha amagugu endlu kaJehova lamagugu endlu yenkosi, yebo wakuthatha konke, wathatha zonke izihlangu zegolide uSolomoni ayezenzile. |
27. | Inkosi uRehobowamu yasisenza endaweni yazo izihlangu zethusi, yazinikela esandleni senduna yabalindi ababegcina umnyango wendlu yenkosi. |
28. | Njalo kwakusithi lapho inkosi ingena endlini kaJehova abalindi babezithwala, bazibuyisele endlini yabalindi. |
29. | Ezinye-ke zezindaba zikaRehobowamu, lakho konke akwenzayo, kakubhalwanga yini egwalweni lwemilando yamakhosi akoJuda? |
30. | Kwakukhona-ke impi phakathi kukaRehobowamu loJerobowamu zonke izinsuku. |
31. | URehobowamu waselala laboyise, wangcwatshelwa kuboyise emzini kaDavida. Lebizo likanina lalinguNahama umAmonikazi. UAbhiyamu indodana yakhe wasesiba yinkosi esikhundleni sakhe. |
← 1Kings (14/22) → |